ខេត្តស្វាយរៀង ៖ យ៉ាងហោចណាស់ ក៏មានអ្នកជិះម៉ូតូ២២គ្រឿងមិនពាក់មួកសុវត្ថិភាព ត្រូវបានសមត្ថកិច្ចនគរបាលនៃអធិការដ្ឋាននគបាលក្រុងស្វាយរៀង ចាប់ឃាត់ធ្វើការអប់រំនិងផាកពិន័យតាមច្បាប់ចរាចរណ៍ផ្លូវគោកដូចជា អត់ពាក់មួកសុវត្ថិភាពផាកពិន័យ៦ម៉ឺនរៀល, អត់ស្លាកលេខផាក១២ម៉ឺនរៀល និងនិយាយទូរស័ព្ទពេលកំពុងបើកបរផាកពិន័យ៨ម៉ឺនរៀល។
ករណីចាប់ផាកពិន័យអ្នកបើកបរម៉ូតូមិនពាក់មួកសុវត្ថិភាពនេះ កើតឡើងនៅវេលាម៉ោង៧ព្រឹក រហូតដល់ម៉ោង១២ថ្ងៃត្រង់ ថ្ងៃទី២០ ខែកញ្ញា ឆ្នាំ២០២០នេះ នៅចំណុចរង្វង់មូលរូបនាគខាងមុខសាលាដំបូងខេត្តស្វាយរៀង ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង។
លោកវរសេនីយ៍ត្រី អនឃួន សំអុល អធិការរងនៃអធិការដ្ឋាននគបាលក្រុងស្វាយរៀងទទួលផែនសណ្តាប់ធ្នាប់ចរាចរណ៍ផ្លូវគោកបានឲ្យដឹងថា លោកបានដឹកនាំកម្លាំងនគរបាលចរាចរណ៍នៃអធិការដ្ឋាននគបាលក្រុង សហការជាមួយកម្លាំងប្រជាការពារចុះអនុវត្តច្បាប់ចរាចរណ៍ ឃាត់យានយន្តល្មើសច្បាប់ចរាចរណ៍បានចំនួន២២ករណី ក្នុងនោះអ្នកជិះម៉ូតូអត់ពាក់មួកសុវត្ថិភាពចំនួន២២ករណី និងម៉ូតូអត់កញ្ចក់និងអត់ពាក់មួកសុវត្ថិភាព១ករណី។
ប្រភពដដែលបន្តទៀតថា ការចុះអនុវត្តរឹតបន្តឹងច្បាប់ចរាចរណ៍នេះ គឺត្រូវផាកពិន័យគុណនិងបី ចាប់ផ្តើមអនុវត្តចាប់តាំងពីថ្ងៃទី១ ខែឧសភា ២០២០ មកដល់ខែកញ្ញា ២០២០នេះ មានរយៈពេល៥ខែមកហើយ នៅតែមានអ្នកមិនគោរពច្បាប់ចរាចរណ៍ ក្នុងនោះមានទាំងប្រជាពលរដ្ឋ និងមន្ត្រីរាជការបើកបរម៉ូតូ អត់ពាក់មួកសុវត្ថិភាព ឬអ្នកបើកបរម៉ូតូពាក់មួកសុវត្ថិភាព អ្នករួមដំណើរអត់ពាក់មួកសុវត្ថិភាព និងមួយចំនួនទៀតមានមួកសុវត្ថិភាព ក៏ប៉ុន្តែអត់ពាក់ គឺព្យួរនៅដៃម៉ូតូ ឬឲ្យអ្នករួមដំណើកាន់ ។ នៅពេលឃើញមានសមត្ថកិច្ចចុះអនុវត្តច្បាប់ ទើបលើកមួកមកពាក់ គឺពួកគេពាក់មួកខ្លាចសមត្ថកិច្ចនគរបាលផាកពិន័យ ពួតគាត់មិនមែនពាក់មួកសុវត្ថភាពដើម្បីការពារសុវត្ថិភាព ពេលមានគ្រោះថ្នាក់ចរាចរណ៍ដោយយថាហេតុនោះទេ។
ហើយការចុះអនុវត្តច្បាប់ចរាចរណ៍នេះ គឺផាកពិន័យអ្នកបើកយានយន្តគ្រប់ប្រភេទ ដូចជាអ្នកបើកបរម៉ូតូអត់ពាក់មួកសុវត្ថិភាព អ្នករួមដំណើរអត់ពាក់មួកសុវត្ថិភាព គឺផាកពិន័យ៦ម៉ឺនរៀល, និយាយទូរស័ព្ទកំពុងបើកបរពិន័យ៨ម៉ឺនរៀល, ម៉ូតូអត់ស្លាកលេខពិន័យ១២ម៉ឺនរៀល, ម៉ូតូអត់កញ្ចក់លើកលែងមិនផាកពិន័យទេ គ្រាន់តែអប់រំប៉ុណ្ណោះ។
លោកអធិការរងបន្តទៀតថា ក្រោយពីចាប់ឃាត់អ្នកបើកបរម៉ូតូអត់ពាក់មួកសុវត្ថិភាពមកអប់រំ រួចធ្វើការផាកពិន័យជាប្រាក់១ ករណី៦ម៉ឺនរៀលផងដែរ៕
ចែករំលែកព័តមាននេះ