ស្ថានការទីផ្សារការងារក្នុងពេលបច្ចុប្បន្ននេះមានលក្ខណៈខុសគ្នាពីស្ថានការមុនៗច្រើនណាស់ខណៈដែលមនុស្សកាន់តែច្រើនកំពុងរកការងារ។ ការសិក្សាមួយចំនួនបានបង្ហាញឲ្យឃើញថា ការមិនមានការងារក្នុងរយៈពេលវែងអាចប៉ះពាល់ដល់សុខភាពផ្លូវកាយ និងផ្លូវចិត្តរបស់មនុស្សបាន។ ដូច្នេះតើអ្នកត្រូវធ្វើយ៉ាងដូចម្តេចដើម្បីមើលថែខ្លួនឯងក្នុងកំឡុងពេលរកការងារ?
១. កំណត់ម៉ោងសម្រាប់ការរកការងារ
មានកត្តាជាច្រើនដែលអ្នកមិនអាចគ្រប់គ្រងបានដូចជាស្ថានការសេដ្ឋកិច្ច ទីផ្សារការងារ និងបញ្ហាក្នុងសង្គមផ្សេងៗជាដើម។ ប៉ុន្តែអ្នកត្រូវតែផ្តោតស្មារតីលើអ្វីដែលអ្នកអាចគ្រប់គ្រងបានដើម្បីកាត់បន្ថយការស្ត្រេស និងការនឿយហត់។ ជាដំបូងគឺអ្នកអាចកំណត់ម៉ោងសម្រាប់ការចំណាយលើការរកការងារ ។ លោកដេន ប្លេក (Dan Black) ដែលជាអ្នកជ្រើសរើសបុគ្គលិកមកពីក្រុមហ៊ុនប្រឹក្សា EY ផ្តល់យោបល់ឲ្យចំណាយពេលរវាង ១ទៅ ៣ម៉ោងប៉ុណ្ណោះសម្រាប់ការរកការងារ។
២. ធានាថាអ្នកសម្រេចបានអ្វីមួយជារៀងរាល់ថ្ងៃ
លោកប្លេកផ្តល់យោបល់ទៀតថាអ្នកគួរតែរៀបចំកិច្ចការដែលអ្នកត្រូវសម្រេចជារៀងរាល់ថ្ងៃដើម្បីអនុញ្ញាតឲ្យអ្នកមើលឃើញថាអ្នកបានសម្រេចអ្វីមួយ។ វាអាចជាការរៀនវគ្គខ្លី អានសៀវភៅ ឬកិច្ចការផ្ទះដែលអ្នកត្រូវធ្វើជាដើម។
៣. ផ្តោតស្មារតីលើអ្វីៗជុំវិញខ្លួនអ្នក
ចំណុចមួយទៀតដែលអ្នកអាចគ្រប់គ្រងបានគឺបរិស្ថានជុំវិញខ្លួនរបស់អ្នក។ ការផ្ញើអ៊ីមែល ឬប្រវត្តិរូបសង្ខេបពីគ្រែគេងរបស់អ្នកមិនល្អសម្រាប់រាងកាយ និងសតិរបស់អ្នកទេ។ ប្រសិនបើអ្នកធ្វើឲ្យបរិស្ថានជុំវិញខ្លួនអ្នកកាន់តែល្អ អ្នកកាន់តែមានអារម្មណ៍ល្អជាងមុនក្នុងការរកការងារ និងដាក់ពាក្យសុំការងារដែរ។
៤. រៀបចំអ្វីដែលអ្នកចូលចិត្តធ្វើជារៀងរាល់សប្តាហ៍
មនុស្សមិនចូលចិត្តបរិស្ថានដែលមានភាពដដែលៗទេ។ ដូច្នេះដើម្បីកាត់បន្ថយអារម្មណ៍ស្ត្រេស អ្នកគួរតែរៀបចំនូវសកម្មភាពង្វីដែលអ្នកចូលចិត្តធ្វើយ៉ាងហោចណាស់ឲ្យបានម្តងក្នុងកួយសប្តាហ៍ ដូចជាការលេងកីឡា ឬការដើរហាត់ប្រាណជាដើម។ ការរៀបចំពេលវេលាសម្រាប់វាឲ្យបានច្បាស់លាស់ក៏ជួយឲ្យអ្នកជៀសវាងមានអារម្មណ៍រអៀសខ្លួនដែលដើរចេញពីការរកការងារទៅធ្វើអ្វីផ្សេងដែរ ៕
ចែករំលែកព័តមាននេះ