ខេត្តកំពង់ធំ ៖ បើតាមសេចក្តីរាយការណ៍បានឱ្យមានដឹងថា បុរសម្នាក់បានចេញពីពីផ្ទះតាំងពីយប់ដោយមិនដឹងទៅណានោះទេ លុះព្រឹកឡើងស្រាប់តែមានគេមកប្រាប់ថា ប្រទះឃើញសពបុរសម្នាក់អណ្តែតទឹកនៅចំណុចបឹងខ្យង បង្កឱ្យមានការភ្ញាក់ផ្អើលកាលពីព្រឹកថ្ងៃទី២០ ខែសីហា ឆ្នាំ២០២០ ស្ថិតក្នុងភូមិចំបក់ខាងជើង ឃុំតាំងក្រសាំង ស្រុកសន្ទុកខេត្តកំពង់ធំ ។
សេចក្តីរាយការណ៍បានឱ្យដឹងថា សពជនរងគ្រោះខាងលើឈ្មោះ ហ៊ុយ មុង ភេទប្រុស អាយុ៤៦ឆ្នាំ មុខរបរកសិករ រស់នៅភូមិសង់ឃ្លាំង ឃុំតាំងក្រសាំងស្រុកសន្ទុក ។
បើតាមការបំភ្លឺរបស់អ្នកស្រី អ៊ឹម ហៀង អាយុ៥២ឆ្នាំ (ត្រូវជាភរិយា) និងឈ្មោះ ហ៊ុយ ថុន ភេទប្រុស អាយុ៥១ឆ្នាំ (ជាបងបង្កើតសព) បានរៀបរាប់ថា ជនរងគ្រោះកើតមានជំងឺសរសៃប្រសាទជាង៤ឆ្នាំកន្លងមកហើយ តែគាត់នៅមានដឹងខុសត្រូវខ្លះៗ ។
ប្រភពដដែលបន្តថា ក្រោយមកនៅថ្ងៃទី១៥ ខែមិថុនា ឆ្នាំ២០២០ កូនស្រីបង្កើតរបស់គាត់បានបាត់បង់ជីវិតដោយសារតែគ្រោះថ្នាក់ចរាចរណ៍ ចាប់តាំអពីពេលនោះមកជំងឺរបស់គាត់ក៏រើឡើងវិញ គឺគាត់ចេះតែដើរចេញពីផ្ទះបាត់ៗបី ឬបួនថ្ងៃ ហើយសាច់ញាតិតាមរកឃើញក៏នាំយកមកផ្ទះជាច្រើនលើកច្រើនសារមកហើយ ។
ប្រភពដដែលបន្តទៀតថា លុះនៅវេលាម៉ោង១រំលងអធ្រាត្រឈានចូលថ្ងៃទី២០ ខែសីហា គេបានឃើញជនរងគ្រោះចុះចេញពីផ្ទះ ហើយស្លៀកតែខោខ្លីដើរទៅទិសខាងលិច ដោយមិនដឹងថា ទៅណានោះទេ រហូតដល់ព្រឹកថ្ងៃទី២០ ខែសីហា ទើបដឹងដំណឹងពីឈ្មោះ ហែម វុន នៅ ភូមិទួលចាន់ ឃុំតាំងក្រសាំង ស្រុកសន្ទុក ប្រាប់ថា ពេលគាត់ទៅមើលមងក៏ប្រទះឃើញសពអណ្តែតទឹកនៅចំណុចកើតហេតុខាងលើ ក្រោយមកក៏បានមកប្រាប់មេភូមិខ្លួន ។
ក្រោយពេលដឹងព័ត៌មានភ្លាម សមត្ថកិច្ចជំនាញក៏បានសហការជាមួយប៉ុស្តិ៍រដ្ឋបាល ក្រុមប្រឹក្សាឃុំ លោកមេភូមិ និងក្រុមគ្រួសារសព ចូលរួមពិនិត្យនៅកន្លែងកើតហេតុ និងសាកសពជនរងគ្រោះឃើញនៅលើដៃខាងស្តាំ និងលើទងត្រចៀកខាងឆ្វេងមានស្នាមដាច់ដោយមច្ឆាក្នុងទឹកស៊ី ក្រៅពីនោះពុំមានស្លាកស្នាមអ្វីគួរឲ្យកត់សម្គាល់ឡើយ។ ក្រោយពីពិនិត្យចប់ សមត្ថកិច្ចក៏បានធ្វើកំណត់ហេតុ រួចប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី។
ចែករំលែកព័តមាននេះ