ខេត្តបាត់ដំបង ៖ បើតាមសេចក្តីរាយការណ៍របស់សមត្ថកិច្ចបានឱ្យដឹងថា យ៉ាងហោចណាស់មានមនុស្សចំនួន7នាក់ត្រូវបានបាត់បង់ជីវិត រីឯចំនួន៣នាក់ទៀតរងរបួសធ្ងន់ធ្ងរ ដោយសារតែគ្រោះធម្មជាតិរន្ទះបាញ់ ពេលកំពុងតែជួបជុំគ្នាផឹកស៊ី បង្កឱ្យមានការភ្ញាក់ផ្អើលកាលពីម៉ោង៦និង៣០នាទីព្រលប់ ថ្ងៃទី១៧ ខែកញ្ញា…
ខេត្តបាត់ដំបង ៖ បើតាមសេចក្តីរាយការណ៍របស់សមត្ថកិច្ចបានឱ្យដឹងថា យ៉ាងហោចណាស់មានមនុស្សចំនួន7នាក់ត្រូវបានបាត់បង់ជីវិត រីឯចំនួន៣នាក់ទៀតរងរបួសធ្ងន់ធ្ងរ ដោយសារតែគ្រោះធម្មជាតិរន្ទះបាញ់ ពេលកំពុងតែជួបជុំគ្នាផឹកស៊ី បង្កឱ្យមានការភ្ញាក់ផ្អើលកាលពីម៉ោង៦និង៣០នាទីព្រលប់ ថ្ងៃទី១៧ ខែកញ្ញា ឆ្នាំ២០២០ ស្ថិតនៅភូមិបឹងធ្មួញ ឃុំព្រែកជីក ស្រុករុក្ខគិរី។
សេចក្ដីរាយការណ៍បានឱ្យដឹងថា ពលរដ្ឋដែលបាត់បង់ជីវិតទាំង៧នាក់ខាងលើនេះមាន ៖ ១-ឈ្មោះ យ៉ុម ញ៉ឹប ភេទប្រុស អាយុ៥៦ឆ្នាំ ជាម្ចាស់ផ្ទះ ត្រូវបាត់បង់ជីវិត, ២-ឈ្មោះ ជា សុខណា ភេទស្រី អាយុ៥៦ឆ្នាំ ជាប្រពន្ធ ត្រូវបាត់បង់ជីវិត, ៣-ឈ្មោះ យ៉ុម ចរិយា ភេទស្រី អាយុ២៥ឆ្នាំ ជាកូនម្ចាស់ផ្ទះ ត្រូវបាត់បង់ជីវិត, ៤-ឈ្មោះ យ៉ុម រ៉ាវុធ ភេទប្រុស អាយុ២៦ឆ្នាំ ជាកូនម្ចាស់ផ្ទះ ត្រូវបានបាត់បង់ជីវិត, ៥-ឈ្មោះ អន វិន ភេទប្រុស អាយុ២៧ឆ្នាំ ជាអ្នករស់នៅខេត្តបាត់ដំបង បាត់បង់ជីវិត, ៦-ឈ្មោះ ធី ភេទប្រុស អាយុ៥០ឆ្នាំ អ្នកនៅបាត់ដំបង ត្រូវបាត់បង់ជីវិត និង៧-ឈ្មោះ ហួត ហុង ភេទប្រុស អាយុ៤៨ឆ្នាំ អ្នកនៅបាត់ដំបង ត្រូវបាត់បង់ជីវិត។
ចំណែកពលរដ្ឋដែលរងរបួសធ្ងន់ធ្ងរទាំង៣នាក់វិញ មានដូចជា ៖ ១-ឈ្មោះ វឿន វុត្ថា ភេទប្រុស អាយុ៤១ឆ្នាំ អ្នកនៅបាត់ដំបង រងរបួសធ្ងន់, ២-ឈ្មោះ សើក សារស់ ភេទប្រុស អាយុ៤០ឆ្នាំ អ្នកនៅបាត់ដំបង រងរបួសធ្ងន់ និង៣-ឈ្មោះ ឃឿត សំណាង ភេទប្រុស អាយុ២៥ឆ្នាំ នៅកន្លែងកើតហេតុ រងរបួសធ្ងន់។
