ខេត្តកំពង់ចាម ៖ ស្ពានអ្នកលឿងជាប្រភេទស្ពានហាយវ៉េ ឆ្លងទន្លេមេគង្គ ភ្ជាប់ពីខេត្តកណ្តាល ទៅខេត្តព្រៃវែង និងឆ្ពោះទៅខេត្តស្វាយរៀង ដែលគេទន្ទឹងរង់ចាំជាយូរមកហើយ នោះនឹងចាប់ផ្តើមបើកការដ្ឋានសាងសង់នៅថ្ងៃទី១២ កុម្ភៈ ២០១១ ខាងមុខនេះ ដើម្បីភ្ជាប់ទំនាក់ទំនងឱ្យកាន់តែទូលំទូលាយថែមទៀត ដល់ប្រជាពលរដ្ឋ អ្នកដំណើរការ ដឹកជញ្ជូន ភ្ញៀវទេសចរ និងការពង្រីកពាណិជ្ជកម្ម-សេដ្ឋកិច្ច ។
សម្តេចតេជោនាយករដ្ឋមន្ត្រីបានថ្លែងឱ្យដឹងបែបនេះក្នុងឱកាសអញ្ជើញជាអធិបតីភាពបើកសម្ពោធដាក់ឱ្យប្រើប្រាស់ជាផ្លូវការនូវអគារមន្ទីរពេទ្យធំមួយជាមួយនឹងការបំពាក់ឧបករណ៍សំភារទំនើបកាលពីព្រឹកថ្ងៃទី២០ មករា ២០១១ ស្ថិតក្នុងសង្កាត់វាលវង់ ក្រុងកំពង់ចាម ជាជំនួយឥតសំណងរបស់រាជរដ្ឋាភិបាលជប៉ុន ដែលចំណាយទឹកប្រាក់អស់ប្រមាណ១២លាន
ដុល្លារ ។
សម្តេចតេជោហ៊ុន សែន បញ្ជាក់ថា ស្ពាននេះធំជាងគេក្នុងចំណោមស្ពានដែលសាងសង់រួច មិនត្រឹមតែប៉ុណ្ណោះវាវែងជាងគេបំផុត និងខ្ពស់ជាងគេទៀតផង សំរាប់អនុគ្រោះឱ្យកប៉ាល់ដឹកទំនិញ-ភ្ញៀវទេសចរចេញ-ចូលដោយងាយស្រួល ដូច្នេះហើយទើបយើងធ្វើការសិក្សាយូរបន្តិច ។
សម្តេចតេជោនាយករដ្ឋមន្ត្រីបានមានប្រសាសន៍ឱ្យដឹងថា ស្ពាននេះគ្រោងនឹងកសាងរួចរាល់នៅឆ្នាំ២០១៥ ចំណាយទឹកប្រាក់អស់១៣០លានដុល្លារ ហើយការដេញថ្លៃគឺធ្វើឡើងនៅប្រទេសជប៉ុនទាំងអស់ ដែលវាមិនមែនជាផលប្រយោជន៍សំរាប់ប្រទេសកម្ពុជាមួយមុខទេ គឺជាផលប្រយោជន៍សំរាប់សមាហរណកម្មនៃអនុតំបន់ទន្លេមេគង្គផង និងអាស៊ានផង ព្រោះវាជាស្ពានហាយវ៉េអាស៊ាន ៕
ចែករំលែកព័តមាននេះ