សង្ស័យ​ទុ​ស្សេ​ចរន្តអគ្គិសនី បង្ក​ការ​ឆាបឆេះ​ផ្ទះ​មួយ​ខ្នង​ទាំងស្រុង


រាជធានី​ភ្នំពេញ ៖ ផ្ទះ​ឈើ​លើ និង​រៀប​បន្ទប់​ថ្ម​ក្រោម​ត្រូវ​បាន​អគ្គិភ័យ​ឆាបឆេះ​យ៉ាង​សន្ធោសន្ធៅ​ទាំង​កណ្តាលថ្ងៃត្រង់ ដែល​សង្ស័យ​បណ្ដាល​មក​ពី​ទុ​ស្សេ​ចរន្តអគ្គិសនី ប៉ុន្តែ​មិន​បាន​បណ្ដាល​ឲ្យ​មាន​អ្នក​ស្លាប់​ឬ​រង​របួស​នៅ​ក្នុង​ហេតុការណ៍​មួយ​នេះ​ឡើយ​។ ភ្លាម​ៗ​នោះ​បងប្អូន​ប្រជាពលរដ្ឋ ដែល​ជា​អ្នក​ភូមិ​ផង​របង​ជាមួយ​បាន​នាំ​គ្នា​ជួយ​ពន្លត់​ដែរ​តែ​មិន​ឈ្នះ រហូត​ដល់​សមត្ថកិច្ច​នគរបាល និង​កងរាជអាវុធហត្ថ​ព្រមទាំង​កម្លាំង​ប្រជា​ការពារ​ចុះ​ទៅ​អន្តរាគមន៍ និង​ហៅ​រថយន្ត​ពន្លត់​អគ្គិភ័យ​ទៅ​បាញ់​ទឹក​ពន្លត់​អស់​៣​ស៊ីទែន​ទើប​រលត់​ទៅ​វិញ​មិន​បាន​រាលដាល​ដល់​ផ្ទះ​ផ្សេង​ទៀត​ដែល​ស្ថិត​នៅ​ជិត​នោះ​។

ហេតុការណ៍​នេះ​បាន​កើតឡើង​កាលពី​វេលា​ម៉ោង​១២ និង​២០​នាទី ថ្ងៃ​ទី​២៥ ខែកញ្ញា ឆ្នាំ​២០២០ ហើយ​ផ្ទះ​រង​គ្រោះ​មាន​ទីតាំង​ស្ថិត​នៅ​នៅ​តាម​បណ្ដោយ​ផ្លូវជាតិ​លេខ​២ ស្ថិត​នៅ​ក្នុងភូមិ​ក្រាំង​ស្វាយ សង្កាត់​ព្រែក​កំពឹស ខណ្ឌដង្កោ រាជធានី​ភ្នំពេញ​។ ផ្ទះ​ដែល​រង​ការ​ឆាបឆេះ​នោះ​មាន​ទំហំ​ទទឹង​ប្រវែង​៨​ម៉ែត្រ និង​បណ្ដោយ​ប្រវែង​១២​ម៉ែត្រ សាងសង់​អំពី​ឈើ​ខាងលើ និង​រៀប​បន្ទប់​ថ្ម​ក្រោម ដែល​មាន​ម្ចាស់​ឈ្មោះ អឿ ខាន់ ភេទ​ប្រុស អាយុ​៦១​ឆ្នាំ មុខរបរ​កសិករ​។ ចំណែក​ទ្រ​ព្រ​សម្បត្តិ​ដែល​រង​ការ​ខូចខាត រួម​មាន​ទូរទស្សន៍​ចំនួន​០២​គ្រឿង​, កង្ហារ​ចំនួន​០២​គ្រឿង​, ព្រមទាំង​ថវិកា និង​មាសប្រាក់​មួយ​ចំនួន​ទៀត ហើយ​មូលហេតុ​សង្ស័យ​បណ្តាល​មក​ពី​ការ​ទុ​សេ​ខ្សែ​ចរន្តអគ្គិសនី​។

អ្នក​ភូមិ​បាន​និយាយ​ថា នៅ​មុន​ពេល​កើតហេតុ​ខណៈ​អ្នក​ភូមិ​មួយ​ចំនួន​កំពុង​តែ​ហូប​បាយ និង​ខ្លះ​ទៀត​ហូប​បាយ​ថ្ងៃត្រង់​រួច​កំពុង​តែ​សម្រាក​ស្រាប់តែ​ឮ​ម្ចាស់ផ្ទះ​ស្រែក​ឲ្យ​ជួយ ខណៈនោះ​ក៏​បាន​នាំ​គ្នា​រត់​ចេញ​ទៅ​មើល​បានឃើញ​ផ្ទះ​ខាងលើ​កំពុង​ត្រូវ​បាន​ភ្លើង​ឆេះ​។ ភ្លាម​ៗ​នោះ​ពួក​គាត់​បាន​នាំ​គ្នា​ជួយ​ពន្លត់​យ៉ាង​សស្រាក់សស្រាំ ប៉ុន្តែ​មិន​បាន​ធ្វើ​ឲ្យ​ភ្លើង រលត់​ឡើយ​កាន់តែ​ពន្លត់​គឺ​កាន់តែ​ឆេះ​ខ្លាំង​ឡើង​ៗ ទើប​រាយការណ៍​សុំ​ការ​អន្តរាគមន៍​ពី​អាជ្ញាធរ​និង​សមត្ថកិច្ច​។ ភ្លាម​ៗ​នោះ​បន្ទាប់​ពី​ទទួល​បាន​ដំណឹង​នេះ​ក​ម្លាំ​សមត្ថកិច្ច​មូលដ្ឋាន បាន​ចេញ​អន្តរាគមន៍ និង​ហៅ​រថយន្ត​ពន្លត់​អគ្គិភ័យ ក្រុមហ៊ុនស្រា​បៀរ​កម្ពុជា និង​រថយន្ត​ពន្លត់​អគ្គិភ័យ​ដែល​ប្រចាំការ​នៅ​សាលា​ខណ្ឌដង្កោ​ទៅ​បាញ់​ទឹក​ពន្លត់​ទើប​រលត់​ទៅ​វិញ​ទាំងស្រុង និង​មិន​រាលដាល​ដល់​ផ្ទះ​ដែល​ស្ថិត​នៅ​ក្បែរ​នោះ​ទៀត​៕ ដោយ ៖ យន់ ស៊ី​ថា

Facebook Google Twitter Email

Live

Sponsored News

១១:២៩ | ក្នុងស្រុក

ក្រុមហ៊ុន KB Kookmin Card និង ធនាគារឯកទេស ខេប៊ី ដេហាន ម.ក ឧបត្ថម្ភថវិកាចំនួន ១០ម៉ឺនដុល្លារ ដើម្បីផ្ដល់អាហារូបករណ៍ និងគាំទ្រគម្រោងកែលម្អហេដ្ឋារចនាសម្ព័ន្ធក្នុងខេត្តកំពង់ធំ

ការស្ទង់មតិគេហទំព័រថ្មី




សូម​អរគុណ