ADផ្ទាំងផ្សព្វផ្សាយពាណិជ្ជកម្ម

Picture

ជំនួយការ​លោកស្នងការ​រង​ម្នាក់​កំពុង​បង្កើត​បទល្មើស​ពេញ​ក្រុង ​

3 ឆ្នាំ មុន
  • បាត់ដំបង

ខេត្តបាត់ដំបង​ ៖ បុរស​ម្នាក់​ដែល​អ្នក​បាត់ដំបង និង​មន្ត្រី​ភាគច្រើន​មិន​ធ្លាប់​ស្គាល់​មុខ និង​​ប្រវត្តិ​ច្បាស់លាស់ ពេល​នេះ ​ជន​នេះ​បាន​និង​កំពុង​ដើរ​គាបសង្កត់ បង្ខំ​ឲ្យ​ម្ចាស់​ទីតាំង​ល្បែង​ហ្គេ​ម​នានា ដែល​ជ្រក​ក្រោម​ស្លាក​អ៊ីនធើរណេត​នៅ​ក្នុង​ក្រុង​បាត់ដំបង រួម​ទាំង​ទី​តាំង​ល្បែង​កន្ទុយលេខ​មួយ​ចំនួន​ផង…

ខេត្តបាត់ដំបង​ ៖ បុរស​ម្នាក់​ដែល​អ្នក​បាត់ដំបង និង​មន្ត្រី​ភាគច្រើន​មិន​ធ្លាប់​ស្គាល់​មុខ និង​​ប្រវត្តិ​ច្បាស់លាស់ ពេល​នេះ ​ជន​នេះ​បាន​និង​កំពុង​ដើរ​គាបសង្កត់ បង្ខំ​ឲ្យ​ម្ចាស់​ទីតាំង​ល្បែង​ហ្គេ​ម​នានា ដែល​ជ្រក​ក្រោម​ស្លាក​អ៊ីនធើរណេត​នៅ​ក្នុង​ក្រុង​បាត់ដំបង រួម​ទាំង​ទី​តាំង​ល្បែង​កន្ទុយលេខ​មួយ​ចំនួន​ផង បង់ប្រាក់​សំណូក​ប្រចាំខែ​ឲ្យ​ខ្លួន ដែល​ជន​នេះ​ អួត​អាង​ប្រាប់​គេឯង​ថា «ខ្លួន​ជា​មន្ត្រី​នគរបាល​នៅ​ការិយាល័យ​ព្រហ្មទណ្ឌ​កំរិត​ធ្ងន់ និង ជា​ជំនួយការ​លោក លឹ​ម ពុ​ទ្ធី​ឡា ស្នងការ​រង​ខេត្តបាត់ដំបង​។

គេ​មិន​បាន​ស្គាល់ឈ្មោះ​បុរស​នោះ​ពិតប្រាកដ​ទេ គ្រាន់តែ​គេ​ស្គាល់​ត្រឹម​​ឈ្មោះ វី​រៈ ។ មន្ត្រី​​នានា ដែល​ទើប​ស្គាល់​បុរស​នេះ​ព្រាល​ៗ បាន​បង្ហើប​ប្រាប់​កោះសន្តិភាព​ថា គេ​ឃើញ​​ឈ្មោះ វី​រៈ នេះ ​បើករថយន្ត​ឲ្យ​លោក​លឹ​ម ពុ​ទ្ធី​ឡា ស្នងការ​រង​ទ​ទូល​ផែន​ព្រហ្ម​ទណ្ឌនៃ​ស្នងការ​ខេត្ត​ ។ ប៉ុន្តែ​មាន​គេ​អះអាង​ថា ឈ្មោះ វី​រៈ នេះ ជា​មន្ត្រី​កងរាជអាវុធហត្ថ ដែល​ត្រៀម​ផ្ទេរ​ឈ្មោះ​មក ​ធ្វើ​ជា​មន្ត្រី​នគរបាល នៅ​ស្នងការ​ខេត្ត តាមរយៈលោក លឹ​ម ពុ​ទ្ធី​ឡា ដែល​ធ្លាប់​មាន​ប្រវត្តិ ជា​មន្ត្រី​កងរាជអាវុធហត្ថ​ជាមួយ​គ្នា​។

