រាជធានីភ្នំពេញ ៖ សំណើជំរុញកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ (Cambodia-ROK FTA) ត្រូវបានដាក់ចេញ ដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា…
រាជធានីភ្នំពេញ ៖ សំណើជំរុញកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ (Cambodia-ROK FTA) ត្រូវបានដាក់ចេញ ដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅពេលដែលប្រធានាធិបតីកូរ៉េខាងត្បូង លោក Moon Jae-in បានមកធ្វើទស្សនកិច្ចនៅព្រះរាជាណាចក្រកម្ពុជានៅខែមីនាឆ្នាំ២០១៩។ បន្ទាប់ពីប្រទេសទាំងពីរបានប្រកាសចាប់ផ្តើមដំណើរការចរចា FTA នៅខែកក្កដាឆ្នាំនេះ ការចរចាទ្វេភាគីជាច្រើនលើកត្រូវបានគេមើលឃើញថាមានការរីកចម្រើន ជាលំដាប់និងឆាប់រហ័ស។
គិតត្រឹមខែតុលា ភាគីទាំងពីរកំពុងរំពឹងថានឹងឃើញនូវគ្រោងសំខាន់នៃលទ្ធផលការចរចានៅដំណាច់ឆ្នាំនេះ ខណៈភាគីកម្ពុជាបានលើកឡើងថា FTA រវាងកម្ពុជានិងប្រទេសកូរ៉េខាងត្បូងនឹងផ្តល់ឱកាសដល់កម្ពុជាពង្រឹងទីផ្សារ និងសម្រួលពាណិជ្ជកម្មជាមួយកូរ៉េខាងត្បូងប្រសើរជាងមុនបន្ថែមទៀត ។
ជារួមកិច្ចព្រមព្រៀងពាណិជ្ជកម្មសេរីកម្ពុជា -កូរ៉េខាងត្បូងត្រូវបានរំពឹងថានឹងបម្រើជាឱកាស សំខាន់មួយដើម្បីបង្កើនពាណិជ្ជកម្មនិងវិនិយោគរវាងប្រទេសទាំងពីរ។ គេរំពឹងថាវានឹងពន្លឿនកំណើនក្នុងទំហំពាណិជ្ជកម្មទ្វេភាគីដែលបានកើនឡើងជាមធ្យម១៥,៣% ជារៀងរាល់ឆ្នាំពីចំនួន៥៤លានដុល្លារក្នុងឆ្នាំ១៩៩៧ដល់ចំនួន ១,០៣ពាន់លានដុល្លារក្នុងឆ្នាំ២០១៩ ។
ចំណុចគួរពិចារណាគឺថា ទំហំពាណិជ្ជកម្មទ្វេភាគីបានកើនឡើងគួរឱ្យកត់សម្គាល់ចាប់តាំងពីការបញ្ចប់កិច្ចព្រមព្រៀងពាណិជ្ជកម្មសេរីអាស៊ាន-សាធារណរដ្ឋកូរ៉េនៅឆ្នាំ២០០៧ ដូច្នេះកិច្ចព្រមព្រៀងពាណិជ្ជកម្មសេរីកម្ពុជា- សាធារណរដ្ឋកូរ៉េ ដែលឆ្លុះបញ្ចាំងពីតម្រូវការនិងផលប្រយោជន៍ ជាក់លាក់របស់ប្រទេសទាំងពីរទំនងជាបង្កើតសន្ទុះមួយផ្សេងទៀតសម្រាប់លើកកម្ពស់ពាណិជ្ជកម្មនិងការវិនិយោគ ។
តាមទស្សនៈរបស់អ្នកប្រើប្រាស់កម្ពុជា អត្ថប្រយោជន៍ជាច្រើននឹងកើនឡើងព្រោះពួកគេ នឹងអាចទទួលបានទំនិញនិងសេវាកម្មរបស់កូរ៉េ ដូចជា ភេសជ្ជៈ យានយន្ត និងគ្រឿងសម្អាងជាមួយនឹងតម្លៃសមរម្យជាងមុន។ ជាមួយគ្នានោះផងដែរអតិថិជនកូរ៉េក៏នឹងទទួលបានអត្ថ ប្រយោជន៍ជាច្រើនពីកិច្ចព្រមព្រៀងពាណិជ្ជកម្មសេរីទ្វេភាគីផងដែរ ព្រោះពួកគេនឹងអាចទិញផលិតផលដែលនាំចូលពីកម្ពុជាក្នុងតម្លៃសមរម្យជាងមុនដូចគ្នា ។
