រាជធានីភ្នំពេញ ៖ មកទល់ពេលនេះ ស្ត្រីកម្ពុជាដែលចាប់យកអាជីពកីឡាច្រើនឡើងកំពុងធ្វើឱ្យមានការចាប់អារម្មណ៍យ៉ាងខ្លាំង ដោយសារតែពួកនាងបាននាំកិត្តិយសជូនជាតិ និងធ្វើឱ្យមហាជនទទួលស្គាល់ពីការប្រឹងប្រែងរបស់ពួកនាង ។ បើទោះជាស្ត្រីទាំងនោះ អ្នកខ្លះបានបោះបង់ឬចូលនិវត្តន៍ តែស្នាដៃពួកគាត់នៅតែមាន ជាក់ស្ដែងកាលណាគេនិយាយដល់វិស័យកីឡាប្រភេទនោះគឺពួកនាងត្រូវបានគេស្គាល់តែម្ដង ។ កីឡាការិនី និងអតីតកីឡាការិនីខ្មែរដែលលេចធ្លោនៅក្នុងវិស័យកីឡាទាំងនោះរួមមាន៖
១-កែ ឡេង ៖ ក្នុងវិស័យកីឡាប៉េតង់ គេកត់សម្គាល់ថា កីឡាការិនីជាច្រើនកំពុងមានភាពលេចធ្លោ ប៉ុន្តែគេនៅតែមើលឃើញថា អ្នកស្រី កែ ឡេង ល្បីល្បាញជាងគេ ទាំងក្នុងស្រុក និងលើឆាកអន្តរជាតិ ។ បើទោះជាក្នុងពេលនេះ អ្នកស្រីប្រកាសលាឈប់ តែកេរ្តិ៍ឈ្មោះរបស់អ្នកស្រីនៅតែលេចធ្លោ បន្ទាប់ពីទទួលបានមេដាយមាសពិភពលោកជាច្រើនជំនាន់ ធ្វើឱ្យបរទេសទទួលស្គាល់កម្ពុជានៅក្នុងក្រាំងមាស។
២- ស៊ន សៀវម៉ី ៖ អាចនិយាយបានថាគ្មានអ្នកណាមិនស្គាល់នាងនោះទេនៅក្នុងវិស័យកីឡាតេក្វាន់ដូ ។ នាងកាន់តែមានឈ្មោះល្បីល្បាញទ្វេដងក្រោយឈ្នះមេដាយមេមាសអន្តរជាតិ ។ មកទល់ពេលនេះ ដោយសារភាពល្បីល្បាញក្នុងវិស័យកីឡា ជីវិតឯកជនរបស់នាងក៏ត្រូវបានគេចាប់អារម្មណ៍ផងដែរ ទើបនាងកាន់តែលេចធ្លោ ក្នុងស្រទាប់មហាជន។
៣- ស្រួង ភាវី ៖ គឺជាកីឡាការិនីល្បីល្បាញក្នុងវិស័យស្នូកឃ័រ ។ អ្នកនាងបានធ្វើឱ្យពិភពលោកស្គាល់កម្ពុជានៅក្នុងកីឡានេះ ខណៈដែលអ្នកនាង ក៏ជានារីម្នាក់ដែលជួយឱ្យមហាជនចាប់អារម្មណ៍លើកីឡាស្នូកឃ័រ ក្រោយការបង្កើតឡើង។ ក្រោយមានស្នាដៃ កេរ្តិ៍ឈ្មោះអ្នកនាង ត្រូវបានគេផ្សព្វផ្សាយយ៉ាងសុះសាយ បើទោះជាពេលនេះរាងស្ងប់ស្ងាត់បន្តិច។ អ្នកនាងកើតនៅថ្ងៃទី១២ ខែកញ្ញា ឆ្នាំ១៩៩០ ។ អ្នកនាងបានចាកចេញពីប្រទេសកម្ពុជា ទៅរស់នៅប្រទេសកូរ៉េខាងត្បូងតាំងពីអាយុ២០ឆ្នាំ តាមរយៈស្វាមីដែលជាជនជាតិកូរ៉េ ។
រយៈពេល៧ឆ្នាំនៅលើទឹកដីកូរ៉េ អ្នកនាងបានវិវឌ្ឍខ្លួនក្លាយជាកំពូលកីឡាការិនីផ្នែកស្នូកឃ័រ ដោយសារតែស្វាមីជាអ្នកជំនាញផ្នែកនេះបានបង្រៀនអំពីរបៀបលេង និងតែងនៅជាមួយស្វាមី នៅពេលស្វាមីនាំយកអ្នកជំនាញល្អៗមកបង្ហាត់ ។ អ្នកនាង ស្រួង ភាវី បានចូលរួមប្រកួតប្រជែងកីឡាស្នូកឃ័រដំបូងបំផុតក្នុងប្រទេសកូរ៉េខាងត្បូង កាលពីខែមករា ឆ្នាំ២០១៧ ដោយបានជាប់ចំណាត់ថ្នាក់លេខ ១ និងបានចូលរួមប្រកួតលំដាប់ថ្នាក់ពិភពលោកកាលពីឆ្នាំ២០១៨ ហើយជាប់ចំណាត់ថ្នាក់លេខ៣។
