ខេត្តបាត់ដំបង ៖ មន្ត្រីការិយាល័យព្រហ្មទណ្ឌកំរិតធ្ងន់នឹងកសាងសំណុំរឿងបញ្ជូនជនសង្ស័យម្នាក់ទៅប្រគល់ជួនតំណាងអយ្យការអមសាលាដំបូងខេត្ត ចាត់ការតាមនីតិវិធីច្បាប់ នៅរសៀលថ្ងៃទី១២ សីហា នេះ ក្រោយពីត្រូវឃាត់ខ្លួនពីបទ«កាន់កាប់អាវុធដោយខុសច្បាប់»។
មន្ត្រីការិយាល័យព្រហ្មទណ្ឌកំរិតធ្ងន់បានប្រាប់ថា ជនសង្ស័យម្នាក់នោះឈ្មោះ សែម
សុគន្ធា ហៅម៉ាប់ អាយុ៣២ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងបាត់ដំបង។ ជននេះ ត្រូវបានកម្លាំងជំនាញនៃការិយាល័យព្រហ្មកំរិតធ្ងន់តាមឃាត់ខ្លួនបាន កាលពីរសៀលថ្ងៃទី១១ សីហា នៅម្ដុំវត្តបច្ឆា ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ពេលដែលជននេះកំពុងដើរអំពាវនាវស្វែងរកអតិថិជនទិញកាំភ្លើងខ្លីរបស់ខ្លួន ។ មន្ត្រីដដែលបានបញ្ជាក់ថា ក្រោយពីឃាត់ខ្លួនសមត្ថកិច្ចក៏បាននាំជននេះ ទៅកាន់លំនៅឋាន ដើម្បីយកកាំភ្លើងដែលជននេះបានលាក់ទុកនៅឯផ្ទះ។
កាំភ្លើងខ្លីដែលសមត្ថកិច្ចបានដកហូតនោះប្រភេទ«K.59» មានគ្រាប់ចំនួន០៦គ្រាប់។ ជុំវិញការលាក់ទុកនូវអាវុធខ្លីដោយខុសច្បាប់នេះ បើមន្ត្រីជំនាញ ដែលបានស្រង់ចម្លើយបឋមរបស់ជនសង្ស័យឈ្មោះ សែម សុគន្ធា ហៅ ម៉ាប់ នេះបាននិយាយថា កាំភ្លើងខ្លីធុន K.59 នេះ ខ្លួនបានលួចពីមន្ត្រីយោធាម្នាក់ នៅឯស្រុកសំឡូត កាលពីជិត៣ឆ្នាំមុន។ ខ្លួនបានលាក់ទុកនៅក្នុងផ្ទះរហូតមកមិនដែលបានយកប្រើប្រាសទេ។ ប៉ុន្តែពេលនេះដាច់លុយចាយ ទើបខ្លួនសម្រេចអំពាវនាវលក់ តែពេលកំពុងដើរខ្សិបខ្សៀវរកអតិថិជន ក៏ត្រូវសមត្ថកិច្ចឃាត់ខ្លួនល្មម។
មន្ត្រីការិយាល័យកំរិតធ្ងន់ បានប្រាប់ពីប្រវត្តិជនសង្ស័យយ៉ាងដូច្នេះថា «តាមពិត ជនសង្ស័យឈ្មោះ ម៉ាប់ នេះ ជាមុខសញ្ញាចាស់ ដែលធ្លាប់ប្រព្រឹត្តអំពើចោរកម្ម នាពេលកន្លងមក ដែលមន្ត្រីជំនាញ តែងតាមដានសកម្មភាពជននេះគ្រប់ពេលវេលា។ ប៉ុន្តែយ៉ាងណា ជននេះត្រូវបានឃាត់ខ្លួនហើយ ពាក់ព័ន្ធនឹងការកាន់កាប់អាវុធដោយខុសច្បាប់ ហើយពេលនេះត្រូវបានមន្ត្រីំជំនាញកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