ខេត្តកំពង់ឆ្នាំង ៖ មនុស្ស២នាក់បានរងរបួស និងម្នាក់ទៀតបានបាត់ខ្លួន ខណៈដែលកាណូតនេសាទអូសជនជនជាតិវៀតណាម២គ្រឿង បុកជាមួយកាណូតបាឡាស្មាច់ជិះគ្នា៣នាក់ កាលពីវេលាម៉ោង៨ និង៣០នាទីយប់ ថ្ងៃទី០៨ កុម្ភៈ ២០១៥ នៅ ចំណុចក្បាលកោះចោរ ភូមិក្រម៉ាល់ ឃុំប្រឡាយមាស ស្រុកកំពង់លែង ។
ទោះយ៉ាងណាជនសង្ស័យជនជាតិវៀតណាមចំនួន២នាក់ រួមទាំងមធ្យោបាយបង្ក និងកម្មករនេសាទជិត១០នាក់ផងត្រូវបានសមត្ថកិច្ចនាំមកកាន់ការិយាល័យចរាចរណ៍ផ្លូវគោក កាលពីវេលាម៉ោង៤ និង៥០នាទីរសៀលថ្ងៃទី៩ កុម្ភៈ ដើម្បីចាត់ការតាមនីតិវិធីច្បាប់។
លោកវរៈសេនីយ៍ទោ ធៀម សុង នាយការិយាល័យនគរបាលចរាចរណ៍ជើងគោកនៃស្នងការនគរបាលខេត្តបានមានប្រសាសន៏ថា ជនរងគ្រោះដែលពេលនេះកំពុងបាត់ខ្លួន និងគ្មានសង្ឃឹមនៅរស់ មានឈ្មោះ អ៊ី ចម្រុង អាយុ១៧ឆ្នាំ និងអ្នករងរបួស២នាក់ទៀតមានឈ្មោះ អ៊ូ តូរ៉ូ អាយុ១៦ឆ្នាំ និងឈ្មោះ ម៉ែន ស្រីណាក់ ភេទស្រី អាយុ១៥ឆ្នាំ ទាំង២នាក់រងរបួសបែកក្បាលដូចគ្នា ។ ជនរងគ្រោះទាំង៣នាក់មានទីលំនៅភូមិក្រម៉ាល់ជាកន្លែងកើតហេតុ ។
លោកប្រធានការិយាល័យបានបន្តមុនពេលកើរហេតុ ជនរងគ្រោះទាំង៣នាក់បានជិះកាណូតបាឡាស្មាច់ទៅមើលម្តាយមីងឈឺដែលកំពុងសម្រាកព្យាបាលនៅមណ្ឌលសុខភាពឃុំប្រឡាយមាស ពេលមកដល់ចំណុចកើតហេតុ ស្រាប់តែត្រូវកាណូតនេសាទអូសជនជនជាតិវៀតណាមបុកពេញទំហឹងក្នុងទិសដៅបញ្ច្រាសគ្នាតែម្តង បណ្តាលជនរងគ្រោះទាំង៣នាក់រងរបួស និងធ្លាក់ចូលទឹកទន្លេ ហើយ២នាក់ក្នុងនោះស្រីម្នាក់បានព្យាយាមហែលទឹកទាំងរងរបួសមកឡើងគោក តែជនរងគ្រោះម្នាក់ទៀតបានបាត់ខ្លួនជាមួយកាណូតបាឡាស្មាច់១គ្រឿងរកពុំទាន់ឃើញនៅឡើយ ។
ក្រោយពេលកើតហេតុភ្លាមៗ អ្នកចំការ និងប្រជាពលរដ្ឋរួមទាំងប្រជាការពារផង ប្រមាណជាង២០កាណូតបាឡាស្មាច់ដែលនៅក្បែនោះបានដេញចាប់កាណូតអូសជនជនជាតិវៀតណាមបានប្រគល់ជូនសមត្ថកិច្ច ។ ជនសង្ស័យដែលត្រូវឃាត់ខ្លួនមាន២នាក់ ម្នាក់ឈ្មោះ ចាំង យ៉ាំងងា អាយុ៤០ឆ្នាំ និងម្នាក់ទៀត ឈ្មោះ ចាំង យ៉ាំងស៊ីវ អាយុ៥០ឆ្នាំ ទាំង២នាក់ស្នាក់នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ។
ជនជាតិវៀតណាមទាំង២នាក់ និងកម្មករនៅលើកាណូតនេសាទអូសជនប្រមាណជិត១០នាក់ រួមទាំងវត្ថុតាងបង្កបទល្មើសចរាចរណ៍ ត្រូវនាំទៅកាន់ការិយាល័យចរាចរណ៏ផ្លូវគោក នៅរសៀលថ្ងៃទី០៩ កុម្ភៈ
ដើម្បីកសាងសំណុំរឿងតាមនីតិវិធីច្បាប់៕
ចែករំលែកព័តមាននេះ