រាជធានីភ្នំពេញ ៖ ការពិនិត្យអេកូសាស្ត្រ ពុំមានផលប៉ះពាល់អ្វីឡើយដល់ទារកក្នុងផ្ទៃ និងអ្នកម្តាយ ទោះបីមានការពិនិត្យច្រើនដងក៏ដោយ។ នេះតាមការឲ្យដឹងពីលោកវេជ្ជបណ្ឌិត ហួត សេង ឯកទេស សម្ភព និងរោគស្ត្រីនៃមន្ទីពេទ្យកាល់ម៉ែត ។
លោកវេជ្ជបណ្ឌិត ហួត សេង បានលើកឡើងទៀតថា ៖ ជាធម្មតាអ្នកម្តាយត្រូវពិនិត្យអេកូសាស្ត្រ អោយបាន៥ដង ទៅតាមការណាត់ជួបរបស់វេជ្ជបណ្ឌិតជំនាញ ប៉ុន្តែបើសិនក្នុងករណីណាមួយមិនធម្មតា អ្នកត្រូវពិនិត្យបន្ថែមទៀតទៅតាមស្ថានភាពជាក់ស្តែង។ ហើយការពិនិត្យអេកូសាស្ត្រឲ្យបាន ៥ដងនេះ គឺមានសារៈសំខាន់ទៅតាមអាយុ និងការវិវត្តន៍របស់ទារកក្នុងផ្ទៃ ៖
១)- លើកទី១ (នៅពេលបាត់រដូវ) ៖
-តើកូនស្ថិតនៅក្នុង ឬនៅក្រៅស្បូន?
-ទារកកំពុងវិវត្តន៍ ឬឈប់វិវត្តន៍?។
២)- លើកទី២ (១២សប្តាហ៍ – ១៤សប្តាហ៍) ៖
-ដើម្បីកំណត់ថ្ងៃបង្កកំណើត និងថ្ងៃគ្រប់ខែ
-តើកូនតែមួយ ឬភ្លោះ? (ភ្លោះអាច ២ ឬ ៣ ឬ ៤)
-វាស់កម្រាស់កញ្ចឹងកកូន (clarté nucale) និងពិនិត្យរក trisomie 21
-ភាពមិនប្រក្រតីរបស់ទារក (malformation) ៖ ១-សន្ទះទ្រូងចំហ (hernie diaphragmatique), ២-ពោះវៀនចេញក្រៅ (laparoschisis) និង៣-ទារកអត់លលាដ៏ក្បាល (anencéphalie)
-តើជាកូនពង (កូនដែលមិនមានរូបរាងជាទារក grossesse môlaire) ឬកូនធម្មតា
កំណត់ភេទកូន ស្រី ឬ ប្រុស ។
៣)- លើកទី៣ (២៣សប្តាហ៍ – ២៥សប្តាហ៍) ៖
-ជាអំឡុងពេលដែលអេកូសាស្ត្រមើលលម្អិត នូវគ្រប់សរីរាង្គរបស់ទារក ៖
-ខួរក្បាល (មានទឹកក្នុងខួរក្បាល។ល។)
-មុខ មាត់ ភ្នែក ច្រមុះ ត្រចៀក កន្លើត (មាត់ឆែប។ល។)
-បេះដូង (បេះដូងប្រហោង។ល។)
-សួត ថ្លើម ក្រលៀន ក្រពះ ពោះវៀន ផ្លោកនោម (ពេញលក្ខណៈ។ល។)
-ឆ្អឹងខ្នង សន្ទះទ្រូង (herniediaphragmatique)
-អវយវៈ (លើស ឬខ្វះ)។
៤)- លើកទី៤ (៣៣សប្តាហ៍ – ៣៥សប្តាហ៍)
-ការលូតលាស់ និងសុខភាពទារក
-ទម្រង់ និងទម្ងន់កូន
-ទីតាំងរបស់សុក
-បរិមាណទឹកភ្លោះ
-បញ្ហាផ្សេងៗទៀតដែលអាចកើតមានចំពោះទារក។
៥) លើកទី៥ (ដល់ថ្ងៃកំណត់សម្រាលហើយ មិនឈឺពោះសម្រាល) ៖
-តាមដានសុខភាពកូន (កូនខ្សោយ។ល។)
-តាមដានទឹកភ្លោះ (អស់ទឹកភ្លោះ ទឹកភ្លោះតិចពេក ច្រើនពេក។ល។)
លោកវេជ្ជបណ្ឌិត ហួត សេង ឯកទេស សម្ភព និងរោគស្ត្រីនៃមន្ទីពេទ្យកាល់ម៉ែតបានរំលឹកថា ៖ ការពិនិត្យអេកូផ្ទៃពោះចំពោះស្ត្រីមានគភ៌ មានសារៈសំខាន់ណាស់ក្នុងការតាមដានការវិវត្តន៍សរីរាង្គ និងដឹងពីជំងឺផ្សេងៗរបស់ទារកដែលនៅក្នុងផ្ទៃ។ ដូច្នេះសូមអញ្ជើញមកតាមដានផ្ទៃពោះ និងពិនិត្យអេកូសាស្ត្រជាមួយគ្រូពេទ្យជំនាញនៃមន្ទីរពេទ្យកាល់ម៉ែត ដើម្បីរកអោយឃើញថា មាតា និងទារកពិតជាមានស្ថានភាពសុខភាពល្អប្រាកដមែន៕
ចែករំលែកព័តមាននេះ