រាជធានីភ្នំពេញ ៖ រដ្ឋបាលរាជធានីភ្នំពេញ បានចាត់តាំងឱ្យរដ្ឋបាលខណ្ឌ៧មករា និងការិយាល័យជំនាញផ្នែកសំណង់ចុះពិនិត្យ និងណែនាំដល់ម្ចាស់សំណង់ទល់មុខអគារ BS ខណ្ឌ៧មករា រួចហើយ ពាក់ព័ន្ធនឹងករណីធ្វេសប្រហែសធ្វើឱ្យធ្លាក់បំណែកផ្ទាំងស៊ីម៉ង់ត៍មួយដុំធំ…
រាជធានីភ្នំពេញ ៖ រដ្ឋបាលរាជធានីភ្នំពេញ បានចាត់តាំងឱ្យរដ្ឋបាលខណ្ឌ៧មករា និងការិយាល័យជំនាញផ្នែកសំណង់ចុះពិនិត្យ និងណែនាំដល់ម្ចាស់សំណង់ទល់មុខអគារ BS ខណ្ឌ៧មករា រួចហើយ ពាក់ព័ន្ធនឹងករណីធ្វេសប្រហែសធ្វើឱ្យធ្លាក់បំណែកផ្ទាំងស៊ីម៉ង់ត៍មួយដុំធំ ត្រូវរថយន្តមួយគ្រឿងនោះ ។
ក្រោយពីបានទទួលដំណឹងអំពីករណីធ្លាក់ថ្មចេញពីការដ្ឋានជួសជុលផ្ទះនៅចំណុចកែងវិថីព្រះមុនីវង្ស និងវិថីកម្ពុជាក្រោមនេះ ស្ថិតនៅទល់មុខអគារ BS ខណ្ឌ៧មករា រាជធានីភ្នំពេញ អាជ្ញាធរបានចុះដោះស្រាយ ដោយណែនាំឱ្យម្ចាស់សំណង់រៀបចំប្រព័ន្ធសុវត្ថិភាពបន្ថែមទៀត ធ្វើយ៉ាងណាកុំឱ្យមានហេតុការណ៍បែបនេះកើតឡើងទៀត ។
ដោយឡែកនៅរសៀល ថ្ងៃទី២៤ ខែកក្កដា ឆ្នាំ២០២០នេះ មានករណីធ្លាក់បំណែកថ្ម១ដុំធំ ចេញពីការដ្ឋានជួសជុលផ្ទះមួយកន្លែង ស្ថិតនៅទល់មុខអគារ BS ខណ្ឌ៧មករា បណ្តាលឱ្យត្រូវរថយន្តមួយគ្រឿង ដែលចត់នៅខាងក្រោមនេះ ខូចខាតយ៉ាងដំណំ តែសំណាងល្អការធ្លាក់ថ្មនេះ ពុំបានធ្វើឱ្យមនុស្សណាម្នាក់រងគ្រោះឡើយ។
សូមបញ្ជាក់ ៖ កាលពីខែមីនា កន្លងមក ឆ្នាំ២០១៩ រដ្ឋបាលរាជធានីភ្នំពេញ ក៏បានចេញសេចក្តីដំណឹងអំពីស្ថានភាពនៃភាពចាស់ទ្រុធទ្រោម នៃសំណង់អគារទាំងនោះ ដោយសារតែកន្លងមកមិនមានការថែទាំ និងជួសជុលឱ្យបានល្អប្រសើរឡើងវិញ ។
រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋដែលរស់នៅក្នុងអគារ និងក្រោមអគារឱ្យបង្កើនការប្រុងប្រយ័ត្នឱ្យបានខ្ពស់ ចំពោះអគារចំណាស់ ដែលភាគច្រើនសង់នៅអំឡុងឆ្នាំ១៩៥០ ដើម្បីបញ្ចៀសបាននូវឧប្បទ្ទហេតុដែលអាចកើតឡើងជាយថាហេតុ ៕
ចែករំលែកព័តមាននេះ