រាជធានីភ្នំពេញ ៖ កញ្ញារស់ កែវធីតា ជាតារាចម្រៀងថ្មីមានទេពកោសល្យច្រៀងជាភាសាអង់គ្លេសយ៉ាងពីរោះ និងនិយមច្រៀងបទមនោសញ្ចេតនាជំនាន់រាជិនីសំឡេងរស់ សេរីសុទ្ធា ។
រាជធានីភ្នំពេញ ៖ កញ្ញារស់ កែវធីតា ជាតារាចម្រៀងថ្មីមានទេពកោសល្យច្រៀងជាភាសាអង់គ្លេសយ៉ាងពីរោះ និងនិយមច្រៀងបទមនោសញ្ចេតនាជំនាន់រាជិនីសំឡេងរស់ សេរីសុទ្ធា ។
ពន្លកសិល្បៈចម្រៀងមួយរូបនេះ គឺជាចៅស្រីរបស់លោកកែវ ចិន្តាអតីតរដ្ឋមន្ត្រីក្រសួងវប្បធម៌ អំឡុងទសវត្សទី៨០ និងជាម្ចាស់ស្នាដៃបទចម្រៀង «ឱភ្នំពេញអើយ» ។
រូបរាងតូចច្រឡឹង ស្រស់ស្អាត កញ្ញារស់ កែវធីតា មាននិស្ស័យសិល្បៈតាំងពីកុមារភាព ។ ធីតាចូលចិត្តច្រៀង និងមានសំឡេងពីរោះពីធម្មជាតិមក ។ តារាស្រីវ័យក្មេងខ្ចីម្នាក់នេះ គឺជាប្អូនបង្កើតរបស់កញ្ញារស់ ខេមរិន ហៅខេលី តារាចម្រៀងលេចធ្លោក្នុងផលិតកម្មមួយ ។ កញ្ញាកែវ រស់ធីតា មានទេពកោសល្យច្រៀងភាសាអង់គ្លេសបានយ៉ាងពីរោះដូចតារាបរទេស ។ ចំពោះបទចម្រៀងខ្មែរ ធីតានិយមបទជំនាន់អ្នកស្រីរស់ សេរីសុទ្ធា ។ មូលហេតុដូច្នេះហើយទើបតារារះថ្មីម្នាក់នេះត្រូវស្ថានីយទូរទស្សន៍មួយចំនួនទាក់ទងឱ្យចូលរួមច្រៀងជាបន្តបន្ទាប់ដូចជា ទូរទស្សន៍បាយ័ន ក្នុងកម្មវិធី «វិស្សមកាលតន្ត្រី» និង «តន្ត្រីយុវវ័យ», ទូរទស្សន៍ស៊ីធីអិុន កម្មវិធី «អេវ័ន» និង«មន្តស្នេហ៍សំនៀង» និងនៅទូរទស្សន៍អាស៊ីអាគ្នេយ៍ជាដើមដែលជួយជំរុញឱ្យនាងកាន់តែលេចធ្លោក្នុងពិភពសិល្បៈ ។
កញ្ញារស់ កែវធីតា ឲ្យដឹងកាលពីពេល ថ្មីៗនេះថា នាងចេះច្រៀងជាភាសាអង់គ្លេសដោយសារតែរៀនភាសានេះតាំងពីតូច និងមានអ្នកជួយបង្ហាត់បង្រៀងផងកាន់តែជួយឲ្យនាងចេះច្រៀងស្ទាត់ និងចេះចាំច្រើនបទ ។ ច្រៀងជាភាសាអង់គ្លេសពិបាកដែរ ព្រោះត្រូវប្រើសំឡេងខ្ពស់ ហើយច្រៀងច្បាស់ពាក្យ
ពេចន៍ទើបមានគេចាប់អារម្មណ៍ ។ ក្រៅពីបទចម្រៀងជាភាសាបរទេស ធីតាច្រៀងបទខ្មែរដែរ ។ បទចម្រៀងពីដើម ធីតាហាត់រៀនចេះជាច្រើនបទ តាំងពីបទបែបមនោសញ្ចេតនាទាំងបទចង្វាក់ប្រជាប្រិយ ។ កញ្ញារស់ កែវធីតានិយាយថា «ចេះបានច្រើនបទអាចឲ្យយើងមានឱកាសកាន់តែទូលាយមិនរំពឹងតែមួយមុខ ហើយអាចបង្កើនសមត្ថភាពបានច្រើនជាងច្រៀងជាភាសាបរទេស ។ នាងខ្ញុំខិតខំជួយខ្លួនឯង ដោយពង្រឹងទេពកោសល្យឲ្យកាន់តែប្រសើរឡើងទៀតដោយសារតែសិល្បៈនាងខ្ញុំចូលចិត្ត និងស្រឡាញ់តាំងពីតូច ។ នាងខ្ញុំចង់មានឈ្មោះល្បីល្បាញទៅថ្ងៃអនាគត» ៕
ចែករំលែកព័តមាននេះ