ប្រភព​បាន​ប្រាប់​ថា ជាង​មួយ​ខែ​ចុង​ក្រោយ​នេះ គេ​តែង​ឃើញ​វត្តមាន​ឈ្មោះ វី​រៈ នេះ បើករថយន្ត​ឲ្យ​លោក លឹ​ម ពុ​ទ្ធី​ឡា ចេញចូល​ស្នងការ​ខេត្ត និង ពេល​ខ្លះ​ ចេះ​ចាត់ចែង​ការងារ​ជំនួស​លោកស្នងការ​រង​រូប​នេះ​ផង​ ។ ពាក្យ​ចចាម​អា​រ៉ា​ម​នានា បាន​លេចឮ​ពាស​ពេញ​ស្នងការ​ខេត្ត ដែល​ខ្សឹប​ត​ៗ​គ្នា​ថា លោក លឹ​ម ពុ​ទ្ធី​ឡា បាន​សណ្ដោង​ឈ្មោះ វី​រៈ នេះ​មក​នៅ​ក្បែរ ដើម្បី​បើកឡាន​ឲ្យ​លោក​ផង និង ជា​អ្នក​ជួយ​ដើរ​ចំណូល​រក​សេដ្ឋកិច្ច​ពី​បទល្មើស​ឲ្យ​លោក​ផង​។

បើ​ពិនិត្យ​លើ​សកម្មភាព​ជាក់ស្ដែង​របស់​ឈ្មោះ វី​រៈ នេះ និង​ស្ដាប់​តាម​ពាក្យច​ចាម​អា​រ៉ា​ម​នានា ហាក់ដូចជា​សមរម្យ​ដែរ​ ។ ព្រោះ​ប៉ុន្មាន​ថ្ងៃ​ចុង​ក្រោយ​នេះ គេ​ឃើញ​ឈ្មោះ វី​រៈ នេះ​បាន​បង្ក​ព្យុះ​ភ្លៀង​យ៉ាង​ខ្លាំង ពាក់ព័ន្ធ​នឹង​សកម្មភាព​ដើរ​ប្រព្រឹត្ត​បទល្មើស លើ​បទល្មើស​។ បើ​តាម​ប្រភព​ពី​ពលរដ្ឋ​មួយ​ចំនួន​បាន​និយាយ​ថា ប៉ុន្មាន​ថ្ងៃ​កន្លង​ទៅ​នេះ ឈ្មោះ វី​រៈ បាន​ជិះ​ម៉ូតូ​ចូល​តាម​ទីតាំង​ល្បែង​ហ្គេ​ម​នានា ដែល​ជ្រក​ក្រោម​ស្លាក «​អ៊ីនធើរណេត​​» នៅ​ក្នុង​ក្រុង​បាត់ដំបង ដើម្បី​បង្ខំ​ឲ្យ​ម្ចាស់​ទីតាំង​បង់ប្រាក់​សំណូក​ប្រចាំខែ​ ។ បុរស​នេះ​បាន​អួត​ប្រាប់​ម្ចាស់​បទល្មើស​នានា​ថា ខ្លួន​ជា «​មន្ត្រី​នគរបាល​ការិយាល័យ​ព្រហ្មទណ្ឌ​កំរិត​ធ្ងន់​»​។ មិនតែប៉ុណ្ណោះ ​ជន​នេះ​បាន​ប្រើ​ពាក្យ​គំរាម និង​សំឡុត បង្ខំ​ទាមទារ​ឲ្យ​ម្ចាស់​ទីតាំង​បង់ប្រាក់​សំណូក​ប្រចាំខែជូនមេ​របស់​ខ្លួន ក្នុង​១​ខែ​ចំនួន​១០០​ដុល្លារ សម្រាប់​ទី​តាំង​ល្បែង​ហ្គេ​ម​មួយ​កន្លែង​។

ជុំវិញ​ការ​អះអាង​របស់​ឈ្មោះ វី​រៈ នេះ​ ដែល​ថា ខ្លួន​ជា​មន្ត្រី​ការិយាល័យ​កំរិត​ធ្ងន់ ប្រធាន​ការិយាល័យ​នេះ លោក អូន ហ្វៃ បាន​បញ្ជាក់​ប្រាប់​កោះសន្តិភាព នៅ​ព្រឹក​ថ្ងៃ​ទី​២៣ កក្កដា​ថា « ប៉ុន្មាន​ថ្ងៃ​កន្លង​ទៅ​នេះ ខ្ញុំ​ក៏​ទ​ទួល​បាន​ព័​ត៌​មាន​នេះ​ដែរ ដែល​ថា មាន​មន្ត្រី​ការិយាល័យ​កំរិត​ធ្ងន់ ដើរ​យក​លុយ​នៅ​តាម​ទីតាំង​ហ្គេ​ម តែ​ខ្ញុំ​មិន​ទាន់​ដឹង​ថា មន្ត្រី​មួយ​ណា​ទេ តែ​ពេល​នេះ ​ខ្ញុំកំពុងធ្វើការ​ស្រាវជ្រាវ​រកមុខ​ជន​នោះ​ហើយ​» ​។ លោក​អូន ហ្វៃ បាន​បន្ថែម​ថា រាប់​សិប​ឆ្នាំ​ហើយ ការិយាល័យ​ព្រហ្មទណ្ឌ​កំរិត​ធ្ងន់ គ្មាន​ប្រវត្តិ មាន​មន្ត្រី​ដើរ​យក​លុយ​តាម​ទីតាំង​ល្បែង​ទេ ហើយ​លោក​ក៏​គ្មាន​ផែនការ​ឲ្យ​មន្ត្រី​រូប​ណា​ប្រព្រឹត្ត​បែប​នេះ​ដែរ​។

