រាជធានីភ្នំពេញ ៖ យោងតាមអ្នកជំនាញខាងផ្នែកអចលនទ្រព្យបានលើកឡើងថា «ប្រសិនបើយើងនិយាយទៅ ចាស់ៗគាត់តែងតែនិយាយថា ប្រសិនជាអ្នកមានដោយសារចៃដន្យ អាចក្រវិញបាន ប៉ុន្តែប្រសិនបើជាយើងជាមនុស្សដែលចេះហើយ ហើយរកស៊ីបានក្លាយជាអ្នកមាន នោះគឺមិនងាយដួលវិញទេ»។…
រាជធានីភ្នំពេញ ៖ យោងតាមអ្នកជំនាញខាងផ្នែកអចលនទ្រព្យបានលើកឡើងថា «ប្រសិនបើយើងនិយាយទៅ ចាស់ៗគាត់តែងតែនិយាយថា ប្រសិនជាអ្នកមានដោយសារចៃដន្យ អាចក្រវិញបាន ប៉ុន្តែប្រសិនបើជាយើងជាមនុស្សដែលចេះហើយ ហើយរកស៊ីបានក្លាយជាអ្នកមាន នោះគឺមិនងាយដួលវិញទេ»។
លោកបណ្ឌិត គីម ហាង អគ្គនាយកក្រុមហ៊ុនខ្មែរ រៀលអ៊ីស្ទេត បានបន្តថា នៅពេលយើងមានចំណេះដឹងច្រើន រៀនចប់នៅសាកលវិទ្យាល័យ ប៉ុន្តែយើងបែរជាមកចាប់ផ្តើមការរកស៊ីវិញ អ៉ីចឹងអ្វីដែលយើងត្រូវមុននោះគឺយើងត្រូវធ្វើផែនការមួយដែលគិតទៅដល់ ១០ ទៅ ២០ ឆ្នាំក្រោយ (គិតនិងត្រៀមអ្វីដែលនឹងមកដល់) យើងមិនគួធ្វើការបណ្តើរគិតបណ្តើរនោះទេ។
លោកបណ្ឌិត គីម ហាង បានបន្តថា «កាលពីខ្ញុំបានចាប់អាជីពនេះដំបូង (ខាងដីធ្លី) ពេលនោះគឺមិនសូវមានអ្នកចេះដឹងនោះទេ អ៉ីចឹងខ្ញុំគឺជាបញ្ញាវ័ន្ត ជាសិស្ស និងជាសាស្ត្រាចារ្យមហាវិទ្យាល័យមួយរូបដែរ ដូចនេះខ្ញុំចេះភាសាបរទេសច្រើន និងអាចទំនាក់ទំនងជាមួយភ្ញៀវបរទេសច្រើនផងដែរ។ ម្យ៉ាងវិញទៀតជាទូទៅ ខ្ញុំយល់ពីលក្ខណៈទីផ្សារ ព្រោះថាខ្ទង់ឆ្នាំ២០០៥ ទៅ ២០០៦នឹង គឺមានអង្គការ និងក្រុមហ៊ុនច្រើនណាស់ ដូចនេះក្នុងពេលនឹងអ្វីដែលយើងរកលុយបាន គឺមានដី ឬការិយាល័យសម្រាប់ជួលឱ្យពួកគាត់នេះឯង»។
អ្វីៗគ្រប់យ៉ាងគឺចាំបាច់ណាស់ដែលទាមទារ ឱ្យយើងមានចំណេះដឹងជាមុនសិន គឺវាផ្តើមចេញពីការចេះ និងការមើលឃើញទៅអនាគតកាលនេះឯង ដែលនាំផ្លូវឱ្យយើងដើរទៅបានវែងឆ្ងាយ។