កិច្ចព្រមព្រៀងពាណិជ្ជកម្មសេរី (FTA) នឹងផ្តល់ផលល្អដល់ក្រុមហ៊ុនកូរ៉េជាច្រើនដែលត្រូវបានបង្កើតឡើងនៅកម្ពុជា តាមរយៈការលើកកម្ពស់ការប្រកួតប្រជែងតម្លៃនាំចេញផលិតផលរបស់ពួកគេនៅពេលលក់ទៅប្រទេសកូរ៉េវិញ។
កិច្ចព្រមព្រៀងពាណិជ្ជកម្មសេរីកម្ពុជា- សាធារណរដ្ឋកូរ៉េក៏អាចដើរតួនាទីជាឱកាសមួយ ដើម្បីរកឱ្យឃើញនូវកម្លាំងចលករណ៍កំណើនសេដ្ឋកិច្ចថ្មីសម្រាប់ប្រទេសកម្ពុជា មិនត្រឹមតែតាមរយៈការពង្រីកការនាំចេញទំនិញពាណិជ្ជកម្មដែលបានបង្កើតរួចហើយប៉ុណ្ណោះទេ ប៉ុន្តែថែមទាំងបង្កើនការទាក់ទាញវិនិយោគសម្រាប់ភាគីទាំងពីរផងដែរ។ តាមទស្សនៈរបស់កូរ៉េ កិច្ចព្រមព្រៀងពាណិជ្ជកម្មសេរី (FTA) នឹងផ្តល់ឱកាសដើម្បីវិនិយោគយ៉ាងសកម្មនៅកម្ពុជាដែលជាប្រទេសកំពុងស្វែងរកការអភិវឌ្ឍរបស់ខ្លួនទៅជាមជ្ឈមណ្ឌលផលិតកម្មនិងពាណិជ្ជកម្មថ្មីនៅក្នុងតំបន់អាស៊ាន ។
កិច្ចព្រមព្រៀងពាណិជ្ជកម្មសេរី (FTA) នឹងធ្វើឱ្យប្រសើរឡើងនូវភាពងាយស្រួលរបស់ ពាណិជ្ជករពីប្រទេសទាំងពីរទៅកាន់ទីផ្សាររបស់ប្រទេសដទៃទៀតដែលរួមចំណែកដល់ការងារនិងកំណើនសេដ្ឋកិច្ចទៅវិញទៅមក ។
នៅពេលដែលបរិយាកាសពាណិជ្ជកម្មពិភពលោកមិនមានភាពប្រាកដប្រជាដោយសារ ជម្លោះពាណិជ្ជកម្មរបស់បណ្តាប្រទេសធំៗនៅលើពិភពលោក និងនៅពេលដែលបណ្តាប្រទេស នៅជុំវិញពិភពលោកកំពុងរងនូវផលលំបាកផ្នែកសេដ្ឋកិច្ចដែលបណ្តាលមកពីផលប៉ះពាល់ពីជំងឺរាតត្បាតកូវីដ-១៩នោះ ការជំរុញកិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េខាងត្បូងក៏ធ្វើឲ្យមានអត្ថន័យពិសេសបន្ថែមទៀត ។ ប្រសិនបើកិច្ចព្រមព្រៀងពាណិជ្ជកម្មសេរីចូលជាធរមានមុននេះ វានឹងអាចបន្ថែមកម្លាំងដល់វិធានការនានាដើម្បីស្តារសេដ្ឋកិច្ចឡើងវិញបន្ទាប់ពីកូវីដ១៩ ។
FTA ផ្តល់ឱកាសដល់កម្ពុជាពង្រឹកទីផ្សារ និងសម្រួលពាណិជ្ជកម្មជាមួយកូរ៉េប្រសើរជាងមុន
ទន្ទឹមនឹងការចរចារលើកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជាកូរ៉េកំពុងតែដំណើរឆ្ពោះទៅមុខលើផ្នែកបច្ចេកទេសហើយ FTA នេះជាច្រកមួយអាចបើកឱ្យកម្ពុជាធ្វើការពង្រីកទីផ្សារកសិផលថែមមួយកម្រិត និងជួយសម្រួលពាណិជ្ជកម្មមាន ភាពងាយស្រួល ជាងពេលបច្ចុប្បន្ននៅពេលដំណើរការជាផ្លូវការ ។
ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម មានប្រសាសន៍ឱ្យដឹងកាលពីថ្ងៃទី៣០ខែកញ្ញាកន្លងមកនេះថា ជាធម្មតាយើងកំពុងតែធ្វើការចរចាគ្នានៅឡើយមិនទាន់បានបញ្ចប់ ។ តែជារួមរាល់ទំនាក់ទំនងដែលយើងប្រឹងប្រែងបើកទីផ្សារតាមរយៈកិច្ចព្រមព្រៀងពាណិជ្ជកម្មសេរីទ្វេភាគីជាមួយកូរ៉េ សុទ្ធតែសំឡឹងឃើញនូវអត្ថប្រយោជន៍រវាងប្រទេសទាំងសងខាង ។
