ខេត្តសៀមរាប ៖ មន្ត្រីជំនាញអភិរក្សព្រៃឈើអះអាងថា ៖ អនុផលព្រៃឈើវានឹងប្រាកដកើតឡើងយ៉ាងសម្បូរបែប សម្រាប់ទ្រទ្រង់ជីវភាពប្រជាសហគមន៍ និងក្លាយជាតំបន់ដ៏មានសក្តានុពលសម្រាប់ការពង្រីកវិស័យទេសចរណ៍នៅកម្ពុជា ។ នេះបើយោងតាមទូរទស្សន៍ជាតិកម្ពុជាចេញផ្សាយនាថ្ងៃទី២៥ ខែកក្កដានេះ…
ខេត្តសៀមរាប ៖ មន្ត្រីជំនាញអភិរក្សព្រៃឈើអះអាងថា ៖ អនុផលព្រៃឈើវានឹងប្រាកដកើតឡើងយ៉ាងសម្បូរបែប សម្រាប់ទ្រទ្រង់ជីវភាពប្រជាសហគមន៍ និងក្លាយជាតំបន់ដ៏មានសក្តានុពលសម្រាប់ការពង្រីកវិស័យទេសចរណ៍នៅកម្ពុជា ។ នេះបើយោងតាមទូរទស្សន៍ជាតិកម្ពុជាចេញផ្សាយនាថ្ងៃទី២៥ ខែកក្កដានេះ ។
អនុផលព្រៃឈើនៅក្នុងតំបន់ព្រៃពូជក្រញូងកន្ទួតខ្នារក្រៅ ក្នុងដែនភូមិសាស្ត្រស្រុកស្វាយលើ និងស្រុកបន្ទាយស្រីនៃខេត្តសៀមរាប នៅក្នុងខែកក្កដានេះបាន និងកំពុងបង្ហាញផលផ្សិតក្ងោក ផ្សិតទន្សោង និងមានផ្សិតកញ្ចូផងដែរ ហើយប្រភេទផ្សិតទាំងនេះ និងបន្តឲ្យផលរហូតដល់ចុងខែសីហាខាងមុខ បន្ទាប់ពីក្នុងតំបន់ព្រៃមួយនេះ កាលពីក្នុងមេសាកន្លងមក និងក្នុងពេលធ្លាក់ភ្ញៀងដំបូងបានផ្តល់ផលផ្សិតប៉ក់ និងការលូតលាស់ស្លឹកព្រិចប្រភេទបន្លែព្រៃ សម្រាប់ប្រជាពលរដ្ឋរស់នៅជុំវិញតំបន់នោះបានអាស្រ័យផល តាមរដូវកាលជារៀងរាល់ឆ្នាំ ។
លោក សេង លន នាយសង្កាត់រដ្ឋបាលព្រៃឈើកន្ទួតខ្នារក្រៅបានឲ្យដឹងយ៉ាងដូច្នេះ នាព្រឹកថ្ងៃទី២៤ ខែកក្កដា ឆ្នាំ២០២០នេះ ក្នុងពេលដែលលោកកំពុងស្ថិតនៅជាមួយក្រុមប្រជាពលរដ្ឋប្រមាណជា៣០នាក់ កំពុងដកផ្សិតទាំងនោះ ។ លោកបានបញ្ជាក់ឲ្យដឹងដែរថា ដោយសារតែតំបន់នេះជាតំបន់ព្រៃត្រូវការពារ ដូច្នេះបងប្អូនប្រជាពលរដ្ឋដែលចូលមកប្រមូលផលផ្សិតទាំងនេះ គឺត្រូវទទួលបានការអនុញ្ញាតិត្រឹមត្រូវ និងត្រូវទទួលបាននូវការការពារសុវត្ថិភាពពីក្រុមឆ្មាំការពារព្រៃផងដែរ ។
លោកថា កិច្ចការអភិរក្ស និងថែរក្សាព្រៃឈើ វាច្បាស់ណាស់ អនុផលព្រៃឈើដ៏សម្បូរបែប វានឹងប្រាកដកើតឡើង និងជួយដល់ជីវភាពប្រជាពលរដ្ឋនៅតំបន់នេះ ។
ប្រជាពលរដ្ឋដែលបានចូលមកប្រមូលផលផ្សិតនៅក្នុងព្រៃនោះ ពួកគេក្នុងម្នាក់ៗ អាចដកផ្សិតបានពី៥ ដល់ ១០គីឡូក្រាមតាមស្ថានភាពជាក់ស្តែង ព្រោះការប្រទះឃើញផ្សិតនៅក្នុងព្រៃនេះ វាផ្អែកទៅលើរបបទឹកភ្លៀងផងដែរ ។ ពួកគាត់និយាយដូចៗគ្នាថា ៖ បើសិនជារកផ្សិតបានតិចគឺទុកសម្រាប់ហូបក្នុងគ្រួសារ ហើយបើរកបានច្រើនគឺទុកសម្រាប់ហូបខ្លះ និងសម្រាប់លក់ខ្លះ ។ ការនិយាយឲ្យដឹងយ៉ាងដូច្នេះ គឺចង់បង្ហាញក្នុងន័យថា វាពុំមែនដោយសារតែភាពក្រីក្របង្ខំឲ្យពួកគាត់មកបេះផ្សិតនោះទេ តែជាប្រពៃណីប្រចាំរដូវ ដែលពួកគាត់ត្រូវចូលមកប្រមូលផលនៅក្នុងព្រៃនេះ។
យ៉ាងណាក៏ដោយ អនុផលព្រៃឈើបានជួយទ្រទ្រង់ជីវភាពគ្រួសាររបស់ពួកគាត់ ហើយពួកគាត់ក៏ទទួលស្គាល់ដែរថា មិនបំផ្លាញព្រៃឈើ ទើបទទួលផលយ៉ាងដូច្នេះ៕
ចែករំលែកព័តមាននេះ