ខេត្តបាត់ដំបង ៖ យោងតាមព័ត៌មានបឋមដែលកោះសន្តិភាពទទួលបាននៅព្រឹកថ្ងៃទី១៨ ខែតុលានេះ បានឱ្យដឹងថា ជំនន់ទឹកភ្លៀងបាននិងកំពុងចាប់ផ្ដើមវាយប្រហារជាថ្មី ចូលតាមបណ្ដាឃុំមួយចំនួននៅស្រុកបវេល ខណៈច្រកទ្វារអន្តរជាតិ «ដូង» នៅស្រុកកំរៀង…
ខេត្តបាត់ដំបង ៖ យោងតាមព័ត៌មានបឋមដែលកោះសន្តិភាពទទួលបាននៅព្រឹកថ្ងៃទី១៨ ខែតុលានេះ បានឱ្យដឹងថា ជំនន់ទឹកភ្លៀងបាននិងកំពុងចាប់ផ្ដើមវាយប្រហារជាថ្មី ចូលតាមបណ្ដាឃុំមួយចំនួននៅស្រុកបវេល ខណៈច្រកទ្វារអន្តរជាតិ «ដូង» នៅស្រុកកំរៀង ក៏កំពុងចាប់ផ្ដើមលិចលង់ដំណាលគ្នានៅព្រឹកនេះដែរ។
អធិការនគរបាលស្រុកបវេល លោក សុខ សារិន បានឱ្យដឹងថា ពេលនេះ លោកកំពុងតែដឹកនាំកម្លាំងចុះតាមដានស្ថានភាពទឹកជំនន់ដែលបានចាប់ផ្ដើមហក់ឡើងវិញជាថ្មី ហើយថែមទាំងកំពុងយាយីកំណាត់ផ្លូវជាតិមួយចំនួនទៀតផង។
លោកអធិការបានប្រាប់ថា ទឹកបានចាប់ផ្ដើមរើបឡើងវិញ នៅវេលារំលងអធ្រាត្រឈានចូលថ្ងៃទី១៨ តុលានេះ។ ពេលនេះ យើងពិនិត្យឃើញឃុំចំនួន២ ដែលកំពុងតែប្រឈមនឹងជំនន់ទឹកភ្លៀងជាលើកទី២នេះ គឺឃុំបឹងប្រាំ និងឃុំអំពិលប្រាំជាដើម ខណៈផ្លូវជាតិលេខ៥៧B ដែលឆ្លងកាត់ឃុំទាំង២នេះ ក៏កំពុងតែប្រឈមជាមួយនឹងការលិចលង់ជាថ្មីដែរ។
ដោយឡែកនៅឯស្រុកកំរៀង ជាប់ព្រំដែនប្រទេសថៃ ឯណោះវិញ ក៏មានសេចក្ដីរាយការណ៍ដែរថា ទឹកជំនន់ បានហូរធ្លាក់ពីប្រទេសថៃ ចូលតាមអូរព្រំដែន ធ្វើឱ្យជន់លិចច្រកទ្វារអន្តរជាតិ «ដូង» ដែលមិនអាចឱ្យអ្នកដំណើរ ឬរថយន្តដឹកទំនិញឆ្លងកាត់បានឡើយ។
បើតាមប្រពីមន្ត្រីនៅទីនោះ បានបញ្ជាក់ថា ទឹកជំនន់ជាថ្មីនេះ បានចាប់ផ្ដើមហក់ឡើងនៅវេលាទៀបភ្លឺថ្ងៃទី១៨ ខែតុលានេះ ដែលមានកម្ពស់ប្រជាង០៤ម៉ែត្រ។ យ៉ាងនេះក្ដី ងាកមកមើលស្ថានភាពទឹកស្ទឹងសង្កែវិញ កម្ពស់ទឹកហាក់នៅកំរិតទាបនៅឡើយ ខណៈអាកាសធាតុនៅពេលនេះកំពុងអ័ព្ទអ៊ូយ៉ាងខ្លាំង។ ប៉ុន្តែឥទ្ធិពលទឹកអាងកំពីងពួយ កំពុងបន្តធ្វើឱ្យលិចលង់លើឃុំចំនួន៤ ក្នុងស្រុកថ្មគោលដដែល ព្រមទាំងបានយាយីលើកំណាត់ផ្លួវជាតិលេខ៥ រាប់រយម៉ែត្រទៀតផង។
រដ្ឋបាលខេត្តបាត់ដំបង កាលពីថ្ងៃទី១៧ តុលា បានចេញសេចក្ដីជូនដំណឹងដល់ប្រជាពលរដ្ឋនៅក្នុងខេត្ត ឱ្យត្រៀមលក្ខណៈប្រុងប្រយ័ត្នចំពោះជំនន់ទឹកភ្លៀងដែលនឹងកើតឡើងជាថ្មីម្ដងទៀត ក្នុងពេលពេលឆាប់ៗខាងមុខនេះ។ រដ្ឋបាលខេត្តបានជូនដំណឹងនេះ ដោយយោងលើការព្យាករណ៍របស់ក្រសួងធនធានទឹក និងឧតុនិយម ដែលបានប្រកាសថា សម្ពាធទាបសកម្មនឹងចូលមកប្រទេសកម្ពុជា ចាប់ពីថ្ងៃទី១៧ ដល់ថ្ងៃទី១៩ ខែតុលានេះ ហើយក្នុងចំណោមខេត្តមួយចំនួនដែលប្រឈមនឹងសម្ពាធទាបជាថ្មីនេះ ក៏មានខេត្តបាត់ដំបងផងដែរ។ ដូច្នេះប្រជាពលរដ្ឋគួរតែមានការប្រុងប្រយ័ត្នឱ្យបានខ្ពស់បំផុត ចំពោះអាកាសធាតុដ៏អាក្រក់នេះ៕
ចែករំលែកព័តមាននេះ