៤- ចូវ សុធារ៉ា ៖ គឺជាអតីតកីឡាការិនីផ្នែកបោកចំបាប់ដ៏ល្បីល្បាញ ដោយអ្នកនាងដណ្ដើមបានមេដាយមាស និងមេដាយប្រាក់ជាច្រើនគ្រឿងពីស៊ីហ្គេម ក្នុងពេលអ្នកនាងនៅប្រឡូកវិស័យកីឡា ។ ក្រោយពេលអ្នកនាងលាឈប់ គេចាប់អារម្មណ៍ថា កីឡាបោកចំបាប់បាត់បង់ការចាប់អារម្មណ៍យ៉ាងខ្លាំង ដោយសារតែកីឡាករកីឡាការិនីជំនាន់ក្រោយស្ងាត់ការទទួលបានមេដាយលើឆាកអន្តរជាតិ ។ អ្នកនាង ចូវ សុធារ៉ា បច្ចុប្បន្នគឺជាគ្រូផ្នែកកីឡានៅវិទ្យាល័យផ្សារដើមថ្កូវ និងបានបោះបង់ការប្រកួតទាំងស្រុង ក្រោយពេលមានប្ដី និងមានកូន។
៥- ហែមថុន វិទិនី ៖ គឺជាកីឡាការិនីហែលទឹកល្បីល្បាញនៅកម្ពុជា បើទោះជានាងមិនទាន់មានស្នាដៃដណ្ដើមបានមេដាយអន្តរជាតិណាមួយនៅឡើយក្ដី ។ កាលណានឹកដល់កីឡាហែលទឹកគេស្គាល់នាងជាងកីឡាករ-កីឡាការិនីឯទៀត។ ស្របពេលដែលនាងស្រស់ស្អាតផង ទើបក្លាយជាតារាស្ពត និងអ្នកតំណាងផលិតផលដែលកាន់តែជួយឱ្យនាងល្បី ។ នាងកើតនៅថ្ងៃទី៧ តុលា ឆ្នាំ១៩៩៣ នៅសង្កាត់ វាលវង់ ខណ្ឌ៧មករា រាជធានីភ្នំពេញ ។
ដោយមានការជួយជ្រោមជ្រែងពីលោកហែម ថុន ដែលជាជីតាបង្កើត មានតួនាទីជាអគ្គលេខាធិការសហព័ន្ធ ខ្មែរកីឡាហែលទឹកស្ម័គ្រចិត្ត និងជាអតីតកីឡាករហែលទឹកផង ទើបនាងត្រូវបានបណ្ដុះឱ្យក្លាយជាអ្នកហែលទឹក ហើយផ្អែកលើសមត្ថភាពផងទើបក្លាយជាកីឡាការិនីជម្រើសជាតិ ។ នាងប្រឡូកហែលទឹកតាំងពីក្នុងឆ្នាំ១៩៩៩ ក្នុងពេលដែល នាងអាយុ៥ឆ្នាំ និងបានជាប់ជម្រើសជាតិក្នុង ឆ្នាំ២០០៣ ។ ក្នុងឆ្នាំ២០០៥ នាងបានបង្ហាញ ខ្លួនក្នុងកម្មវិធីប្រកួតកីឡាហែលទឹក លើកដំបូង នៅថៃ ។ ឆ្នាំ២០០៦បានចេញទៅប្រកួតនៅ ប្រទេសការតា ។
ឆ្នាំ២០០៧ ចេញទៅស៊ីហ្គេម នៅថៃ និងចេញទៅប្រកួតនៅប្រទេសជប៉ុន និងប្រទេសចិន ។ ឆ្នាំ២០០៩ ចេញទៅបី ប្រទេសព្រមគ្នាគឺសិង្ហបុរី ឡាវ និងអ៊ីតាលី ។ ឆ្នាំ២០១០ ចេញទៅទីក្រុងក្វាងចូវ ប្រទេសចិន ក្នុងកម្មវិធីអាស៊ានហ្គេម ៤៥ ប្រទេស និងទៅទីក្រុងឌូបៃដោយទទួលត្រឹមលទ្ធផលមិនខុសមុន។ មកទល់ពេលនេះ នាងនៅតែជាកីឡាការិនីតំណាងជាតិលើឆាកអន្តរជាតិ។
