សូមប្រយ័ត្ន ! ខេត្តព្រះសីហនុភ្លៀងធ្លាក់ខ្លាំងធ្វើឲ្យជន់លិចតំបន់ទំនាបមួយចំនួន

ថ្ងៃទី ១៦ ខែ តុលា ឆ្នាំ ២០២០

ម៉ោង ១៥:១៤

ខេត្តព្រះសីហនុ ៖ នៅស្រុកព្រៃនប់ មានភ្លៀងធ្លាក់ខ្លាំងទៀតហើយ ដែលធ្វើឲ្យនៅមានការជន់លិចនៅកន្លែងទំនាបមួយចំនួននៅក្រុងព្រះសីហនុ ខណៈភ្លៀងធ្លាក់ខ្លាំងក្នុងកម្រិត ១៤៣.៥ មម នារសៀលថ្ងៃទី១៦ ខែតុលា ឆ្នាំ២០២០នេះ ។ នេះបើតាមក្រសួងធនធានទឹក និងឧតុនិយម និងផេក រដ្ឋបាលខេត្តព្រះសីហនុ ។

លោក គួច ចំរើន អភិបាលនៃគណៈអភិបាលខេត្តព្រះ សីហនុ ដឹកនាំមន្ត្រីជំនាញ អាជ្ញាធរឃុំ ស្រុកចុះពិនិត្យស្ថានភាពជំនន់ទឹកភ្លៀងនៅឃុំទួលទទឹង ស្រុកព្រៃនប់ ខេត្តព្រះសីហនុ ស្របពេលដែលកំពុងតែធ្លាក់ភ្លៀង ។

ក្នុងឱកាសនោះ លោក គួច ចំរើន អភិបាលខេត្តព្រះសីហនុ ដឹកនាំមន្ត្រីជំនាញ និងអាជ្ញាធរឃុំ ស្រុក ចុះពិនិត្យជំនន់ទឹកភ្លៀងនៅតាមខ្នងផ្ទះប្រជាពលរដ្ឋ និងបន្តចុះពិនិត្យមើលតាមអូ ប្រឡាយរំដោះទឹក ជំនន់ ដោយបញ្ជាគ្រឿងចក្រចំនួន ៩គ្រឿង បែងចែកជាពីរគោលដៅ ដើម្បីរំដោះទឹកចេញពីភូមិ ព្រមទាំងបានធ្វើការណែ នាំឱ្យអាជ្ញាធរភូមិ ឃុំ ដែលនៅជិតជាមួយប្រជាពលរដ្ឋត្រូវតាមដានស្ថានភាពអាកាសធាតុ ជាប់ជាប្រចាំ ប្រសិនមានភាពចាំបាច់យើងជួយសង្គ្រោះប្រជាពលរដ្ឋរបស់យើងបានទាន់ពេលវេលា ។

សូមរំលឹកថាកាលពីថ្ងៃទី ១៧ ខែកញ្ញា ឆ្នាំ២០២០ កន្លងមក ជំនន់ទឹកភ្លៀងបានធ្វើឲ្យជន់លិចឃុំចំនួន៣ ក្នុងស្រុកព្រៃនប់ ខេត្តព្រះសីហនុ មានដូចជា ឃុំទួលទទឹង ឃុំសំរុង និងឃុំអណ្តូងថ្ម ៕