រកឃើញគូស្នេហ៍ប្តីប្រពន្ធ ដែលចាស់ជាងគេបំផុតនៅលើលោក(វីដេអូ)
អេក្វាឌ័រ ៖ លោកតា Julio Ceasar Mora និងភរិយារបស់គាត់ឈ្មោះ Waldramina Maclovia Quinteros…
អេក្វាឌ័រ ៖ លោកតា Julio Ceasar Mora និងភរិយារបស់គាត់ឈ្មោះ Waldramina Maclovia Quinteros បានរៀបការអស់រយៈពេល៧៩ឆ្នាំ ហើយទំនាក់ទំនងស្នេហារបស់ពួកគេ គឺបានក្លាយទៅជាទំនាក់ទំនងយូរជាងគេលើលោក។
លោកតាមានអាយុ១១០ឆ្នាំ ចំណែកលោកយាយវិញមានអាយុ១០៥ឆ្នាំ ហើយនៅខែតុលាខាងមុខនេះ ជាពេលដែលធ្វើឱ្យពួកគាត់ក្លាយជាគូស្វាមីភរិយាចំណាស់ជាងគេបំផុតនៅលើពិភពលោក ដែលមានអាយុរួមគ្នា ២១៤ឆ្នាំ និង ៣៥៨ថ្ងៃ។
Guinness World Records បានបញ្ជាក់ពីកំណត់ត្រានេះ ហើយនិយាយថា ពួកគាត់ក៏ជាគូស្វាមីភរិយាដែលមានអាយុចំណាស់ជាងគេបំផុតនៅលើពិភពលោកផងដែរ។
លោកតា Mora បានកើតនៅថ្ងៃទី១០ ខែមីនា ឆ្នាំ១៩១០ និង លោកយាយ Quinteros កើតនៅថ្ងៃទី១៦ ខែតុលា ឆ្នាំ១៩១៥។ ពួកគាត់បានជួបគ្នាក្នុងវិស្សមកាលសាលារៀន ដោយសារតែប្អូនស្រីរបស់នាងបានរៀបការជាមួយបងប្អូនជីដូនមួយរបស់គាត់។ នេះបើយោងតាមសេចក្តីថ្លែងការណ៍របស់ Guinness World Records ។ បន្ទាប់ពីធ្វើជាសង្សារអស់រយៈពេល ៧ឆ្នាំ ពួកគាត់ក៏បានរៀបការនៅថ្ងៃទី៧ ខែកុម្ភៈ ឆ្នាំ១៩៤១។
នៅក្នុងសេចក្តីថ្លែងការណ៍នោះគូស្នេហ៍បាននិយាយថា៖ «សាមគ្គីភាពក្រុមគ្រួសារស្ថិតនៅក្រោមច្បាប់នៃសេចក្តីស្រឡាញ់ ការគោរពគ្នាទៅវិញទៅមក ស្មោះត្រង់ និងការអប់រំត្រឹមត្រូវ ដោយផ្អែកលើគុណតម្លៃគ្រួសារ គឺជាគន្លឹះក្នុងការរួមរស់ជាមួយគ្នាប្រកបដោយសុខភាពល្អ»។
ពួកគាត់មានកូន ៥នាក់ ដែលពួកគេបានបញ្ចប់មហាវិទ្យាល័យ ហើយមានគ្រួសារធំមួយមានចៅ ១១នាក់ ចៅទួត ២១នាក់ និងចៅលួត ៩នាក់។ កូនប្រុសច្បងរបស់ពួកគេបានបាត់បង់ជីវិតនៅពេលគាត់មានអាយុ ៥៨ឆ្នាំ។ ពួកគេទាំងពីរនាក់ជាគ្រូបង្រៀន រហូតដល់ពួកគេចូលនិវត្តន៍៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