ការមានផលិតផល ក្រុមការងារ និងគំរូអាជីវកម្មដែលល្អមានសារៈសំខាន់ហើយពេលដែលអ្នកចង់ចាប់ផ្តើមអាជីវកម្មមួយដោយខ្លួនឯង ប៉ុន្តែអ្នកត្រូវតែចាប់ផ្តើមគិតពីវិធីប្រមូលមូលធនផងដែរ ។ ប្រសិនបើអ្នកមានចំណាប់អារម្មណ៍ក្នុងការរកដៃគូអាជីវកម្ម ឬវិនិយោគិនសម្រាប់អាជីវកម្មរបស់អ្នកនោះ គន្លឹះខាងក្រោមអាចនឹងជួយដល់អ្នកបាន ។
១. រកទីកន្លែងដែលត្រឹមត្រូវ
ជាដំបូងអ្នកត្រូវរកនូវកម្មវិធីនានាដែលអនុញ្ញាតឲ្យអ្នកជួបជាមួយវិនិយោគិន ។ ជាទូទៅសិក្ខាសាលាចែករំលែក ឬកម្មវិធីជំរុញសហគ្រិនភាពជាឱកាសល្អៗសម្រាប់អ្នក ។ ពេលដែលអ្នកចាប់ផ្តើមការសន្ទនាជាមួយវិនិយោគិន អ្នកត្រូវតែធានាថាអ្នកកំពុងនិយាយជាមួយមនុស្សដែលត្រឹមត្រូវផងដែរ ។ អ្នកនឹងអាចសន្សំបានពេលវេលាច្រើនប្រសិនបើអ្នកដឹងថានរណាជាគោលដៅរបស់អ្នក ។ដូច្នេះអ្នកត្រូវតែធ្វើការស្រាវជ្រាវមុនចូលរួម និងតាមដានមើលមនុស្សដែលចាប់អារម្មណ៍លើវិស័យរបស់អ្នក ។
២. ប្រើទំនាក់ទំនងដែលអ្នកមាន
ប្រសិនបើអ្នកជាសហគ្រិនថ្មីដែលមិនទាន់ល្បីឈ្មោះនៅឡើយ អ្នកគួរតែលើកឈ្មោះមិត្ត ឬមនុស្សដែលអ្នកស្គាល់ដែលទទួលបានការគោរពក្នុងវិស័យ ។ វិនិយោគិនស្តាប់លឺគំនិតរបស់សហគ្រិនច្រើនណាស់ ដូច្នេះអ្នកត្រូវតែនិយាយឲ្យបានត្រង់ៗ និងកុំខ្ជះខ្ជាយពេលវេលារបស់ពួកគេ ។ តើអាជីវកម្មរបស់អ្នកធ្វើអ្វី?អ្នកត្រូវការមូលធនប៉ុន្មាន? អាជីវកម្មអ្នកមានគោលដៅអ្វីខ្លះ?
៣. ប្រើមធ្យោបាយដែលស័ក្តិសមនឹងអត្តចរិតរបស់អ្នក
ជាទូទៅ ការបង្កើតទំនាក់ទំនងរវាងមនុស្សនិងមនុស្សកើតមានឡើងលុះត្រាតែពួកគេជួបមុខគ្នាផ្ទាល់ ។ ប៉ុន្តែក្នុងពេលបច្ចុប្បន្ននេះ អ្នកអាចជួបនឹងមនុស្សជាច្រើនតាមប្រព័ន្ធឌីជីថលដែលកាន់តែលឿន និងចំណាយកាន់តែតិចផងដែរ ។
ប្រសិនបើអ្នកជាមនុស្សដែលពូកែសម្តី ជម្រើសល្អបំផុតសម្រាប់អ្នកគឺការជួបមនុស្សផ្ទាល់ តែប្រសិន បើអ្នកមិនពូកែនិយាយទេ អ្នកអាចជ្រើសរើសមធ្យោបាយអនឡាញបានដូចជាការសរសេរ និងផ្ញើអ៊ីមែល និងការរក្សាវត្តមានលើប្រព័ន្ធសង្គមឲ្យបានល្អជាដើម ។ ប្រសិនបើអ្នកទទួលបានការគោរព និងការទទួលស្គាល់លើប្រព័ន្ធសង្គមនោះ មនុស្សអាចនឹងទាក់ទងមកអ្នកផ្ទាល់ ឬអ្នកអាចប្រើវត្តមាននេះដើម្បីទៅនិយាយជាមួយវិនិយោគិនផងដែរ ៕
ចែករំលែកព័តមាននេះ