ប្រសិនបើអ្នកជាម្ចាស់អាជីវកម្មដែលមានហាង និងទីតាំងច្បាស់លាស់ អ្នកប្រហែលជាធ្លាប់គិតហើយថាតើអ្នកគួរតែប្តូរទៅប្រកបអាជីវកម្មអនឡាញដែរឬទេ?
ការពិតជាក់ស្តែង ប្រសិនបើហាងរបស់អ្នកកំពុងតែដំណើរការបានល្អហើយ អ្នកមិនគូរភ័យខ្លាចការប្តូរទៅប្រកបអាជីវកម្មអនឡាញទេព្រោះវាមិនមានអ្វីគួរឲ្យខ្លាច ឬស្មុគស្មាញពេកឡើយ ហើយវាអាចជាឱកាសដែលអ្នកអាចបង្កើនប្រាក់ចំណូលរបស់អ្នកបានថែមទៀតផង។ប៉ុន្តែដើម្បីងាកទៅប្រកបអាជីវកម្មអនឡាញខណៈដែលអ្នកមានហាងដែលមានទីតាំងច្បាស់លាស់ អ្នកគួរតែអនុវត្តតាមនវិធីសាស្ត្រងាយៗខាងក្រោមនេះ៖
១. បង្កើតកម្មវិធីគួរឲ្យចាប់អារម្មណ៍
ក្រៅពីការមាន Page លើប្រព័ន្ធសង្គមមួយដែលមានភាពសកម្មក្នុងការចែករំលែកហើយ អ្នកគួរតែបង្កើតនូវកម្មវិធីទាក់ទាញផ្សេងៗទៀតដែលអនុញ្ញាតឲ្យអតិថិជនរបស់អ្នកចូលរួមបាន។ ប្រសិនបើអ្នកពូកែនិយាយ ឬមានបុគ្គលិកដែលពូកែនិយាយ អ្នកអាចគិតគូរពិចារណាលើកម្មវិធី Live បាន។
ជាក់ស្តែង កម្មវិធីទាំងនេះមិនចាំបាច់ត្រូវតែជាកម្មវិធី Live សម្រាប់លក់ទេ តែវាអាចជាការ Live សម្រាប់ឆ្លើយសំណួរ និងការ Live ចែករំលែកចំណេះដឹងជាដើម។
២. បង្កើតកម្មវិធីសមាជិក
ក្រៅពីការទិញសមាជិកសម្រាប់ការបញ្ចុះតម្លៃហើយ អ្នកអាចបង្កើតជាកម្មវិធីសមាជិកដែលផ្តល់នូវអត្ថប្រយោជន៍ផ្សេងៗទៀតដល់អតិថិជនរបស់អ្នក ដូចជាការទទួលបានព័ត៌មានផ្តាច់មុខ ឬការជួបជាមួយនឹងអ្នកជំនាញក្នុងវិស័យរបស់អ្នកជាដើម។ កម្មវិធីនេះមិនពិបាកក្នុងការបង្កើតទេ ព្រោះវាអាចជា Facebook Group ដែលងាយបង្កើតបាន។
៣. បង្កើតទំនាក់ទំនង
បើអ្នកមានទំនាក់ទំនងជាមួយអាជីវករដែលមានវត្តមានច្រើនលើប្រព័ន្ធសង្គម អ្នកគួរតែរកវិធីចាប់ដៃសហការគ្នាដើម្បីជួយចែករំលែកផលិតផល និងសេវាកម្មគ្នាទៅវិញទៅមក។ ប្រព័ន្ធសង្គមមានទំហំធំណាស់ ហើយអ្នកមិនចាំបាច់ត្រូវដណ្តើមអតិថិជនគ្នាឡើយ ៕
ចែករំលែកព័តមាននេះ