ខេត្តស្វាយរៀង ៖ កាលពីព្រឹកថ្ងៃទី២៤ ខែកក្កដា ឆ្នាំ២០២០ លោក ហែម ពិសិដ្ឋ អភិបាលរងខេត្ត ទទួលបន្ទុកដោះស្រាយវិវាទដីធ្លីបានដឹកនាំកម្លាំងគណៈកម្មការចម្រុះមាន អង្គភាពពាក់័ពន្ធខេត្ត ក្រុង សង្កាត់ ដោយមានការចូលរួមពីសំណាក់លោក សុវណ្ណ មន្នី អភិបាលរងក្រុងបាវិត ចុះណែនាំផ្សព្វផ្សាយព្រមធ្វើការរុះរើរបងដែលប្រជាពលរដ្ឋនៅសង្កាត់ព្រៃអង្គញ់សង្កាត់ច្រកម្ទេស និងជនចំណាកស្រុកឆ្ងាយ មកហ៊ុមព័ទ្ធរំលោភយកដីចំណីព្រែកបឹងក្វាង ព្រមទាំងធ្វើរបងព័ទ្ធយកដីដោយខុសច្បាប់ជាច្រើនគ្រួសារ ដោយមានអ្នកមានអំណាចខ្លះនិងមេខ្យល់លួចនៅពីក្រោយខ្នង ។
បើតាមលោកហែម ពិសិដ្ឋ អភិបាលរងខេត្តមានប្រសាសន៍ថា ដោយមានបទបញ្ជាពីឯកឧត្តមអភិបាលខេត្ត ឲ្យរូបលោកដឹកនាំមន្ត្រីជំនាញអង្គភាពពាក់ព័ន្ធចុះផ្សព្វផ្សាយ អប់រំណែនាំ និងធ្វើការរុះរើរបងដែលបងប្អូនប្រជាពលរដ្ឋ ក៏ដូចជាជនចំណាកស្រុករំលោភយកដីរបស់រដ្ឋដោយធ្វើរបងហ៊ុមព័ទ្ធយកដីចំណីព្រែកបឹងក្វាងទៅធ្វើជាកម្មសិទ្ធិយ៉ាងអនាធិបតេយ្យ ដោយប្រើវិធីសាស្ត្រយកពឹសបង្ក្រាបពឹស ។
លោកបន្តថា គណៈកម្មការចុះពិនិត្យនៅព្រែកបឹងក្វាង គឺធ្វើការអប់រំផ្សព្វផ្សាយដល់បងប្អូនប្រជាពលរដ្ឋដែលបានរំលោភយកដីព្រែកបឹងក្វាង ដោយមានការសាងសង់ផ្ទះ ធ្វើរបងព័ទ្ធយកដីចំណីព្រែកបឹងក្វាង ឲ្យពួកគាត់បញ្ឈប់ជាបន្ទាន់ការរំលោភយកដីព្រែកបឹងក្វាងជាដីរបស់រដ្ឋនេះទុកជាសម្បត្តិរដ្ឋវិញ ។
លោក ហែម ពិសិដ្ឋ បានឲ្យដឹងទៀតថា ការចុះរុះរើរបងនេះ ធ្វើតែចំពោះបងប្អូនជនចំណាកស្រុកដែលរំលោភយកដី និងធ្វើរបងយកដីបឹងក្វាងថ្មីៗនោះទេ ឯចំពោះបងប្អូនប្រជាពលរដ្ឋដែលមករស់នៅយូរហើយគឺឲ្យពួកគាត់រស់នៅបន្តសិនចុះ ។
បន្ទាប់ពីប្រជុំដាក់ផែនការរួចមក លោកអភិបាលរងខេត្ត បានដឹកនាំគណៈកម្មការចម្រុះចុះដល់ទីតាំងព្រែកបឹងក្វាង ធ្វើការសាកសួរបងប្អូនក្នុងស្រុក ក៏ដូចជាជនចំណាកស្រុកមកពីបណ្តាខេត្តឆ្ងាយៗ ភាគច្រើនគឺពួកគាត់ជឿតាមការញុះញង់របស់មេខ្យល់ថា មានអាជ្ញាធរសង្កាត់ព្រៃអង្គញ់ចែកដីឲ្យប្រជាពលរដ្ឋក្រីក្រមករស់នៅលើដីចំណីបឹងក្វាង ទើបពួកគាត់នាំគ្នាមកបោះទីតាំងធ្វើខ្ទម ធ្វើរបងហ៊ុមព័ទ្ធចាប់ដីបឹងក្វាងនេះ។
ជាមួយនេះ មានមនុស្សម្នាក់ដែលគេអះអាងប្រាប់ប្រជាពលរដ្ឋថា គេមានឋានៈជាឯកឧត្តម ហើយបានឲ្យទាំងប្រាក់មកទិញដីពីអ្នករស់នៅក្នុងសង្កាត់ព្រៃអង្គញ់នេះ ហើយមានអ្នកខ្លះគេ
ជួលឲ្យមកចាំដីឲ្យមេខ្យល់ជាថ្នូរយកលុយ ។
ក្នុងឱកាសនោះ លោក ហែម ពិសិដ្ឋ បានណែនាំទៅដល់បងប្អូនប្រជាពលរដ្ឋ ក៏ដូចជាជន
ចំណាកស្រុកនិងមេខ្យល់ សូមបញ្ឈប់ការដើរឃោសនាថាគេចែកដីរដ្ឋទៅឲប្រជាពលរដ្ឋក្រីក្រនិងសូមបញ្ឈប់ការមកចាប់ដីចំណីព្រែក ចំណីបឹងក្វាង ដែលជាដីរបស់រដ្ឋ គឺរដ្ឋទុកសម្រាប់បម្រើផលប្រយោជន៍ទូទៅ គឺស្តារស្តុកទឹកសម្រាប់ប្រជាកសិករប្រើប្រាស់ប្រកបមុខរបរកសិកម្ម ។ ចំពោះរបងនិងសំណង់ដែលបងប្អូននិងជនចំណាកស្រុកធ្វើរំលោភយកដីរបស់រដ្ឋនោះ អាជ្ញាធរបានធ្វើការរុះរើនិងបន្តរុះរើនៅពេលក្រោយ ដោយមិនឲ្យមានអ្នកណាម្នាក់មករំលោភយកដីរបស់រដ្ឋយ៉ាងអនាធិបតេយ្យបន្តទៀតទេ ។
ក្នុងនាមអាជ្ញាធរគ្រប់លំដាប់ថ្នាក់ លោកសូមអំពាវនាវដល់បងប្អូនប្រជាពលរដ្ឋ ក៏ដូចជាជនចំណាកស្រុក សូមបញ្ឈប់ការទន្ទ្រានយកដីរដ្ឋបន្តទៀត នាំឲ្យខាតពេលវេលាក្នុងការបំពេញ
ការងាររកស៊ីចិញ្ចឹមគ្រួសារ ព្រោះដីរដ្ឋនៅតែជាដីរបស់រដ្ឋដដែល ។ សូមឲ្យមេខ្យល់បញ្ឈប់
ការឃោសនានាំប្រជាពលរដ្ឋមករំលោភយកដីរបស់រដ្ឋបន្តទៀត បើសិនជានៅតែដឹកនាំប្រជាពលរដ្ឋមករំលោភយកដីរដ្ឋបន្ត នោះអាជ្ញាធរនឹងមានវិធានការទៅតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