លោកបានបន្តថា «ហើយបើចរិតធម្មជាតិរបស់ខ្ញុំពីដើមមក ខ្ញុំធ្វើការខ្ញុំមិនដែលដាក់លុយនៅពីមុខនោះទេ ពេលដែលខ្ញុំធ្វើការឱ្យថៅកែចិនធំៗនៅក្នុងស្រុកខ្មែរ ពេលដែលគាត់ប្រើខ្ញុំ គឺខ្ញុំមិនដែលនិយាយតំលៃមុននោះទេ ហើយខ្ញុំក៏មិនទាមទារដែរ គឺខ្ញុំធ្វើចេញជាលិទ្ធផល ទើបគេឱ្យប៉ុណ្ណា ខ្ញុំយកប៉ុណ្ណឹង។ ជាទូទៅប្រសិនជាយើងមានសេវាកម្មល្អលឿន អាលុយនឹងក៏គេឱ្យយើងច្រើនដែរ ចឹងយើងត្រូវទុកលុយនៅពីក្រោយខ្នង កាល ណាការងារជោគជ័យ នោះលុយនឹងរត់មកដោយឯកឯង»។
លោកបន្ថែមថា ដំណាក់កាលវិវឌ្ឍន៍ពីសម័យមួយទៅសម័យមួយតែងតែមានការផ្លាស់ប្តូរ អាចនិយាយបានថា លោកតែងតែតាមដានសេដ្ឋកិច្ចស្រុកខ្មែរតាំងពី ឆ្នាំ ១៩៩៧ ឆ្នាំនេះក្នុងប្រទេសថៃនិងប្រទេសសឹង្ហបុរីមានវិបត្តិសេដ្ឋកិច្ច ដែលធ្វើឱ្យប៉ះពាល់ដល់ប្រទេសកម្ពុជាផងដែរ។ និងក្នុងឆ្នាំ ២០០៨ ប្រទេសសហរដ្ឋអាមេរិកមានវិបត្តិសេដ្ឋកិច្ច ធ្វើឱ្យប៉ះពាល់ដល់សេដ្ឋកិច្ចពិភពលោក។ ក្នុងឆ្នាំ ២០១៩ យើងមានទាំងរឿង EBA ផង កូវីដ១៩ ផង និងរឿងច្បាប់សំណង់ចេញច្រើនផង គឺយើងឆ្លងកាត់ច្រើន ដែលធ្វើឱ្យដឹងនិងបានរៀនសូត្រពីបទពិសោធន៍ទាំងនោះ។
«ទំលាប់របស់ខ្ញុំតាំងពីដើមមក គឺចូលចិត្តសិក្សាររៀនសូត្រ គឺរៀនមិនចេះឈប់ មកទល់បច្ចុប្បន្ននេះខ្ញុំរៀនចប់បណ្ឌិត ៣ឆ្នាំហើយ ប៉ុន្តែខ្ញុំមិនបញ្ឈប់នៃការសិក្សាររបស់ខ្ញុំនោះទេ គឺខ្ញុំនៅតែរៀនរហូត។ រៀនឱ្យបានច្រើន ធ្វើដំណើរឱ្យបានច្រើនប្រទេស នៅពេលដែលយើងដើរបានច្រើន មើលពិភពលោកខាងក្រៅ បទពិសោធន៍ដែលយើងបានមើលឃើញប្រទេសគេនោះហើយ ដែលបណ្តាលឱ្យយើងគិតទៅអនាគតក្នុងប្រទេសកម្ពុជា។ ខ្ញុំអាចនិយាយបានថាប្រទេសវៀតណាមដើរមុនយើងជាង ១០ ឆ្នាំ ប្រទេសថៃ និងប្រទេសម៉ាឡេស៊ី ដើរមុនយើង ២០ ឆ្នាំ សឹង្ហបុរីដើរមុនយើង ៣០ ឆ្នាំ អ៉ឺរ៉ុបដើរមុនយើង ៥០ ឆ្នាំ និងសហរដ្ឋអាមេរិកដើរមុនយើងច្រើនជាង ៥០ឆ្នាំ។ ដូចនេះដោយសារខ្ញុំបានដើរទៅក្នុងប្រទេសរីកចំរើនទាំងអស់នេះហើយ ទើបខ្ញុំអាចទស្សន៍ទាយថា ១០ទៅ ២០ ឆ្នាំក្រោយប្រទេសយើងនឹងទៅជាយ៉ាងមិច»។
សរុបមកនៅពេលដែលយើងដឹងថា អនាគតសេដ្ឋកិច្ចប្រទេសយើងនឹងទៅជាយ៉ាងណាហើយ នោះយើងអាចរៀបផែនការនិងគម្រោងនានា ដើម្បីត្រៀមអនាគតនឹងមកដល់៕
ចែករំលែកព័តមាននេះ