រាជធានីភ្នំពេញ ៖ សហព័ន្ធកីឡាតេក្វាន់ដូITFកាលពីយប់ថ្ងៃទី១១ កញ្ញា បានរៀបចំឱ្យមានការប្រកួតមួយនៅក្នុងទីលានពហុកីឡដ្ឋានជាតិដែលមានក្លិបចំនួន៦ចូលរួម ដើម្បីចម្រាញ់រកកីឡាករ-កីឡាការិនីឆ្នើមចំនួន១៥នាក់សម្រាប់ត្រៀមប្រកួតដណ្ដើមពានរង្វាន់អន្តរក្លិបនាពេលឆាប់ៗខាងមុខ។ ការប្រកួតនេះបានការអញ្ជើញចូលរួមពីលោក កែវ រ៉េមី ប្រធានសហព័ន្ធកីឡាតេក្វាន់ដូកម្ពុជា។…
រាជធានីភ្នំពេញ ៖ សហព័ន្ធកីឡាតេក្វាន់ដូITFកាលពីយប់ថ្ងៃទី១១ កញ្ញា បានរៀបចំឱ្យមានការប្រកួតមួយនៅក្នុងទីលានពហុកីឡដ្ឋានជាតិដែលមានក្លិបចំនួន៦ចូលរួម ដើម្បីចម្រាញ់រកកីឡាករ-កីឡាការិនីឆ្នើមចំនួន១៥នាក់សម្រាប់ត្រៀមប្រកួតដណ្ដើមពានរង្វាន់អន្តរក្លិបនាពេលឆាប់ៗខាងមុខ។ ការប្រកួតនេះបានការអញ្ជើញចូលរួមពីលោក កែវ រ៉េមី ប្រធានសហព័ន្ធកីឡាតេក្វាន់ដូកម្ពុជា។
លោកប៉ាល់ ជីវ័ន្ត គ្រូបង្វឹកក្រុមជម្រើសជាតិ បានឱ្យដឹងថា ការប្រកួតដណ្ដើមពានរង្វាន់អន្តរក្លិបដែលគ្រោងធ្វើឡើងនាពេលខាងមុខនេះគោលបំណងសំខាន់គឺដើម្បីសាកល្បងសមត្ថភាពគ្នារវាងកីឡាករ-កីឡាការិនីមកពីតាមបណ្ដាក្លិបនានាទូទាំងរាជធានី ខេត្ត ក៏ដូចជាក្នុងក្រុមជម្រើសជាតិ ដើម្បីពង្រឹងសមត្ថភាពបច្ចេកទេសបន្ថែមដល់ពួកគេសម្រាប់ត្រៀមប្រកួតថ្នាក់ជាតិនាពេលខាងមុខនេះ ។ លោកបន្តថា អ្វីដែលសំខាន់ជាងនេះទៅទៀតនោះ គឺដើម្បីជ្រើសរើសអ្នកដែលមានថ្វីដៃខ្ពស់មួយក្រុមដាក់បញ្ចូលទៅក្នុងក្រុមជម្រើសជាតិ ។ បន្ទាប់ពីបានឆ្លងកាត់ការប្រកួតរួចមកលោកសង្កេតឃើញថា កម្រិតបច្ចេកទេសរបស់ពួកគេមានការរីកចម្រើនខ្លាំង។
ជាមួយគ្នានេះដែរលោក កែវ រ៉េមី បានកោតសរសើរយ៉ាងខ្លាំងចំពោះការខិតខំប្រឹងប្រែងរបស់ក្មួយៗជាកីឡាករ កីឡាការិនី រហូតទទួលបានលទ្ធផលល្អបែបនេះ ។
លោកប្រធានសហព័ន្ធរូបនេះបានវាយតម្លៃខ្ពស់ចំពោះការប្រកួតលើកនេះ ដោយពួកគេម្នាក់ៗមានថ្វីដៃប្រហាក់ប្រហែលគ្នាទៅនឹងកីឡាករជម្រើសជាតិដែរ ធ្វើឱ្យចៅក្រមផ្ដល់ពិន្ទុពិបាកសម្រេចយ៉ាងខ្លាំង ។ ដូច្នេះហើយទើបលោកជំរុញទៅដល់អ្នកដែលមិនជាប់ ត្រូវខិតខំប្រឹងប្រែងហ្វឹកហាត់ជាបន្តទៀតដើម្បីឱ្យក្លាយជាកីឡាករ-កីឡាការិនីជម្រើសជាតិសម្រាប់ត្រៀមឆ្ពោះទៅការប្រកួតនៅលើឆាកអន្តរជាតិក៏ដូចជាត្រៀមប្រកួតកីឡាស៊ីហ្គេមឆ្នាំ២០២៣ ដ្បិតអីពេលនេះពួកគេមួយចំនួននៅវ័យក្មេង ទម្រាំដល់ការប្រកួតស៊ីហ្គេមគឺពេញកម្លាំងល្មម ៕
ចែករំលែកព័តមាននេះ