ដឹងពីអព្ភូតហេតុចម្លែកមួយកើតឡើងក្នុងវត្ត«ភ្នៀតសិម្ពលី»
- ភ្នំពេញ
រាជធានីភ្នំពេញ ៖ អព្ភូតហេតុចម្លែកមួយបានកើតឡើងនៅក្នុងវត្តភ្នៀតសិម្ពលី ដែលមានទីតាំងស្ថិតនៅក្នុងភូមិអង្គរជ័យ សង្កាត់ស្នោខណ្ឌកំបូល រាជធានីភ្នំពេញ ដោយសារតែអាងទឹកដ៏ធំមួយនៅក្នុងវត្តនេះ ដែលសាងសង់ឡើងអំពីឥដ្ឋ និងគ្រឹះបេតុងយ៉ាងរឹងមាំ ស្រាប់តែផុសអណ្ដែតឡើងមកលើ ដោយពុំដឹងមូលហេតុ ហើយក៏ពុំមានស្នាមប្រេះស្រាំ ឬបាក់បែកសូម្បីបន្តិចណាសោះឡើយ ។
អព្ភូតហេតុដ៏ចម្លែកមិនធ្លាប់ជួបនេះ បានធ្វើឲ្យព្រះគ្រូចៅអធិការវត្ត និងព្រះសង្ឃព្រមទាំងពុទ្ធបរិស័ទចំណុះជើងវត្តមានការងឿងឆ្ងល់យ៉ាងខ្លាំង ស្របពេលដែលវត្តភ្នៀតសិម្ពលីនេះកាលពីអតីតកាល គឺជាទីអារាមមួយដែលល្បីមានបារមីឫទ្ធីខ្លាំងពូកែ ហើយក៏ចំនឹងថ្ងៃសីលចេញវស្សាតាមប្រពៃណីព្រះពុទ្ធសាសនាផងដែរ ។
បើតាមអ្នកស្នាក់នៅក្នុងវត្តខាងលើបានប្រាប់ឲ្យកោះសន្តិភាពដឹងនៅថ្ងៃទី២ ខែតុលានេះថា ព្រះសិរីកោសល សុំ សុខា ព្រះវិន័យធរគណរាជធានីភ្នំពេញ ព្រះគ្រូអនុគណខណ្ឌកំបូល និងជាព្រះចៅអធិការវត្តភ្នៀតសិម្ពលី បានសាងសង់អាងទឹកនេះឡើង ដែលមានបណ្ដោយ ប្រវែង៨ម៉ែត្រនិងទទឹង៥ម៉ែត្រ ជម្រៅចូលទៅក្រោមដី៥ម៉ែត្រ និងកម្ពស់ផុតពីដី១ម៉ែត្រ ។ បានសាងសង់ឡើងអំពីឥដ្ឋនិងគ្រឹះបេតុងយ៉ាងរឹងមាំ ។
ក្រោយសាងសង់រួចពុំទាន់ដាក់ទឹកចូលនៅឡើយទេ ស្រាប់តែនៅសុខៗក៏ផុសអណ្ដែតឡើងមកលើដូចលើកតួអាងឡើងដោយពុំដឹងមូលហេតុ អស់រយៈពេលច្រើនថ្ងៃកន្លងមកហើយ ។ កាលពីអំឡុងថ្ងៃបិណ្ឌ១នៃពិធីបុណ្យភ្ជុំបិណ្ឌផុសឡើងមកតិចៗ ហើយចាប់ផ្ដើមផុសហើបផ្នែកខាងត្បូងមុន ដូចជាសំពៅ លុះរហូតមកដល់ពេលនេះស្រាប់តែផុសឡើងផុតពីក្នុងដីប្រមាណជាងមួយម៉ែត្រកន្លះ ។
ប្រភពដដែលបានបន្តថា ពួកគាត់ពុំហ៊ានសន្មត់ថា ជាបារមីខ្លាំងពូកែឬយ៉ាងណានោះទេ ប៉ុន្តែទីអារាមវត្តភ្នៀតសិម្ពលីនេះ កាលពីអតីតកាលមានមហិទ្ធិឫទ្ធិខ្លាំងពូកែ ។ នៅទីនោះមានកោះស័ក្តិសិទ្ធិឈ្មោះថា «កោះអណ្ដែត» ដែលមិនដែលលិចទឹក ទោះជាមានទឹកជំនន់ធំប៉ុនណាក៏ដោយ មានអ្នកតាច្រើនកន្លែង មានទូក.ងខ្លាំងពូកែ ។
