រាជធានីភ្នំពេញ ៖ នារសៀលថ្ងៃទី២៤ ខែកញ្ញា ឆ្នាំ២០២០ សមត្ថកិច្ចជំនាញនៃការិយាល័យប្រឆាំងបទល្មើសជួញដូរមនុស្ស កងរាជអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់ទៅតុលាការ ដើម្បីចាត់ការតាមនីតិវិធីច្បាប់ ពាក់ព័ន្ធករណីហិង្សាក្នុងគ្រួសារ…
រាជធានីភ្នំពេញ ៖ នារសៀលថ្ងៃទី២៤ ខែកញ្ញា ឆ្នាំ២០២០ សមត្ថកិច្ចជំនាញនៃការិយាល័យប្រឆាំងបទល្មើសជួញដូរមនុស្ស កងរាជអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់ទៅតុលាការ ដើម្បីចាត់ការតាមនីតិវិធីច្បាប់ ពាក់ព័ន្ធករណីហិង្សាក្នុងគ្រួសារ ដោយការបំផ្លាញទ្រព្យសម្បត្តិ និងបានយកកាំបិតប៉័ងតោរកកាប់ផ្តាច់ជីវិតឪពុកម្តាយខ្លួនឯង។
ហេតុការណ៍ខាងលើនេះបានកើតឡើងកាលពីវេលាម៉ោង១និង៣០នាទីថ្ងៃទី២៣ ខែកញ្ញា ឆ្នាំ២០២០ ស្ថិតនៅចំណុចផ្ទះលេខ១៧៣ ក្រុមទី៣ ភូមិកប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ។
ជនសង្ស័យមានឈ្មោះ សំ សំណាង ភេទប្រុស អាយុ២២ឆ្នាំ មុខរបរមិនពិតប្រាកដ បច្ចុប្បន្នស្នាក់នៅផ្ទះលេខ១៧៣ ក្រុមទី៣ ភូមិកប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ។
ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញបានឲ្យដឹងថា ជនសង្ស័យម្នាក់ខាលើធ្លាប់ប្រើប្រាស់គ្រឿងញៀន ហើយថែមទាំងធ្លាប់បានបំផ្លិចបំផ្លាញ និងលួចទ្រព្យសម្បត្តិនៅក្នុងគ្រួសារយកទៅលក់ ដើម្បីយកលុយទៅទិញថ្នាំញៀនប្រើប្រាស់ និងតែងតែមករករឿងក្រុមគ្រួសារម្តងហើយម្តងទៀត ថែមទាំងបានគំរាមកំហែងថានឹងកាប់ផ្តាច់ជីវិតអ្នកនៅក្នុងផ្ទះចោលទាំងអស់។
ជាក់ស្តែងនៅវេលាម៉ោង១១និង៣០នាទីថ្ងៃទី២២ ខែកញ្ញា ឆ្នាំ២០២០ ជនសង្ស័យខាងលើបានមករករឿងអុកឡុកក្នុងផ្ទះ ព្រមទាំងបាន យកកាំបិតប៉័ងតោគំរាម រកកាប់ផ្តាច់ជីវិតឪពុកម្តាយខ្លួនទៀតផង ប៉ុន្តែត្រូវបានបងប្អូនជួយចាប់ឃាត់បំបែកទាន់ ឃើញដូចនេះ ទើបម្តាយបង្កើតក៏រត់ទៅប្តឹងសមត្ថកិច្ចមូលដ្ឋានអាវុធហត្ថខណ្ឌព្រែកពៅឃាត់ខ្លួនភ្លាមៗតែម្តង។
ជនសង្ស័យខាងលើបានសារភាពថា រូបខ្លួន និងក្រុមគ្រួសារ ឧស្សាហ៍ឈ្លោះប្រកែកគ្នាជារឿយៗ ហើយពិតជាបានយកកាំបិតប៉័ងតោគំរាមអ្នកនៅក្នុងគ្រួសារ ពិតប្រាកដមែន ហើយកន្លងមកខ្លួនតែងតែបង្កអំពើហិង្សា និងបំផ្លិចបំផ្លាញទ្រព្យសម្បត្តិ និងជាអ្នកធ្លាប់ប្រើប្រាស់គ្រឿងញៀនផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