រាជធានីភ្នំពេញ៖ យុវជនមានតួនាទីសំខាន់ ក្នុងការចូលរួមការពារបរិស្ថាន និងធនធានធម្មជាតិ ហើយការ អប់រំបានដើរតួនាទីសំខាន់ ដើម្បីសម្រេចបាននូវចក្ខុវិស័យ បានដាក់ចុះគឺ ធានាឱ្យបាននូវគុណភាព និងនិរន្តរភាព…
រាជធានីភ្នំពេញ៖ យុវជនមានតួនាទីសំខាន់ ក្នុងការចូលរួមការពារបរិស្ថាន និងធនធានធម្មជាតិ ហើយការ អប់រំបានដើរតួនាទីសំខាន់ ដើម្បីសម្រេចបាននូវចក្ខុវិស័យ បានដាក់ចុះគឺ ធានាឱ្យបាននូវគុណភាព និងនិរន្តរភាព បរិស្ថាន និងការពារឱ្យបាននូវកេរដំណែលធនធានធម្មជាតិសម្រាប់ ផលប្រយោជន៍មនុស្ស គ្រប់ៗរូប។ នេះជាការថ្លែងបញ្ជាក់របស់លោក នេត្រ ភត្រា រដ្ឋលេខាធិការ និងជាអ្នកនាំពាក្យក្រសួង បរិស្ថាន នៅក្នុងពិធីបើកវេទិកាយុវជនជជែកពិភាក្សាអំពីបរិស្ថានឆ្នាំ២០២០ ដែលជាវគ្គប្រកួតជម្រុះ នៅក្នុងចំណោមសិស្សានុសិស្សមកពីវិទ្យាល័យចំនួន៨ នៅរាជធានីភ្នំពេញ នៅព្រឹកថ្ងៃទី១ ខែកញ្ញា ឆ្នាំ ២០២០នេះ។
លោក នេត្រ ភត្រា បានថ្លែងថា ដើម្បីសម្រេចបាននូវចក្ខុវិស័យនេះ ក្រសួងបរិស្ថានបាន ដាក់ចុះនូវបេសកកម្មសំខាន់ៗរួមមាន៖ កិច្ចគាំពារបរិស្ថានឱ្យបានល្អប្រសើរ ការពារ និងអភិរក្ស ធនធានធម្មជាតិ និងជីវៈចម្រុះឱ្យបានគង់វង្ស និងការលើកកម្ពស់ការ រស់នៅប្រកបដោយចីរភាព។ សូមជម្រាបថា នេះគឺជាការរៀបចំវេទិកាលើកទី៤ ក្នុងក្របខណ្ឌ នៃវេទិកាយុវជនជជែក ពិភាក្សាអំពីបរិស្ថាន ឆ្នាំ២០២០ ដែលវេទិកាចំនួន៣ដូចគ្នានេះត្រូវបានរៀបចំនៅក្នុងខេត្ត កំពង់ធំ ខេត្តក្រចេះ និងខេត្តស្ទឹងត្រែង។
វេទិកាយុវជនជជែកពិភាក្សាអំពីបរិស្ថានឆ្នាំ២០២០ មានការចូលរួម ពីវិទ្យាល័យចំនួន១៦ មកពីរាជធានីភ្នំពេញចំនួន៨ ខេត្តក្រចេះចំនួន២ ខេត្តស្ទឹងត្រែងចំនួន២ និងខេត្តកំពង់ធំចំនួន ២វិទ្យាល័យ។ លោករដ្ឋលេខាធិការក្រសួងបរិស្ថានបានថ្លែងបញ្ជាក់ថា វេទិកាយុវជនជជែកពិភាក្សា អំពីបរិស្ថាន គឺជាវេទិកាមួយដែលផ្តល់ឱកាស ដល់សិស្សានុសិស្ស និស្សិតនៅតាមគ្រឹះ ស្ថានរដ្ឋ និងឯកជននានាក្នុងប្រទេសកម្ពុជាអាចបញ្ចេញសមត្ថភាព និងសេចក្តីក្លា ហានរបស់ខ្លួនចូលរួមផ្តល់យោបល់ជាមួយរាជរដ្ឋាភិបាល និងសាធារណជនដើម្បីឱ្យពួកគេអាចស្វែង យល់អំពីបញ្ហាបរិស្ថានដែលកំពុងប្រឈមមូលហេតុ និងដំណោះស្រាយឱ្យកាន់តែមាន ប្រសិទ្ធភាព ដោយផ្អែកលើភស្តុតាងវិទ្យាសាស្ត្រទិដ្ឋភាព ជាក់ស្តែងនិងគំនិតច្នៃប្រឌិតថ្មីៗ របស់សិស្សនិស្សិត។
