រាជធានីភ្នំពេញ ៖ មានការព្រួយបារម្ភយ៉ាងខ្លាំងថា កម្ពុជាអាចនឹងបាក់មុខពីការទទួលបានមេដាយតិច ឬបានត្រឹមបើកទ្វារឱ្យបណ្ដាប្រទេសអាស៊ានប្រជែងគ្នាយកមេដាយក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។ ប៉ុន្តែផ្ទុយពីការគិតនេះ…
រាជធានីភ្នំពេញ ៖ មានការព្រួយបារម្ភយ៉ាងខ្លាំងថា កម្ពុជាអាចនឹងបាក់មុខពីការទទួលបានមេដាយតិច ឬបានត្រឹមបើកទ្វារឱ្យបណ្ដាប្រទេសអាស៊ានប្រជែងគ្នាយកមេដាយក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។ ប៉ុន្តែផ្ទុយពីការគិតនេះ លោក វ៉ាត់ ចំរើន បានបង្ហាញពីជំនឿចិត្តថា កម្ពុជានឹងមានឱកាសទទួលបានមេដាយពីការប្រកួតកីឡាគ្រប់ប្រភេទមិនអន់ឡើយ ផ្អែកតាមសក្ដានុពលដែលកម្ពុជាក៏មានការបោះជំហានទៅមុខលើគ្រប់វិស័យកីឡា។
លោកអគ្គលេខាធិការគណៈកម្មាធិការជាតិរៀបចំកីឡាស៊ីហ្គេមនៅកម្ពុជា(CAMSOC) វ៉ាត់ ចំរើន បានគូសបញ្ជាក់ថា កម្ពុជាមិនអាចទទួលបានមេដាយតិចពេក ឬបើកទីលានឱ្យបរទេសប្រជែងគ្នា ហើយកម្ពុជាក្នុងនាមជាម្ចាស់ផ្ទះ បែរជាក្លាយជាភាគីឈរអបអរ ឬ ទះដៃឱ្យបរទេសនោះទេ សម្រាប់ការរៀបចំការប្រកួតនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូង ។ ថ្វីដ្បិតកម្ពុជាមិនរំពឹងថានឹងទទួលបានមេដាយឈានមុខដូចគ្នានឹងប្រទេសមួយចំនួនដែលធ្វើជាម្ចាស់ផ្ទះកន្លងមក តែលោកថាមេដាយមាសរបស់កម្ពុជា ក្នុងនាមជាម្ចាស់ផ្ទះ នឹងអាចឈានឡើងខុសពីពេលទៅប្រកួតក្នុងប្រទេសគេ ពោលគឺលទ្ធផលនឹងអាចទទួលយកបាន ។
លោកថា កម្ពុជាក្នុងរយៈពេលចុងក្រោយ មានកីឡាសក្ដានុពលធ្លាប់មានប្រៀប លើគេរួចមកហើយ ដែលសុទ្ធតែមានសមត្ថភាពប្រជែងបានមេដាយមាស ប្រាក់ និងសំរឹទ្ធក្នុងការប្រកួតស៊ីហ្គេមជាបន្តបន្ទាប់ ។ លោករំពឹងខ្លាំងលើប្រភេទកីឡាប៉េតង់ ចំបាប់ ម៉ូតូទឹក តេ ក្វាន់ដូ WT តេក្វាន់ដូ WTF ប្រដាល់គុនខ្មែរ វាយកូនបាល់ ការ៉ាតេ ក៏ដូចជាកីឡាវ៉ូវីណាមខណៈកីឡាប្រភេទផ្សេងក៏កំពុងជំរុញឱ្យមានការឈានឡើងផងដែរ ។
