រាជធានីភ្នំពេញ ៖ គណៈជំនាញរដ្ឋសភាបានបើកកិច្ចប្រជុំពិភាក្សាជាមួយក្រសួងទេសចរណ៍ពីករណីធ្លាក់ចុះទេសចរណ៍ក្នុងអំឡុងពេលជំងឺកូវីដ១៩ បានរីករាលដាលលើកសកលលោកក៏ដូចជា ប៉ះពាល់ដល់កម្ពុជា ។
ឯកឧត្តមហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការកិច្ចការសាសនា វប្បធម៌ និងទេសចរណ៍នៃរដ្ឋសភា(គ៧)បានលើកឡើងក្នុងកិច្ចប្រជុំនា ព្រឹកថ្ងៃទី១៣ សីហា ឆ្នាំ២០២០ នៅវិមានរដ្ឋសភាថា កិច្ចប្រជុំនេះ គឺធ្វើឡើងអនុលោមតាម មាត្រា៩៧ នៃរដ្ឋធម្មនុញ្ញ និងប្រការ ៣៤ ថ្មីនៃបទបញ្ជាផ្ទៃក្នុងរដ្ឋសភា ។
ឯកឧត្តមបន្តថា កិច្ចប្រជុំនៅថ្ងៃនេះ ត្រូវបានប្រព្រឹត្តឡើងដោយផ្នែកលើស្ថានភាពជាក់ស្តែង នៃការរីករាលដាលជំងឺកូវីដ១៩ ដែលនាំឱ្យវិស័យទេសចរណ៍កម្ពុជាបាន និងកំពុងរងការប្រឈមដោយអត្រាភ្ញៀវទេសចរជាតិ និងអន្តរជាតិមានការធ្លាក់ចុះដំណើរការអាជីវកម្មទេសចរណ៍មួយចំនួនត្រូវផ្អាកជាបណ្តោះអាសន្នប្រតិបត្តិករក្នុងឧស្សាហកម្មទេសចរណ៍មួយចំនួនកំពុងរងនូវផលប៉ះពាល់ជាបន្តបន្ទាប់ ។
បញ្ហាប្រឈម ដែលបានជួបប្រទះក្នុងវិស័យទេសចរណ៍មិនថា ការរងប៉ះពាល់លើវិស័យទាំងមូល និងការលំបាកនានារបស់ប្រតិបត្តិករក្នុងឧស្សាហកម្មនេះបានជំរុញឱ្យគណៈកម្មការទី៧ ដែលជាសេនាធិការទទួលបន្ទុកលើវិស័យទេសចរណ៍ផ្ទាល់ មានការយកចិត្តទុកដាក់ តាមដាន ពិនិត្យលើសកម្មភាពនានាដែលក្រសួងទេសចរណ៍បាន និងកំពុងអនុវត្ត ហើយឈានដល់ការជួបប្រជុំរវាងគណៈកម្មការទី៧ និងក្រសួងទេសចរណ៍ ដើម្បីពិនិត្យ ពិភាក្សារួមគ្នាអំពីវិធានការជាដំណោះស្រាយចំពោះវិស័យទេសចរណ៍ក្នុងបរិបទកូវីដ១៩ និងក្រោយកូវីដ១៩ ព្រមទាំងការពិនិត្យលទ្ធភាពបង្កើនសកម្មភាពទេសចរណ៍ក្នុងប្រទេសកម្ពុជា ។
ក្នុងកិច្ចប្រជុំ អង្គប្រជុំបានធ្វើការកត់សម្គាល់ថា កន្លងមកជាការឆ្លើយតបនឹងបញ្ហាប្រឈមនានាដែលបង្កដោយវិបត្តិកូវីដ១៩ រាជរដ្ឋាភិបាលកម្ពុជាបានដាក់ចេញជាដំណោះស្រាយជាបន្តបន្ទាប់ ប្រកបដោយស្មារតីទទួលខុសត្រូវខ្ពស់ ដើម្បីកាត់បន្ថយនូវផលប៉ះពាល់លើគ្រប់វិស័យជាជំហានៗ ជាអាទិភាពពីមួយដំណាក់កាលទៅមួយដំណាក់កាល ។
ឯកឧត្តម ហ៊ុន ម៉ានី បានមានប្រសាសន៍ថា ៖ «ក្នុងដំណាក់កាលនេះ ការបង្កើនបរិយា កាសទេសចរណ៍ ដែលគួរអោយទុកចិត្ត និងដោយមានសុវត្ថិភាពពីជំងឺកូវីដ១៩ ព្រមទាំងការ ធានាស្តង់ដានៃការការពារ មើលថែប្រកបដោយការយកចិត្តទុកដាក់ គឺជាកត្តាសំខាន់ក្នុងការជំរុញឧស្សាហកម្មទេសចរណ៍ឱ្យដំណើរការបានជាធម្មតា ក៏ដូចជាការចូលរួមជំរុញកំណើនសេដ្ឋកិច្ចជាតិផងដែរ» ។
ចំណែកឯកឧត្តម ថោង ខុន រដ្ឋមន្ត្រីក្រសួងទេសចរណ៍បានលើកឡើងអំពីផែនការក្នុងវិស័យទេសចរណ៍ក្នុងដំណាក់កាល សម័យកូវីដ១៩ និងក្រោយសម័យកូវីដ ១៩ថា ជំងឺកូវីដ១៩ បានប៉ះពាល់ខ្លាំង ចំពោះទេសចរណ៍អន្តរជាតិតែម្តង ។
ឯកឧត្តមបន្តថា ក្រសួងក៏បានចាត់តាំងក្រុមការងារ ដើម្បីពិនិត្យ ១.ពិនិត្យមើលលើសំ ណូមពរមូលដ្ឋានខាងអាជីវកម្ម ២.ពិនិត្យមើលសំណូពរបុគ្គលិកនិយោជក ៣.ពិនិត្យលើការបណ្តុះបណ្តាលក្នុងដំណាក់កាលកូវីដ១៩ ។
ឯកឧត្តមរដ្ឋមន្ត្រីបន្ថែមថាគិតមកដល់បច្ចុប្បន្ននេះរាជរដ្ឋាភិបាលជួយដល់បុគ្គលិកដែលប៉ះពាល់ការងារដោយសារជំងឺកូវីដ១៩ បានជាង៣ម៉ឺននាក់ហើយនៅក្នុងវិស័យទេសចរណ៍ ដោយផ្តល់ប្រាក់៤០ដុល្លារក្នុងរយៈពេល២ខែ និងផ្តល់បន្តបន្ទាប់ក្នុងរយៈពេល២ខែបន្តទៀត ៕
ចែករំលែកព័តមាននេះ