លោក នេត្រ ភក្ត្រា បានឲ្យដឹងទៀតថា វេទិកាយុវជនជជែកពិភាក្សាអំពីបរិស្ថាននេះបាន រៀបចំបានចំនួន៣៩ លើករួចមកហើយចាប់តាំងពីឆ្នាំ ២០០៤ រហូតមកទល់នឹងបច្ចុប្បន្ននេះ ហើយវេទិកានេះ មិនត្រឹមតែជាឱកាសសម្រាប់យុវជនសិក្សាស្រាវជ្រាវ ស្វែងរកទឡ្ហីករណ៍ ថ្មីៗតាមបែបវិទ្យាសាស្ត្រ គាំទ្រគោលជំហររបស់ខ្លួនប៉ុណ្ណោះទេថែមទាំងអាចផ្លាស់ប្តូរចំណេះដឹងទាំងនោះទៅកាន់សាធារណជនទូទៅថែមទៀតផង។ លោកបន្តថា ប្រធានបទសំខាន់ៗដែលបានដាក់ សម្រាប់វេទិកា យុវជនជជែកពិភាក្សាអំពី បរិស្ថានឆ្នាំ២០២០ វគ្គប្រកួតដំបូងនៅរាជធានីភ្នំពេញនៅថ្ងៃទី១ ខែកញ្ញា ឆ្នាំ២០២០ នេះផ្តោត ទៅលើប្រធានបទសំខាន់៖ ១ការអប់រំ និងផ្សព្វផ្សាយបរិស្ថាន គឺជាកត្តាដ៏ជោគជ័យក្នុងការគ្រប់គ្រងធនធានធម្មជាតិឱ្យមាននិរន្តរភាព, ២-កម្ពុជាមានសក្តា នុពលពន្លឺព្រះអាទិត្យយ៉ាង ខ្លាំងសម្រាប់វិស័យថាមពល ត្រូវចាប់យកឱកាសជំរុញការ ប្រើប្រាស់ថាមពលដើរដោយព្រះអាទិត្យ, ៣-ការគ្រប់គ្រងសំរាមគឺជាការទទួលខុស ត្រូវរបស់ប្រជាពលរដ្ឋម្នាក់ៗ និងគ្រួសារ និងទី៤-វិស័យទេសចរណ៍ធម្មជាតិ បានចូលរួម យ៉ាងសំខាន់បំផុតដល់ការអភិរក្សធនធាន ធម្មជាតិ។
លោកក៏ថ្លែងបញ្ជាក់ផងដែរថា ចំពោះក្រុមសិស្សដែលបានទទួលពិន្ទុខ្ពស់ចំនួន៤ ក្រុមនឹងបន្តការប្រកួតក្នុងវគ្គពាក់កណ្តាល ផ្តាច់ព្រ័ត្រ និងវគ្គផ្តាច់ព្រ័ត្រជាមួយសិស្សមកពីវិទ្យាល័យនៅខេត្តកំពង់ធំ ខេត្តក្រចេះ និងខេត្តស្ទឹងត្រែង ដែលនឹងត្រូវរៀបចំឡើងនៅអំឡុង ខែតុលា ឆ្នាំ២០២០ខាងមុខនៅខេត្តព្រះវិហារ។ សូមគូសបញ្ជាក់ថា វេទិកាយុវជនជជែកពិភាក្សាអំពីបរិស្ថានឆ្នាំ២០២០ នេះរៀបចំឡើង ដោយនាយកដ្ឋានអប់រំបរិស្ថាននៃ អគ្គនាយកដ្ឋានចំណេះដឹង និងព័ត៌មានបរិស្ថានដោយ មានការគាំទ្រពីគម្រោងព្រៃឡង់បៃតងរបស់អង្គការ USAID ៕ ដោយ ៖ សុខ សារ៉ាយ
ចែករំលែកព័តមាននេះ