ខេត្តបាត់ដំបង ៖ ជើងខ្លាំងជិះម៉ូតូដេញគប់ និងកាប់គេ នាពេលយប់ចំនួន២នាក់ ក្នុងចំណោមជាច្រើននាក់ ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល ឃាត់ខ្លួនភា្លមៗ កាលពីវេលាម៉ោង១១និង៣៥នាទីយប់ ថ្ងៃទី១៨…
ខេត្តបាត់ដំបង ៖ ជើងខ្លាំងជិះម៉ូតូដេញគប់ និងកាប់គេ នាពេលយប់ចំនួន២នាក់ ក្នុងចំណោមជាច្រើននាក់ ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាល ឃាត់ខ្លួនភា្លមៗ កាលពីវេលាម៉ោង១១និង៣៥នាទីយប់ ថ្ងៃទី១៨ ខែសីហា ឆ្នាំ២០២០ នៅចំណុចខាងមុខស្ថានីយប្រេងឥន្ធនៈ តូតាល់ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំប នៅពេលដែលជននេះ និងបក្សពួកកំពុងជិះម៉ូតូដេញគប់ និងកាប់ទៅលើយុវជន២នាក់ កំពុងជិះម៉ូតូតាមផ្លូវ។
លោក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានឱ្យដឹងថា ជនសង្ស័យចំនួន២នាក់ដែលកម្លាំងរបស់លោកឃាត់ខ្លួននោះ គឺម្នាក់ឈ្មោះ ណាក ប្រុសប៉ាវ ភេទប្រុស អាយុ២១ឆ្នាំ និងម្នាក់ទៀតឈ្មោះ បេន សំបាន ភេទប្រុស អាយុ២១ឆ្នាំ ពួកគេរស់នៅភូមិចំការសំរោង១ សង្កាត់ចំការសំរោង ក្រុងបាត់ដំបង។ រីឯជនរងគ្រោះម្នាក់ឈ្មោះ រឿម សីលិន ហៅសី ភេទប្រុស អាយុ២៥ឆ្នាំ នៅភូមិព្រែកព្រះស្តេច សង្កាត់ព្រែកព្រះស្តេច ក្រុងក្រុងបាត់ដំបង និងម្នាក់ទៀតឈ្មោះ សើរ សារឿត ហៅជោ ភេទប្រុស អាយុ២១ឆ្នាំ នៅភូមិចំការសំរោង១ សង្កាត់ចំការសំរោង ក្រុងបាត់ដំបង។
លោក ឈឿង គឹមសុង បានប្រាប់ថា ជនដៃដល់ទាំង២នាក់ខាងលើ រួមជាមួយបក្សពួកប៉ុន្មានម៉ូតូទៀត បានកាន់ដុំថ្ម ហើយជិះម៉ូតូដេញតាមគប់ជនរងគ្រោះដែលកំពុងជិះម៉ូតូស្វែងរកទិញទឹកកក បណ្ដាលឱ្យត្រូវចំម៉ូតូបែកអាវ និងបែកម៉ាស៊ីន ។ បន្ទាប់មកពួកជនដៃដល់បានហៅគ្នីគ្នា ដើម្បីតាមដេញកាប់ជនរងគ្រោះទៀត តែប៉ះចំកម្លាំងរបស់លោកកំពុងជិះល្បាត ទើបដេញក្របួចបានជនដៃដល់២នាក់ ជាមួយនឹងកាំបិតសាម៉ូរៃផងដែរ។
នៅពេលនាំទៅដល់ស្នងការខេត្ត ជនទាំង២នាក់ខាងលើបានសារភាពប្រាប់មន្ត្រីជំនាញថា ខ្លួនពិតជាបានដេញគប់ និងដេញកាប់ជនរងគ្រោះមែន ដោយសារធ្លាប់មានគំនុំនឹងគ្នាកន្លងមក។ ប៉ុន្តែជនរងគ្រោះទាំង២នាក់បានបដិសេធថា ពួកខ្លួនមិនធ្លាប់ស្គាល់ក្រុមជនទំនើងទាំងនេះទេ ហើយក៏មិនធ្លាប់មានទំនាស់ជាមួយក្រុមនេះពីពេលណាដែរ។ ជនរងគ្រោះបានបញ្ជាក់ប្រាប់សមត្ថកិច្ចថា នៅពេលកើតហេតុនោះ គឺពួកខ្លួនជិះម៉ូតូស្វែងរកទិញទឹកកក ស្រាប់តែត្រូវក្រុមជនទំនើងជិះតាមគប់នឹងដុំថ្មតែម្ដង តែសំណាងល្អបានប្រទះនឹងសមត្ថកិច្ច បើមិនចឹងទេពួកខ្លួនប្រាកដជាអាសន្នធំហើយ។
លោកឈឿង គឹមសុង បានបញ្ជាក់ដែរថា តាមចម្លើយជនសង្ស័យទាំង២នាក់ ទំនងពួកគេច្រឡំសត្រូវរបស់ខ្លួន ដែលបានដេញវាយពួកគេនាយប់នោះ ដោយឃើញជនរងគ្រោះជិះពេលយប់ស្មានថា ជាសត្រូវរបស់ខ្លួន ទើបជិះដេញគប់តែម្ដង។ មិនតែប៉ុណ្ណោះ ភាគីដៃដល់បានហៅគ្នីគ្នាមានទាំងកាន់ដាវសាម៉ូរៃផង មកដេញកាប់ជនរងគ្រោះទៀត តែសំណាងល្អកម្លាំងរបស់លោកទៅទាន់ ទើបក្របួចបាន២នាក់ ខណៈប៉ុន្មាននាក់ទៀតជិះគេចខ្លួនបាត់។ ហើយពេលនេះ មន្ត្រីជំនាញរបស់លោកកំពុងសួរនាំជនសង្ស័យ ដើម្បីកសាងសំណុំរឿងបញ្ជូនទៅកាន់សាលាដំបូងខេត្តចាត់ការតាមផ្លូវច្បាប់៕
ចែករំលែកព័តមាននេះ