រាជធានីភ្នំពេញ ៖ តម្រូវការសាច់ជ្រូក ឬជ្រូករស់ នៅលើទីផ្សារក្នុងកំឡុងពេលបុណ្យភ្ជុំបិណ្ឌក្នុងឆ្នាំ២០២០នេះហាក់មានការកើនឡើងព្រមគ្នា ហើយការកើនឡើងនេះផងដែរ បើតាមអ្នកជំនាញនៅក្នុងវិស័យធ្វើការប៉ាន់ប្រមាណថា មានប្រមាណ១០% នៃតម្រូវការជ្រូករស់នៅទូទាំងប្រទេស ។…
រាជធានីភ្នំពេញ ៖ តម្រូវការសាច់ជ្រូក ឬជ្រូករស់ នៅលើទីផ្សារក្នុងកំឡុងពេលបុណ្យភ្ជុំបិណ្ឌក្នុងឆ្នាំ២០២០នេះហាក់មានការកើនឡើងព្រមគ្នា ហើយការកើនឡើងនេះផងដែរ បើតាមអ្នកជំនាញនៅក្នុងវិស័យធ្វើការប៉ាន់ប្រមាណថា មានប្រមាណ១០% នៃតម្រូវការជ្រូករស់នៅទូទាំងប្រទេស ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យដឹងនៅថ្ងៃទី២០ កញ្ញានេះថា តម្រូវការជ្រូករស់នៅលើទីផ្សារក្នុងកំឡុងពេលថ្ងៃបុណ្យភ្ជុំបិណ្ឌ ចាប់ពីថ្ងៃទី១២ ដល់១៥ ខែកញ្ញា មានប្រមាណពី៩.០០០ ទៅ១០.០០០ក្បាល នៅទូទាំងប្រទេស ពោលតម្រូវការកើនឡើងប្រមាណ១០% ប្រៀបធៀបទៅនិងថ្ងៃធម្មតា ។
បើតាមប្រធានសមាគមរូបនេះ តម្រូវការជ្រូករស់នៅទូទាំងប្រទេសក្នុងកំឡុងថ្ងៃបុណ្យភ្ជុំបិណ្ឌកន្លងទៅនេះត្រូវការជ្រូកនាំចូលប្រមាណ ៣០% នៃចំនួនជ្រូករស់សរុបខាងលើ ។ លោកលើកឡើងថា «តម្លៃជ្រូករស់នៅលើទីផ្សារមិនមានការប្រែប្រួលនោះទេ មួយគីឡូក្រាមថ្លៃពី១២.៥០០ ឬ៣០.០០០រៀល តែតម្លៃសាច់ជ្រូកសម្រាប់អ្នកលក់រាយនៅលើទីផ្សារមានការប្រែប្រួលក្នុងកំឡុងពេលបុណ្យភ្ជុំបិណ្ឌ ហើយនៅពេលបុណ្យទានឬបុណ្យជាតិធំៗតម្លៃអាចប្រែប្រួលតិចតួច វាមិនមានការប្រែប្រួលខ្លាំងធ្វើឱ្យប៉ះពាល់ទីផ្សារឬអ្នកបរិភោគទេ ព្រោះការចិញ្ចឹមជ្រូកក្នុងស្រុកមានការកើនឡើង អីចឹងតម្លៃទោះបីយ៉ាងណាក៏មិនអាចហក់ឡើងរហូតធ្វើឱ្យបរិភោគទទួលយកមិនបាននោះទេ»។
អ្នកស្រី ប៉ាវ ស្រីភា អាជីវករលក់សាច់ជ្រូកបានឱ្យដឹងថា នៅថ្ងៃបុណ្យភ្ជុំបិណ្ឌឆ្នាំនេះ តម្រូវការសាច់ជ្រូក ឬការលក់សាច់ជ្រូកមានអ្នកមកទិញច្រើនជាងកាលថ្ងៃចូលឆ្នាំខ្មែរ ។ ពោលឆ្នាំនេះ ចាប់ពីថ្ងៃទី១២ ដល់១៥ ក្នុងរដូវបុណ្យភ្ជុំបិណ្ឌក្នុងមួយថ្ងៃអាចលក់សាច់ជ្រូកអស់៤ក្បាល ឬប្រមាណ៥០០គីឡូក្រាម ។
អ្នកស្រីបញ្ជាក់ថា« តម្លៃជ្រូករស់ពេលទិញយកមកកាប់សាច់មួយគីឡូក្រាមថ្លៃ១៣.៤០០រៀល ហើយលក់ចេញទៅវិញសម្រាប់សាច់សុទ្ធថ្លៃ២០.០០០រៀល ហើយខ្លាញ់ថ្លៃ៣០០០០រៀលក្នុងមួយគីឡូក្រាម» ។
ពាក់ព័ន្ធ និងការចិញ្ចឹមសត្វក្នុងស្រុកនេះ នៅពេលកន្លងទៅថ្មីៗ ប្រមុខរាជរដ្ឋាភិបាលបានជំរុញលើកទឹកចិត្តទៅដល់ប្រជាកសិករធ្វើចិញ្ចឹមសត្វឡើងវិញ ដើម្បីផ្គត់ផ្គត់ទីផ្សារកាត់បន្ថយការនាំចូលពីប្រទេសជិតខាង ហើយនៅឆ្នាំ២០១៩ កម្ពុជាមានលទ្ធភាពផ្គត់ផ្គង់សាច់បានជាង២៣ម៉ឺនតោន នៃតម្រូវការសាច់សរុប២៩ម៉ឺនតោនក្នុងមួយឆ្នាំ ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទធ្លាប់មានប្រសាសន៍ថា «ក្នុងឆ្នាំ២០១៩កន្លងទៅនេះ ផលិតកម្មសត្វសម្រេចបានជាង៤៥លានក្បាល កើនឡើងលើសឆ្នាំជាង៣% ជាហេតុធ្វើឱ្យកម្ពុជាមានលទ្ធភាពផលិតសាច់សម្រាប់បម្រើតម្រូវការក្នុងស្រុកបានជាង២៣ម៉ឺនតោនស្មើនឹង៨២% នៃតម្រូវការសាច់សរុបប្រមាណ២៩ម៉ឺនតោននៅក្នុងឆ្នាំ ។
ការចិញ្ចឹមសត្វលក្ខណៈពាណិជ្ជកម្មមានការកើនឡើងប្រមាណ៣៧%ប្រៀបធៀបទៅនឹងឆ្នាំមុន ដោយសារអ្នកចិញ្ចឹមមានការផ្លាស់ប្តូរឥរិយាបទពីការចិញ្ចឹមបែបធម្មជាតិ មកចិញ្ចឹមតាមបែបពាណិជ្ជកម្មដែលធ្វើឱ្យកំណើននៃប្រាក់ចំណូលខ្ពស់» ៕
ចែករំលែកព័តមាននេះ