៦- សម ថារ័ត្ន ៖ គឺជាកីឡាការិនីលេចធ្លោផ្នែកល្បុក្កតោ ដោយនាងបានក្លាយជាតំណាងជាតិជារឿយៗ លើឆាកអន្តរជាតិ ។ ភាពល្បីល្បាញរបស់នាង បានជួយឱ្យនាងក្លាយខ្លួនជាតារាសម្ដែងដែលមានទីផ្សារចេញថតជាមួយផលិតករបរទេសរកតែពេលសម្រាកមិនបាននោះផង ។
ប៉ុន្តែនាងនៅតែប្រឡូកក្នុងវិស័យកីឡា ដោយក្រៅពីល្បុក្កតោ នាងក៏ទទួលប្រកួតប្រដាល់ដាក់ទ្រុង ដែលកាន់តែធ្វើឱ្យនាងល្បីល្បាញក្នុងស្រទាប់មហាជន។
៧- នៅ ស្រីពៅ ៖ នាងគ្រាន់តែជាកីឡាការិនីដែលផ្ដើមចេញពីការប្រដាល់នារីនៅទូរទស្សន៍ប៉ុស្តិ៍បាយ័នប៉ុណ្ណោះ ប៉ុន្តែនៅអំឡុងពេលនោះ កេរ្តិ៍ឈ្មោះរបស់នាងនៅមានកម្រិត ។ មកទល់ពេលនេះ ក្រៅពីជាកីឡាការិនីជម្រើសជាតិផ្នែកប្រដាល់សាកលនារី នាងបានក្លាយជាកីឡាការិនីល្បីល្បាញនាំមុខគេនៅក្នុងវិស័យគុនចម្រុះលើឆាកអន្តរជាតិ ដោយនាងបានឡើងប្រកួត ហើយទទួលបានជ័យជម្នះជារឿយៗ ទើបធ្វើឱ្យនាងត្រូវបានអ្នករៀបចំគុនចម្រុះអន្តរជាតិ ទទួលស្គាល់ថាជាកីឡាការិនីឆ្នើមនាំមុខគេនៅក្នុងការប្រកួតគុនចម្រុះ ឬប្រដាល់ដាក់ទ្រុងនាពេលចុងក្រោយ។
៨- វី ស្រីខួច ៖ គឺជាកីឡាការិនីល្បីល្បាញនៅក្នុងវិស័យប្រដាល់ ។ នាងធ្លាប់ទទួលបានខ្សែក្រវាត់អន្តរជាតិមួយនៅក្នុងប្រទេសបារាំងនាពេលកន្លងមក និងធ្លាប់ជាម្ចាស់ពានជើងឯកប្រចាំទូរទស្សន៍បាយ័ន ទើបធ្វើឱ្យនាងល្បីល្បាញជាងគេនៅក្នុងវិស័យប្រដាល់នារី ។ បើទោះជាក្នុងពេលនេះ នៅក្នុងវិស័យប្រដាល់នារី មាន កីឡាការិនី អេ យ៉ានុត កីឡាការិនី នៅ ស្រីពៅ ជាដើម កំពុងតែដណ្ដើមបានភាពលេចធ្លោ តែវី ស្រីខួច នៅតែត្រូវបានមហាជន និងអ្នកគាំទ្រ ទទួលស្គាល់ថាគឺជាកីឡាការិនីល្បីល្បាញ និង មានស្នាដៃជាងគេនៅក្នុងវិស័យប្រដាល់នារី បើទោះជាក្នុងពេលនេះ នាង អេ យ៉ានុត ចាប់ផ្ដើមលោតខ្លាំងជាងបន្តិចក្ដី។
នៅមានកីឡាការិនីមួយចំនួនទៀត ក៏បានលេចធ្លោនៅក្នុងវិស័យកីឡាដែលនាងឈរជើងផងដែរ ដោយគ្រាន់តែភាពលេចធ្លោរបស់ពួកនាង នៅមិនទាន់មានកម្រិតឱ្យមហាជនស្គាល់ច្បាស់ដូចកីឡាការិនីដែលបានរៀបរាប់ខាងលើ និងមិនទាន់មានស្នាដៃនាំមុខដូចគ្នានឹងកីឡាការិនីលេចធ្លោទាំងនោះ ។ កីឡាការិនីមួយចំនួនក៏បង្ហាញអារម្មណ៍សោកស្ដាយផងដែរ ក្រោយសម្រេចចិត្តបាត់មុខព្រោះតែហេតុផលវ័យ និងការរៀបចំគ្រួសារ ហើយចូលរួមប្រកួតលែងកើត ៕
ចែករំលែកព័តមាននេះ