ខេត្តព្រៃវែង ៖ បើតាមសេចក្តីរាយការណ៍ជាបឋមបានឲ្យដឹងថា កាលពីវេលាម៉ោង៧និង៣ ០នាទីព្រឹក ថ្ងៃទី២១ ខែសីហា ឆ្នាំ២០២០ មានប្រជាពលរដ្ឋបានប្រទះឃើញសាកសពស្ត្រីម្នាក់ដេកបាត់បង់ជីវិតនៅចំណុចប្រឡាយទឹក ស្ថិតភូមិស្វាយតានី ឃុំបឹងព្រះ ស្រុកបាភ្នំ ខេត្តព្រៃវែង រួចប្រជាពលរដ្ឋក៏បានទៅរាយការណ៍ប្រាប់សមត្ថកិច្ចមូលដ្ឋាន បន្ទាប់មកទើបដឹងថា ករណីខាងលើនេះ ជាអំពើឃាតកម្ម ។
សេចក្តីរាយការណ៍បន្តថា ភ្លាមៗនោះ សាកសពស្ត្រីរងគ្រោះត្រូវបានគេស្គាល់ឈ្មោះថា ផង់ អាយុ២៦ឆ្នាំ ជាមនុស្សមិនពេញលក្ខណៈ រស់នៅស្រុកបាភ្នំ ខេត្តព្រៃវែង ។
ក្រោយពេលប្រទះឃើញសាកសពស្ត្រីរងគ្រោះ ម្តាយបង្កើតជនរងគ្រោះអាយុ៦៥ឆ្នាំ បានដាក់ពាក្យបណ្តឹងដល់សមត្ថកិច្ច ដោយបានរៀបរាប់ថា កាលពីម៉ោង៧និង៣០នាទី ថ្ងៃទី១៩ ខែសីហា ឆ្នាំ២០២០ មានបុរសម្នាក់ឈ្មោះ អ៊ីម រត្ន័ ហៅឆ្អឹង អាយុ២០ឆ្នាំ រស់នៅភូមិប្រស្រែ ឃុំបឹងព្រះ ស្រុកបាភ្នំ និងបក្យពួក២នាក់ទៀត បានមកឌុបជនរងគ្រោះ ដោយជិះម៉ូតូ១គ្រឿងចេញពីផ្ទះ រួចឆ្ពោះទៅទិសខាងកើតបាត់ទៅ។
ម្តាយបង្កើតជនរងគ្រោះបន្តថា នៅពេលបុរសទាំង៣នាក់នោះទៅឌុបកូនស្រីគាត់ចេញពីផ្ទះទៅ គាត់ជាម្តាយបានទទឹងមើលផ្លូវកូនពេញ១យប់ បារម្ភខ្លាចកូនមានគ្រោះថ្នាក់ ដោយម្យ៉ាងកូនស្រីគាត់ជាមនុស្សមានសតិមិនគ្រប់គ្រាន់ផង ។
ស្ត្រីជាម្តាយបន្តថា តាំងពីបុរស៣នាក់នោះឌុបកូនគាត់ចេញទៅ គាត់បានខិតខំសាកសួរអ្នកជិតខាង និងដើរស្វែងរកដំណឹងពីកូនស្រីដែរតែមិនឃើញ ស្រាប់តែថ្ងៃទី២១ ខែសីហា ពោលគឺ៣ថ្ងៃក្រោយមក ក៏មានអ្នកស្រុកប្រទះឃើញកូនស្រីគាត់ត្រូវគេវាយសម្លាប់ រួចចោលសាកសពឲ្យនៅអណ្តែតទឹកប្រឡាយតែម្តង ។
ក្រោយពេលប្រជាពលរដ្ឋប្រទះឃើញសាកសពនោះ មន្ត្រីនគរបាលមូលដ្ឋានបានរាយការណ៍ទៅគ្រប់ស្ថាប័នមានសមត្ថកិច្ច ដើម្បីបង្កើតគណៈកម្មការមួយចុះត្រួតពិនិត្យ ។ ពេលនោះសមត្ថកិច្ចបានធ្វើកោសលវិច្ច័យលើសាកសពជនរងគ្រោះ ទើបឃើញមានស្នាមរបួសចំនួន៣កន្លែង គឺ១.ក្រោមភ្នែកខាងស្ដាំ, ២.ចំកញ្ចប់មាត់ និង៣.ចំច្រមុះ ។
បន្ទាប់ពីពិនិត្យរួច ទើបសមត្ថកិច្ចបានធ្វើការសន្និដ្ឋានថា ជនរងគ្រោះបានបាត់បង់ជីវិតដោយសារតែអំពើឃាតកម្ម ។ ក្រោយពេលបញ្ចប់ការត្រួតពិនិត្យរួច សមត្ថកិច្ចបានប្រគល់សាកសពជនរគ្រោះឲ្យទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី ។
ហើយនាថ្ងៃដដែលនេះដែរ សមត្ថកិច្ចក៏បានធ្វើការឃាត់ខ្លួនជនសង្ស័យម្នាក់ឈ្មោះ ហ៊ន ឡុង ភេទប្រុស អាយុ១៨ឆ្នាំ មុខរបរជាកសិករ រស់នៅភូមិស្វាយតានី ឃុំរក្សជ័យ ស្រុកបាភ្នំ ខេត្តព្រៃវែង ក្នុងចំណោមបក្សពួកទាំង៣នាក់នោះ ។ លុះរហូតដល់ម៉ោង៨យប់ ថ្ងៃទី២២ ខែសីហា កម្លាំងសមត្ថកិច្ចជំនាញនគរបាលស្រុកបាភ្នំ ក៏បានមកសហការជាមួយនគរបាលការិយាល័យព្រហ្មទណ្ឌកម្រិតស្រាលក្រសួងមហាផ្ទៃ ឈានដល់ការឃាត់ខ្លួនជនសង្ស័យបានម្នាក់ទៀតឈ្មោះ អ៊ឹម រ័ត្ន ហៅឆ្អឹង ភេទប្រុស អាយុ២០ឆ្នាំ នៅចំណុចបេន ឡានមួយកន្លែង ស្ថិតនៅសង្កាត់វត្តភ្នំ ខណ្ឌដូនពេញ ។ ក្រោយពីឃាត់ខ្លួនជនសង្ស័យរួចត្រូវបានសមត្ថកិច្ចនាំទៅកាន់អធិការដ្ឋាននគរបាលស្រុកបាភ្នំ ដើម្បីកសាងសំណុំរឿង បញ្ជូនទៅកាន់សាលាដំបូងតាមនីតិវិធី៕
ចែករំលែកព័តមាននេះ