ខេត្តកំពត ៖ នៅព្រឹកថ្ងៃសៅរ៍ ៥កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៥ ខែកក្កដា…
ខេត្តកំពត ៖ នៅព្រឹកថ្ងៃសៅរ៍ ៥កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៥ ខែកក្កដា ឆ្នាំ២០២០ គណបក្សប្រជាជនកម្ពុជា ខេត្តកំពត បានបើកកិច្ចប្រជុំបូកសរុបលទ្ធផលការងារឆមាសទី១ លើកទិសដៅការងារឆមាសទី២ ឆ្នាំ២០២០ និងប្រជុំជីវភាពរបស់គណៈកម្មាធិការគណបក្សខេត្តកំពត ក្រោមអធិបតីភាព ឯកឧត្ដមបណ្ឌិត ប៉ែន ស៊ីម៉ន សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តកំពត ដោយមានអញ្ជើញចូលរួមមាន ៖
សមាជិក សមាជិកា ព្រឹទ្ធសភា រដ្ឋសភា ចំនួន០៦រូប ឯកឧត្តម ជាវ តាយ សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តកំពត និងឯកឧត្តម ជឹង ផល្លា អនុប្រធានគណ:កម្មាធិការគណបក្សខេត្ត និងជាប្រធានគណៈប្រចាំការនៃគណៈអចិន្ត្រៃយ៍គណបក្សប្រជាជនកម្ពុជាខេត្តកំពត ព្រមទាំងមានការអញ្ជើញចូលរួមពី ឯកឧត្តម លោកជំទាវ ក្រុមការងារគណបក្សចុះមូលដ្ឋានខេត្តកំពត និងជាប្រធានក្រុមការងារគណបក្សចុះមូលដ្ឋានតាមបណ្តាក្រុងស្រុកទាំង៨ រួមរួមជាមួយ ៖
ឯកឧត្តម លោកជំទាវ លោក លោកស្រី ជាសមាជិក សមាជិកា គណៈអចិន្ត្រៃយ៍ សមាជិក សមាជិកា គណៈកម្មាធិការគណបក្សខេត្ត លោក លោកស្រី ដែលជាប្រធានគណៈកម្មាធិការគណបក្សមូលដ្ឋាន មន្ទីរអង្គភាពជុំវិញខេត្ត លោក លោកស្រី ជាប្រធានគណៈកម្មាធិការគណបក្សឃុំ-សង្កាត់ និងសមាជិក សមាជិកា គណបក្សប្រជាជនកម្ពុជា សរុបចំនួនប្រមាណជាង ៣០០រូប ។
ក្រោយពីបានស្តាប់របាយការណ៍ស្វាគមន៍ របស់ឯកឧត្តម ជាវ តាយ ប្រធានគណៈកម្មាធិការគណបក្សខេត្ត និងសេចក្តីព្រាងរបាយការណ៍សង្ខេបស្តីពីលទ្ធផលការងារគណបក្សឆមាសទី១ និងលើកទិសដៅបន្តឆមាសទី២ ឆ្នាំ២០២០ របស់គណៈកម្មាធិការគណបក្សខេត្ត ដែលអានដោយលោក ដួង សាវណ្ណ សមាជិកអចិន្ត្រៃយ៍គណៈកម្មាធិការគណបក្សខេត្ត និងជាប្រធានមន្ទីរគណបក្សខេត្តរួចមក ឯកឧត្ដមបណ្ឌិត ប៉ែន ស៊ីម៉ន បានមានមតិសំណេះសំណាល ដោយផ្តោតសំខាន់លើការងាររបស់គណៈកម្មាធិការគណបក្សខេត្តសម្រាប់ឆមាសទី១ ដែលសម្រេចបាន និងកោតសរសើរចំពោះការអនុវត្តការងាររបស់គណបក្សប្រជាជនកម្ពុជាខេត្តកំពត ដែលមានឯកឧត្តម លោកជំទាវ លោក លោកស្រី សមាជិក សមាជិកាក្រុមការងារគណបក្សចុះមូលដ្ឋានខេត្ត ក្រុងស្រុកចុះតាមមូលដ្ឋានសរុប ៥៥៥លើក ថ្នាក់កណ្តាល ២២៥ លើក ថ្នាក់ខេត្ត ៣៣០លើក និងថ្នាក់ដឹកនាំក្រុមការងារមិនមែនក្រុមការងារគណបក្សចុះមូលដ្ឋានខេត្តក្រុងស្រុក ១៤លើក ព្រមទាំងលើកទឹកចិត្តអោយអនុវត្តន៍បន្តសម្រាប់ឆមាសទី២ អោយបានល្អប្រសើរជាងនេះទៀត ត្រូវពង្រឹងពង្រីក គ្រប់រចនាសម្ព័ន្ធចាត់តាំង បញ្ជ្រាបយុវជន ជាកម្លាំងពិតទៅគ្រប់រចនាសម្ព័ន្ធដែលជាថ្នាលបន្តវេនទៅថ្ងៃអនាគត និងពង្រីកបញ្ជូលសមាជិកបក្សពិសេសយុវជន យុវតីអោយបានច្រើនថែមទៀត ។
ជាមួយគ្នានោះដែរ ឯកឧត្ដមបណ្ឌិត ប៉ែន ស៊ីម៉ន ក៏បានផ្តាំផ្ញើអោយសមាជិកគណបក្សប្រជាជនកម្ពុជា ខេត្តកំពត ទាំងអស់ក្នុងការអនុវត្តន៍ការងារគណបក្ស ផ្តោតលើគោលការចំនួនបីគឺ ៖ នយោបាយ ចាត់តាំង និងសតិអារម្មណ៍ ដើម្បីទទួលបានជោគជ័យជូនគណបក្ស គ្រប់ដំណាក់កាលបោះឆ្នោតទាំងអស់ និងសូមចូលរួមផ្សព្វផ្សាយពីផលប៉ះពាល់ នៃការរីករាលដាលនៃជម្ងឺកូវីដ-១៩ ដោយចូលរួមអនុវត្តន៍ទាំងអស់គ្នា តាមវិធានការការពាររបស់ក្រសួងសុខាភិបាល ដែលបានណែនាំកន្លងមក។
ឯកឧត្ដមបណ្ឌិតបានបញ្ជាក់បន្ថែមទៀតថា ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា តែងតែគិតគូដល់ការលំបាករបស់ប្រជាពលរដ្ឋក្រីក្រ ជាពិសេសក្នុងដំណាក់កាលកូវិដ-១៩ នេះ បានផ្តល់សាច់ប្រាក់ជូនប្រជាពលរដ្ឋដែលជួបការខ្វះខាត តាមរយៈការកំណត់អត្តសញ្ញាណកម្មគ្រួសារក្រីក្រ និងសូមអោយអាជ្ញាធរដែលពាក់ព័ន្ធទាំងអស់ត្រូវយកចិត្តទុកដាក់ និងកំណត់អត្តសញ្ញាណកម្មគ្រួសារក្រីក្រអោយបានត្រឹមត្រូវ និងមានតម្លាភាព។
ចែករំលែកព័តមាននេះ