ជាពិសេសមាន ព្រះចៅអធិការជំនាន់ទី១មានព្រះនាម«ប្រាក់» ដែលមានមហិទ្ធិឫទ្ធិខ្លាំងពូកែផងដែរ ។ ដោយឡែកបច្ចុប្បន្នក៏នៅមិនទាន់សាបរលាបទាំងស្រុងទេ ហើយក៏មិនមាននរណាហ៊ានប្រមាថឡើយ។ កាលពីអំឡុងសាងសង់ ជាងដែលជាអ្នកធ្វើអាងទឹកនេះត្រូវបានកូនឈឺរហូត ។ លុះពេលសាងសង់រួចមិនទាន់បានប៉ុន្មានផង ស្រាប់តែអណ្ដែតបែបនេះទៀត ប៉ុន្តែពួកគាត់ពុំអាចសន្មត់ឬសម្ដៅទៅលើបារមីនោះឡើយ គ្រាន់តែមានការងឿងឆ្ងល់តើបណ្ដាលមកពីមូលហេតុអ្វីតែប៉ុណ្ណោះ ។
យោងតាមអាខោនហ្វេសប៊ុកព្រះសិរីកោសល សុំ សុខា ព្រះវិន័យធរគណរាជធានីភ្នំពេញ ព្រះគ្រូអនុគណខណ្ឌកំបូល និងជាព្រះចៅអធិការវត្តភ្នៀតសិម្ពលី មានសង្ឃដីកាថា តើមកពីហេតុអ្វីឱ្យប្រាកដទៅ លោកម្ចាស់ថ្លៃ ? អាងស្តុកទឹកនៅក្នុងដី ជម្រៅ៥ម៉ែត្រ បណ្តោយ៨ម៉ែត្រ ទទឹង៥ម៉ែត្រធ្វើរួចហើយ ដោយមានជីកបង្ហាប់គ្រឹះជាបេតុងយ៉ាងរឹងមាំនៅជាប់របងប៉ែកខាងលិចក្នុងបរិវេណវត្ត ។ មិនទាន់បានដាក់ទឹកចូលមួយដំណក់ប្រើផង ឥឡូវអាងទឹកដ៏មហិមារបស់ខ្ញុំមួយនេះអណ្តែតពីក្នុងដីឡើងមកលើស្ទើរផុតរណ្តៅទៅហើយ ។
ចម្លែកពេកហើយទេដឹង បញ្ជាក់តួអាងទាំងមូល មិនមានបាក់បែក ឬប្រេះស្រាំទេ ។សូមញាតិមិត្តទាំងឡាយជួយផ្តល់យោបល់ផង តើមកពីហេតុអ្វីទៅលោកម្ចាស់ថ្លៃ ??? ទីតាំងវត្តភ្នៀតសិម្ពលី រាជធានីភ្នំពេញ ។ចំណែកលោកគ្រូ ឃុត ឃីម អាចារ្យវត្តភ្នៀតសិម្ពលីបានប្រាប់ថា បើតាមអ្វីដែលជាការលោកយល់ឃើញនោះបញ្ហាដែលនាំឲ្យអាងទឹកអណ្ដែតនេះឡើងពុំមែនមកពីអព្ភូតហេតុចម្លែកអីទេ តែអាចបណ្ដាលមកពីកំហុសបច្ចេកទេសរបស់ជាងនិងស្ថានភាពដីគឺ៖
ទី១-អាងទឹកនេះសាងសង់ដោយប្រើគ្រឹះបេតុងនិងដែករឹងមាំមែន ប៉ុន្តែអត់មានប្រើសសរឬធ្នឹមនោះទេ ។
ទី២-ដីបាតក្រោមអាងទឹកដែលជាងជីក គឺជាដីខ្សាច់សង្ស័យចំខ្សែទឹកហូរ ទើបត្រូវទឹកបុកឡើងរហូតធ្វើឲ្យអាងទឹកអណ្ដែតឡើង ។
ទី៣-ក្រោយសាងសង់រួចអត់ទាន់បានដាក់ទឹកចូលនៅឡើយ ទើបវាគ្មានទម្ងន់ហើយទឹកអាចអណ្ដែតបានប្រៀបដូចជាទូកឬកប៉ាល់ដែលអណ្ដែតទឹកដូច្នេះដែរ ។
ទោះបីបែបណា មិនមាននរណាម្នាក់ហ៊ានប្រមាថទៅលើទស្សបារមីវត្តនេះបានជាដាច់ខាតសូម្បីតែរូបលោកក៏ដោយ ហើយការរៀបរាប់ខាងលើ គឺគ្រាន់តែជាយល់ឃើញផ្ទាល់ខ្លួនលោកតែប៉ុណ្ណោះ ៕
ចែករំលែកព័តមាននេះ