ក្រោយពេលកើតហេតុ សមត្ថកិច្ចបានចុះទៅសួរនាំ និងពិនិត្យកន្លែងកើតហេតុបានឱ្យដឹងថា ហេតុការណ៍ដ៏រន្ធត់នេះបានកើតឡើង ខណៈពេលដែលជនរងគ្រោះទាំងអស់កំពុងតែអង្គុយផឹកស៊ីជុំគ្នានៅលើបង់ថ្មខាងមុខផ្ទះ ក្រោមពន្លឺភ្លើងសូឡា ហើយក៏ស្របពេលនោះមេឃចាប់ផ្ដើមមានភ្លៀងរលឹមតិចៗផងដែរ។
សមត្ថកិច្ចបន្តទៀតថា ខណៈពេលនោះស្រាប់តែអំពូលសូឡាបានដាច់ ហើយម្ចាស់ផ្ទះបានទៅពិនិត្យខ្សែ ប៉ុន្តែនៅពេលម្ចាស់ផ្ទះយកខ្សែដែលដាច់មកតវិញ ដើម្បីឱ្យមានភ្លើងភ្លឺ ស្រាប់តែរន្ទះបានបាញ់លាន់ឡើងកក្រើកចំតុអង្គុយផឹកស៊ី បណ្ដាលឱ្យមនុស្សបាត់បង់ជីវិត និងរបួសនៅរាយប៉ាយជុំវិញតុថ្មនោះតែម្ដង។
បើតាមប្រភពពីកន្លែងកើតហេតុបានឱ្យដឹងផងដែរថា ដំបូងមានច្រើនជាង១០នាក់រាប់ទាំងក្មេងៗផងដែរ ប៉ុន្តែមុនកើតហេតុបន្តិច ក្មេងទាំងនោះបានដើរចេញពីកន្លែងកើតហេតុអស់ទៅ ដោយសារមេឃរលឹម។ លុះពេលក្មេងៗចេញផុត ស្រាប់តែរន្ទះបានបាញ់តែម្ដង។
ប្រភពដដែលបានបញ្ជាក់ដែរថា ក្រុមគ្រួសារជនរងគ្រោះបានរៀបចំកម្មវិធីជួបជុំបងប្អូនក្នុងឱកាសបុណ្យភ្ជុំបិណ្ឌ ស្រាប់តែជួបសោកនាដកម្មបែបនេះ។
យ៉ាងណាក៏ដោយ នៅក្នុងហេតុការណ៍ដ៏រន្ធត់នេះ សមត្ថកិច្ចបានបញ្ជាក់ថា ពេលនេះក្រុមគ្រួសារបានដឹកសពជនរងគ្រោះទៅកាន់លំនៅឋានរៀងៗខ្លួនហើយ ដើម្បីធ្វើបុណ្យ លើកលេងតែសពគ្រួសារម្ចាស់ផ្ទះតែប៉ុណ្ណោះ ដែលត្រូវរៀបចំធ្វើបុណ្យរួមគ្នា។
បើតាមសមត្ថកិច្ចបានបញ្ជាក់បន្ថែមថា សពគ្រួសាររងគ្រោះជនរងគ្រោះមាន៤នាក់ ឪពុកម្ដាយ និងកូនប្រុស*ស្រី ត្រូវបានសាច់ញាតិ និងអ្នកភូមិរៀបចំធ្វើបុណ្យនៅក្នុងវត្តមួយនៅក្នុងភូមិ ដែលមើលទៅពិតជាគួរឱ្យសោកសង្រែងខ្លាំងបំផុត។
ចែករំលែកព័តមាននេះ