ក្នុងនោះកម្ពុជាក៏មានឱកាសដាក់បញ្ចូលនូវកីឡាដែលជាគ្រឹះរបស់ខ្លួន ហៅថាកីឡាប្រពៃណីជាច្រើនផ្សេងទៀតទើបលោកជឿជាក់ថា កម្ពុជាពិតជាទទួលបានមេដាយច្រើនពីការប្រកួតនោះ ដោយគ្រាន់តែមិនដឹងថា នឹងបានមេដាយច្រើនជាងកម្ពុជាធ្លាប់ទទួលបានច្រើនបំផុតពីស៊ីហ្គេមកន្លងមកប៉ុន្មានដង ។ លោកថា កម្ពុជាកំពុងជំរុញបន្ថែម ឲ្យប្រភេទកីឡាទាំងនេះ រួមទាំងប្រភេទកីឡា ប្រយុទ្ធមួយចំនួនទៀត ទទួលបានឧត្តមភាព បន្ថែមទៀត ដោយអ្នកធ្លាប់ឈ្នះមេដាយមាស ត្រូវបន្តយកឈ្នះមេដាយមាសទៀត ។ រីឯ អ្នកឈ្នះត្រឹមមេដាយប្រាក់ ត្រូវជំរុញឲ្យដល់ មេដាយមាស និងអ្នកធ្លាប់បានមេដាយសំរឹទ្ធ ត្រូវជំរុញឲ្យដល់មេដាយប្រាក់ជាដើម ។
លោកអគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បន្តថា កម្ពុជា មិនគ្រាន់តែរៀបចំស៊ីហ្គេមក្នុងនាមជាម្ចាស់ផ្ទះ ដើម្បីលើកមុខលើកមាត់ប្រទេសប៉ុណ្ណោះទេ តែក៏ជំរុញផែនការអភិវឌ្ឍបច្ចេកទេសរបស់ខ្លួនរួច
អស់ហើយ ដែលគ្រោងនឹងបញ្ជូនទៅហ្វឹកហាត់ នៅក្រៅប្រទេសមួយក្រុមធំ ហើយ១ក្រុមទៀត ដែលហ្វឹកហាត់ក្នុងស្រុក ក៏ជួលគ្រូបរទេសឲ្យ មកជួយបង្វឹក ។ ទាំងអស់នេះ គឺជាការរៀបចំ ផែនការយុទ្ធសាស្ត្រអភិវឌ្ឍន៍ ក្នុងការរុញ កម្រិតបច្ចេកទេស ឈានទៅដល់គោលដៅ សក្ដានុពលរបស់យើង ។
លោក វ៉ាត់ ចំរើន ថា កន្លងមកកម្ពុជា បានឈរនៅចំណាត់ថ្នាក់លេខ៨ក្នុងចំណោម១១ប្រទេសនៃបណ្តាប្រទេសអាស៊ានទាំងអស់ជាពិសេសគឺស៊ីហ្គេមពីរលើកចុងក្រោយគឺនៅម៉ាឡេស៊ីឆ្នាំ២០១៧ និងស៊ីហ្គេមនៅហ្វីលីពីន ឆ្នាំ២០១៩ រួចទៅហើយ សម្រាប់ចំនួនមេដាយ។
ប៉ុន្តែ ឆន្ទៈដ៏មោះមុតរបស់ថ្នាក់ដឹកនាំគឺធ្វើយ៉ាងណារុញចំណាត់ថ្នាក់ពីលេខ៨នេះឲ្យមកត្រឹមចំណាត់ថ្នាក់លេខ៥ឬលេខ៦ ក្នុងពេលដែលកម្ពុជាទទួលធ្វើជាម្ចាស់ផ្ទះជាលើកដំបូងជាប្រវត្តិសាស្ត្រនោះ ដើម្បីលុបដានប្រវត្តិសាស្ត្រដែលកម្ពុជាធ្លាប់នៅលេខ៨ឬលេខ៩កន្លងមក។
គួរបញ្ជាក់ផងដែរថា ព្រឹត្តិការណ៍ស៊ីហ្គេមគឺជាកីឡាថ្នាក់តំបន់អាស៊ីអាគ្នេយ៍ដែលរៀបចំឡើងរៀងរាល់២ឆ្នាំម្តង ដោយកម្ពុជាជាអ្នករៀបចំស៊ីហ្គេមលើកទី៣២ ឆ្នាំ២០២៣ ។ ជាគម្រោង កម្ពុជានឹងរៀបចំការប្រកួតកីឡាស៊ីហ្គេមនាថ្ងៃទី៥ដល់ថ្ងៃទី១៧ ខែឧសភា ឆ្នាំ២០២៣ ។ រីឯការប្រកួតកីឡាជនពិការអាស៊ានប៉ារ៉ាហ្គេមលើកទី១២ឆ្នាំ២០២៣ នៅកម្ពុជា គ្រោងនឹងធ្វើឡើងក្រោយពីបញ្ចប់ស៊ីហ្គេមប្រមាណ២សប្ដាហ៍ដោយកំណត់យកកាលបរិច្ឆេទពីថ្ងៃទី១ ដល់ថ្ងៃទី១០ ខែមិថុនា ឆ្នាំ២០២៣ ៕
ចែករំលែកព័តមាននេះ