ខេត្តកំពង់ស្ពឺ ៖ និយាយពីរឿងអំពៅ ចាស់ៗតែងតែប្រាប់ថា អំពៅមានច្រើនប្រភេទដូចជាអំពៅខ្មៅ អំពៅប្ញស្សី និងអំពៅទឹកឃ្មុំជាដើម។ អំពៅទាំងនោះសុទ្ធតែមានរសជាតិផ្អែមដូចគ្នា តែអំពៅដែលគេចូលចិត្តជាង
ខេត្តកំពង់ស្ពឺ ៖ និយាយពីរឿងអំពៅ ចាស់ៗតែងតែប្រាប់ថា អំពៅមានច្រើនប្រភេទដូចជាអំពៅខ្មៅ អំពៅប្ញស្សី និងអំពៅទឹកឃ្មុំជាដើម។ អំពៅទាំងនោះសុទ្ធតែមានរសជាតិផ្អែមដូចគ្នា តែអំពៅដែលគេចូលចិត្តជាងគេនៅពេលនេះ គឺអំពៅទឹកឃ្មុំ។
អ្នកដាំអំពៅភាគច្រើនមិនសូវបានហូបទឹករបស់វាប៉ុន្មានទេ ដោយសារថា អ្នកដាំរវល់មើលថែអំពៅឱ្យលូតលាស់ល្អ គឺអ្នកទទួលទិញឯណោះទេ គេយកទៅកិនយកទឹករបស់វាលក់ ឬក៏ចាក់ជាស្ករអំពៅក៏មាន។ បច្ចុប្បន្នប្រជាពលរដ្ឋចូលចិត្តដាំអំពៅច្រើនជាងគេនៅឃុំគិរីវ័ន្ត ស្រុកភ្នំស្រួច។ ការប្រកបរបរដាំអំពៅនេះធ្វើឱ្យជីវភាពរបស់ពួកគាត់មានការរីកចំរើនជាលំដាប់។
បើយើងធ្វើដំណើរតាមបណ្តោយផ្លូវជាតិលេខ៤ទៅដល់ចំណុចផ្សារត្រពាំងក្រឡឹង ស្ថិតក្នុងឃុំគិរីវ័ន្តដែលតំបន់នោះសំបូរទៅដោយចំការអំពៅជាច្រើនដែលមើលទៅឃើញពណ៌បៃតងស្រស់ត្រកាលគួរជាទីចាប់អារម្មណ៍។ ប្រជាពលរដ្ឋនៅតំបន់នោះ ពួកគាត់ដាំអំពៅជាលក្ខណៈគ្រួសារ ដែលនេះជារបរមួយជាប្រចាំរបស់ពួកគាត់ក្រោយពីការធ្វើស្រែរួច ដោយអ្នកខ្លះលើកឡើងថា ការដាំអំពៅបានប្រាក់ចំណូលច្រើនគួរសម ហើយការដាំនេះគឺដាំទៅតាមទំហំដីដែលមានខ្លះតិច ខ្លះច្រើន ដោយម្នាក់ៗដាំជិត១០ឆ្នាំមកហើយ គ្រាន់តែដំបូងបានប្រាក់ចំណូលតិចតួច គឺចាប់ពី២០ទៅ៣០ម៉ឺនរៀលមិនដូចបច្ចុប្បន្ននេះទេ ក្នុងមួយចំការបានចំណូលចាប់ពី២ទៅ៣លានរៀល។
លោកនៅ នឿន អាយុ៤០ឆ្នាំ ជាអ្នកដាំអំពៅម្នាក់ដែរនោះបានរៀបរាប់ថា មុនដំបូងគឺគ្រួសារគាត់ដាំបានទំហំផ្ទៃដីតូចនោះទេ តែក្រោយមកក៏ចេះតែពង្រីកធំឡើងៗតាំងពីកន្លះហិកតារហូតដល់២ហិកតាទៅតាមលទ្ធភាព ហើយក៏ចេះតែកាក់កបរហូតមិនដែលខូចខាតសោះ។ ឆ្នាំនេះគ្រួសារគាត់ដាំអំពៅទឹកឃ្មុំនេះពេញដីតែម្តង ពីរហិកតាគឺបានជាង៧០.០០០ដើមអំពៅបើគិតចាប់តាំងពីដាំរហូតដល់កាប់លក់មានរយៈពេល៧ខែការងារដាំអំពៅនេះ គឺពិបាកហត់នឿយបន្តិចតម្រូវឱ្យអ្នកដែលចង់ដាំត្រូវមានភាពអំណត់ទើបបាន ព្រោះថា អំពៅលូតលាស់ល្អអាស្រ័យលើការថែទាំ ជាពិសេសគឺត្រូវមានទឹកឱ្យគ្រប់គ្រាន់ ដោយដាំម្តងចំណាយដើមទុនប្រមាណជា១១លានរៀល ទាំងនេះគឺចំណាយទៅលើកម្មករ និងទិញជី ក្នុងនោះយើងប្រើជីធម្មជាតិ ដូចជាជីអាចម៍គោ ជីអាចម៍មាន់លាយដីដំបូក ចំណែកទឹកវិញ គឺគេដាក់ក្នុងមួយអាទិត្យម្តងមិនដែលខាននោះទេ។
លោកនៅ នឿន បានបញ្ជាក់ទៀតថា ចាប់តាំងពីដាំរហូតដល់ប្រមូលផល គឺអាចទទួលបានប្រាក់កម្រៃប្រមាណចាប់ពី២០លានទៅ២៥លានរៀល ដោយលក់ក្នុង១បាច់ ៣.៥០០រៀល(១០ដើម) ហើយអ្នកទទួលទិញគឺលក់បន្ត១បាច់៥.០០០រៀល(១០ដើម)។ ការដាំអំពៅនៅយហត់ខ្លាំង តែបានប្រាក់ចំណូលច្រើនគួរសម គឺគ្រាន់បើជាងធ្វើស្រែ បើកុំតែបានដាំអំពៅម្ល៉េះសមគ្រួសារគាត់ជួបប្រទះវិបត្តិសេដ្ឋកិច្ចជាមិនខាន។
អំពៅដែលមានការមើលថែដាក់ជីរ និងទឹកបានគ្រប់គ្រាន់ គឺវាលូតលាស់ល្អដើមធំៗ និងថ្លោស រីឯទឹកវិញមានរសជាតិផ្អែមឆ្ងាញ់។ អំពៅដែលមានការមើលថែបានល្អចាប់ពីមួយគុម្ពមាន៥ដើមទៅ៧ដើមឯណោះពេលខ្លះកាប់លក់ជាដើម ពេលខ្លះលក់ជាបាច់ ប៉ុន្តែការលក់ជាដើមចំណេញជាងលក់បាច់ ព្រោះលក់បាច់ ១បាច់មាន១០ដើម តម្លៃ៣.៥០០រៀល រីឯលក់ដើម១ដើម៥០០រៀល៕
ចែករំលែកព័តមាននេះ