ចំពោះកូរ៉េយើងបានចរចារនៅពេលបច្ចុប្បន្ននេះ យើងសំឡឹងឃើញថា កូរ៉េជាទីផ្សារមួយដែលកម្ពុជាធ្លាប់នាំមុខទំនិញចេញទៅមានចំនួនច្រើន ទំនិញមានទាំងសម្លៀកបំពាក់ ម្ហូបអាហារកែច្នៃ គ្រឿងបន្លាស់ ឬគ្រឿងបង្គុំជាដើម ។
ឯកឧត្តមសង្កត់ធ្ងន់ថា «ពិសេសមុខទំនិញជាកសិផល យើងគិតថា ការចរចាកិច្ចព្រម ព្រៀងពាណិជ្ជកម្មសេរី រវាងកម្ពុជា និងកូរ៉េ ពិសេសពាណិជ្ជកម្មទំនិញនេះ អាចនឹងផ្តល់ ផលប្រយោជន៍ដល់កម្ពុជាអាចឱ្យយើងពង្រីកទីផ្សារបានថែមទៀត ។ យើងអាចសម្រួល ពាណិជ្ជកម្មយើងបានងាយស្រួលជាងមុនសម្រាប់ការនាំចេញពីស្រុកខ្មែរទៅទីផ្សារកូរ៉េ» ។
ឯកឧត្តមបានលើកឡើងទៀតថា រហូតមកដល់បច្ចុប្បន្នការនាំចេញទៅកាន់ប្រទេស ផ្សេងៗ មានទីផ្សារហើយតែមិនបានឆ្លងកាត់កាចរចារត្រឹមត្រូវតាមរយៈកិច្ចព្រមព្រៀង ពាណិជ្ជកម្មសេរី វាអាចមានរបាំងបច្ចេកទេសមួយចំនួន ។ បើជាផលិតផលកសិកម្មវា មាន របាំងអនាម័យ និងភូតគាមអនាម័យ បើជាផលិតផលឧស្សាហកម្មវាមានរបាំងគុណភាព របាំងបច្ចេកទេសដែលជាមិនមែនពន្ធមួយចំនួនផ្សេងទៀតដែលខាងទីផ្សារគេទាមទារ។ ដូចនេះទំនិញមួយមុខ ឬមួយប្រភេទទាមទារឆ្លងកាត់ ឬចាំបាច់ត្រូវគោរពទៅតាមលក្ខខណ្ឌទីផ្សារម្តង ។
ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មមានប្រសាសន៍ថា «ចំណែកកិច្ចព្រមព្រៀងពាណិជ្ជកម្មសេរី ដែល យើងកំពុងតែចរចារជាមួយកូរ៉េនេះ វាអាចជួយសម្រួល ដូចកិច្ចព្រមព្រៀងពាណិជ្ជកម្មសេរីដែលយើងធ្វើជាមួយចិននាពេលកន្លងមក។ វាអាចជួយសម្រួលនៅលក្ខខណ្ឌផ្សេងៗទាំងអនាម័យ និងភូតគាមអនាម័យទាំងលក្ខខណ្ឌបច្ចេកទេសមិនមែនពន្ធនេះត្រូវបានសម្រួល ហើយយើងជជែកគ្នាម្តងជាកញ្ចប់ ។ ដូច្នេះវិញ្ញាបនបត្រដែលចេញទៅ ដោយភាគីទាំងសងខាង ឬលក្ខណៈបច្ចេកទេសដែលចេញទៅដោយភាគីទាំងសងខាងនេះត្រូវបានគោរពនិងទទួលស្គាល់» ។
ឯកឧត្តម ប៉ែន សុវិជាតិ បានឱ្យដឹងទៀតថា FTA វាជួយសម្រួលដល់ការធ្វើពាណិជ្ជកម្ម ការនាំចេញទំនិញទៅវិញទៅមក ។ យើងសង្ឃឹមថា ប្រយោជន៍បានមកយើងប្រសើជាងមុន ហើយយើងអាចធ្វើទីផ្សារ ឬធ្វើពិពិធកម្មទីផ្សារយើងបានល្អជាងមុន ជាងស្ថានភាពបច្ចុប្បន្ន ។ ការរំពឹងទុកសម្រាប់កម្ពុជាយើងរំពឹងទុកថា ការចរចារផ្នែកបច្ចេកទេសនេះរួចរាល់នៅក្នុងពេលឆាប់ៗនេះ អាចនៅចុងឆ្នាំនេះ ឬដើមឆ្នាំក្រោយ ៕
ចែករំលែកព័តមាននេះ