ខេត្តបាត់ដំបង៖ ត្រាក់ទ័រមួយគ្រឿងបានដាច់ខ្លួនជា២កំណាត់ រីឯអ្នកបើកបរដាច់ជើងឆ្វេងម្ខាង នៅពេលបើកភ្ជួរដីចំការកិនប៉ះចំមីនតោនដែលកប់នៅក្នុងដី វេលាម៉ោង២រសៀលថ្ងៃទី២៧ កក្កដា នេះ នៅក្នុងភូមិតាគ្រក់ ឃុំត្រែង ស្រុករតនមណ្ឌល។
មន្ត្រីកងរាជអាវុធហត្ថបានរាយការណ៏៍ថា ជនរងគ្រោះ ឈ្មោះ ប៉ាក់ រិទ្ធ ភេទប្រុស អាយុ៣៥ឆ្នាំ រស់នៅភូមិ-ឃុំ កើតហេតុខាងលើ។ ជនរងគ្រោះបាន បើកទ្រាក់ទរ័ភ្ជួរដីនៅក្នុងចំការស្វាយ ហើយបានកិនប៉ះចំគ្រាប់មីនតោន ដែលកប់ក្នុងដីក៏បណ្ដាលឱ្យផ្ទុះតែម្ដង។ មន្ត្រីដដែលបានបញ្ជាក់ថា អ្នកបើកបរត្រាក់ទ័របានរងរបួសដាច់ជើងឆ្វេងម្ខាង រីឯត្រាក់ទ័របានដាច់ជា២កំណាត់ ហើយត្រូវបានក្រុមគ្រួសារនិងអាជ្ញាធរដឹកទៅសង្គ្រោះនៅមន្ទីរពេទ្យភ្លាមៗដែរ។
បើតាមប្រភពនៅកន្លែងកើតហេតុបានឱ្យដឹងថា ទីកន្លែងដែលផ្ទុះគ្រាប់មីនប្រឆាំងរថក្រោះនោះ គឺជាដីដែលធ្លាប់ភ្ជួររាល់ឆ្នាំ ហើយក៏មានដាំដំណាំស្វាយច្រើនឆ្នាំមកហើយ។ ប្រភពបានបញ្ជាក់ថា ជនរងគ្រោះតែងបានភ្ជួរដីចំការដំណាំស្វាយនោះ ជារៀងរាល់ឆ្នាំតែមិនដែលមានជួបប្រទះគ្រាប់មីនទេ លុះពេលភ្ជួរលើកនេះក៏ចំគ្រាប់មីនតោនផ្ទុះបង្កគ្រោះថ្នាក់ធ្ងន់ធ្ងរតែម្ដង។
សូមរំលឹកថា កន្លងមក នៅក្នុងភូមិសាស្ត្រនានា ក្នុងភូមិតាគ្រក់ ឃុំត្រែង ខាងលើនេះធ្លាប់មានប្រជាពលរដ្ឋជួបគ្រោះថ្នាក់ដោយសារគ្រាប់មីនតោន ដែលកប់ក្នុងដីសេសសល់ពីសម័យសង្គ្រាមជាបន្តបន្ទាប់។ ជាពិសេស ត្រាក់ទ័រភ្ជួរដីចំការតែម្ដង នៅពេលចុះភ្ជួរដីចំការម្ដងៗ បើទោះជាដីចំការនោះធ្លាប់ចុះភ្ជួររាល់ឆ្នាំក្ដី ។ បើតាមអាជ្ញាធរបាននិយាយថា ទីតាំងផ្ទុះគ្រាប់មីនភាគច្រើនជាដីចំការដែលធ្លាប់ភ្ជួរ តែពេលភ្ជួរនៅរដូវភ្លៀងដីស្លុះទើបអាចប៉ះគ្រាប់មីន ខណ:គ្រាប់មីនខ្លះត្រូវបានគេកប់ជ្រៅ។
ប៉ុន្តែយ៉ាងណា អាជ្ញាធរ និង មន្ត្រីជំនាញតែងអំពាវនាវជារឿយៗដល់ប្រជាពលរដ្ឋឲ្យមានការប្រុងប្រយ័ត្នចំពោះទីតាំងណាមួយដែលសង្ស័យថា អាចនៅមានសេសសល់គ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទ។ ហើយត្រូវរាយការណ៍ដល់អាជ្ញាធរដែនដី ឬ មន្ត្រីជំនាញ ដើម្បីជួយអន្តរាគមន៍ ចៀសវាងការគ្រោះថ្នាក់ដែលកើតឡើងដោយយថាហេតុ៕
ចែករំលែកព័តមាននេះ