រាជធានីភ្នំពេញ ៖ លោក ឃួង ស្រេង អភិបាលរាជធានី ណែនាំដល់មន្ទីរជំនាញ ត្រូវលុបបំបាត់កន្លែងលក់ហ្គាសអាណាធិបតេយ្យ អោយអស់ ក្នុងភូមិសាស្ត្ររាជធានីភ្នំពេញ…
រាជធានីភ្នំពេញ ៖ លោក ឃួង ស្រេង អភិបាលរាជធានី ណែនាំដល់មន្ទីរជំនាញ ត្រូវលុបបំបាត់កន្លែងលក់ហ្គាសអាណាធិបតេយ្យ អោយអស់ ក្នុងភូមិសាស្ត្ររាជធានីភ្នំពេញ ដើម្បីកាត់បន្ថយហានិភ័យគ្រោះថ្នាក់របស់ប្រជាពលរដ្ឋ ។
ក្នុងកិច្ចប្រជុំក្រុមប្រឹក្សារាជធានីភ្នំពេញ នៅព្រឹកថ្ងៃទី៦ ខែសីហានេះ លោក ឃួង ស្រេង អភិបាលរាជធានីភ្នំពេញ បានណែនាំឲ្យមន្ទីរជំនាញពាក់ព័ន្ធ ត្រូវសហការគ្នា ជាមួយនឹងអាជ្ញាធរខណ្ឌទាំង១៤ ដើម្បីចុះត្រួតពិនិត្យកន្លែងលក់ហ្គាសនានា ស្វែងយល់ពីទិដ្ឋភាពច្បាប់ សម្ភារៈបច្ចេកទេសស្តង់ដារ និងឧបករណ៍ការពារ ដើម្បីធានាថា អាជីវកម្មនេះគ្មានផលរំខាន ឬបង្កគ្រោះថ្នាក់ដល់ប្រជាពលរដ្ឋនិង បរិស្ថាន ។
លោកបានបញ្ជាក់ថា បច្ចុប្បន្ននេះ នៅរាជធានីភ្នំពេញ មានកន្លែងលក់ហ្គាស និងបញ្ជូលហ្គាសជាច្រើន ហើយកន្លែងខ្លះគ្មានស្តង់ដារបច្ចេកទេស បើប្រាស់ធុងហ្គាសចាស់ៗ គ្មានគុណភាព ឬធុងស្តើង ដែលងាយបង្កហានិភ័យ គ្រោះថ្នាក់ទាំងអ្នកបញ្ជូល និងអ្នកប្រើប្រាស់ ។
លោក ឃួង ស្រេង ក៏បានអំពាវនាវដល់ក្រុមអាជីវករលក់ហ្គាសទាំងអស់ ត្រូវបញ្ឈប់ការទិញធុងហ្គាសចាស់ៗ ពីប្រទេសដ៏ទៃ ហើយយកមកបាញ់ថ្នាំ ដើម្បីប្រើប្រាស់បន្ត ដែលនេះ គឺជាហានិភ័យគ្រោះថ្នាក់ខ្ពស់ អាចបង្កអោយផ្ទុះធុងហ្គាស និងអគ្គិភ័យឆាប់ឆេះផ្ទះសម្បែងជាដើម ។
លោកបញ្ជាក់ថា យើងឃើញថា នៅរាជធានីភ្នំពេញសព្វថ្ងៃនេះ កន្លែងលក់ហ្គាស ពុំមែនតែកន្លែងលក់ហ្គាសទេ គឺមានទាំងផលិតហ្គាសថែមទៀត ព្រោះពេលចុះទៅកន្លែងផ្ទុះហ្គាស គឺឃើញថ្មស្អុយ ដែលជាសារធាតុផលិតហ្គាស ។ កិច្ចការងារនេះ គឺជាសន្តិសុខសុវត្ថិភាពប្រជាពលរដ្ឋនៅមូលដ្ឋាន ហើយបើកាលណាបង្ក អោយមានកន្លែងលក់ហ្គាសអានាធិបតេយ្យ កាន់តែច្រើន ហានិភ័យកាន់តែខ្ពស់ចំពោះយើង ហើយយើង ពិបាករថយន្តដែលទៅសង្គ្រោះ ក៏មានការចង្អៀត ដោយសារបញ្ហាចរាចរណ៍ ដែលចំណុចនេះ ត្រូវតែយកចិត្តទុកដាក់អោយបានខ្ពស់ ។
ចំណែក លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ ក៏បានមានប្រសាសន៍ថា បញ្ហាហ្គាស ឬការលក់សាំងដបនៅតាមចិញ្ចើមផ្លូវ ឬផ្ទះលក់ដូរគ្រឿងទេស ជាបញ្ហាប្រឈមផ្នែកសុវត្ថិភាព ដោយត្រូវ បង្កើនការយកចិត្តទុកដាក់ លុបបំបាត់ឲ្យខាងតែបាន ខណៈដែលអគ្គិភ័យនានា ដែលកើតឡើងនៅរាជ ធានីភ្នំពេញ កន្លងមកនេះ ភាគច្រើនបណ្តាលមកពីការផ្ទុះធុងហ្គាស ដែលគ្មានបច្ចេកទេស ៕
ចែករំលែកព័តមាននេះ