កោះសន្តិភាព មិន​ទាន់​អាច​ទំនាក់ទំនង​សុំ​ការ​បំភ្លឺ​ពី​បុរស​ឈ្មោះ វី​រៈ នោះ​ បាន​នៅ​ឡើយ​ទេ នៅ​ព្រឹក​ថ្ងៃ​ទី​២៣ កក្កដា នេះ​។ ដោយឡែក លោក លឹ​ម ពុ​ទ្ធី​ឡា ស្នងការ​រង​ខេត្តបាន​បដិសេធ ចំពោះ​ការ​ចោទប្រកាន់​ទៅ​លើ​ឈ្មោះ វី​រៈ ពាក់ព័ន្ធ​នឹង​ការ​ប្រព្រឹត្ត​បទល្មើស​នានា ហើយ​ភ្ជាប់​ទៅ​ជា​រូប​មួយ​លោក​។ ប៉ុន្តែ​លោកស្នងការ​រង​រូប​នេះ បាន​
ទទួល​ស្គាល់​ថា «​ឈ្មោះ វី​រៈ នេះ​ ពិតជា​តៃកុង​ឡាន​របស់​លោក ហើយ​ក៏​ជា​ជំនួយការ​របស់​លោក​ដែរ​»​។ លោក លឹ​ម ពុ​ទ្ធី​ឡា បាន​អះអាង ប្រាប់​កោះសន្តិភាព​ថា ឈ្មោះ វី​រៈ ត្រូវ​បាន​ផ្លាស​ចេញពី​អង្គភាព​កងរាជអាវុធហត្ថ មក​ជា​មន្ត្រី​នគរបាល នៅ​ស្នងការ​ខេត្តបាត់ដំបង ជាមួយ​រូប​លោក​ហើយ ដោយ​មាន​ចំណារ​ត្រឹម​ត្រូវ​ពី​ក្រសួងមហាផ្ទៃ​ទៀត​ផង​។

លោក​បាន​ពន្យល់​ថា ឈ្មោះ វី​រៈ ត្រូវ​បា​នប​ញ្ចូល​​ឈ្មោះ​នៅ​ការិយាល័យ​ព្រហ្ម​កំរិត​ស្រាល នៃ​ស្នងការ​ខេត្ត តែ​ដោយសារ​តែ​មិន​ទាន់​មាន​តួ​នាទី​អ្វី​ច្បាស់លាស់ ទើប​ស្នង​ការ​ខេត្ត មិន​ទាន់​ប្រកាស​ជា​ផ្លូវការ​ ។ បច្ចុប្បន្ន លោក​បាន​ឲ្យ​ឈ្មោះ វី​រៈ ធ្វើ​ជា​ជំនួយការ​របស់​លោក​ជា​បណ្ដោះអាសន្ន​ ។ នៅ​ពេល​សួរ​បញ្ជាក់​ថា មានការ​និយាយ​ត​ៗ​គ្នា​ថា​ឈ្មោះ វី​រៈ នេះ​ នៅ​ជា​មន្ត្រី​កង​រាជ​អាវុធ​នៅឡើយ តែ​ត្រូវ​លោក​នាំ​មក​នៅ​ជាមួយ ដើម្បី​ជួយ​រក​សេដ្ឋកិច្ច​ឲ្យ​លោក តើ​រឿង​នេះ​ពិត​ឬទេ ?

លោក លឹ​ម ពុ​ទ្ធី​ឡា ហាក់​រារែក​បន្តិច​ក្នុង​ការ​ផ្ដល់​ចម្លើយ តែ​លោក​បាន​បញ្ជាក់​ថា « វី​រៈ មានឈ្មោះ​ក្នុង​ក្របខណ្ឌ​ប៉ូលិស​ហើយ តែ​មិន​ទាន់​ប្រកាស់​។ ចំពោះ​រឿង​ដើរ​រក​សេដ្ឋកិច្ច​ឲ្យ​ខ្ញុំ មិនមែន​ទេ ​។ គាត់​គ្រាន់តែ​ដើរ​ស្រង់​ចំនួន​ទីតាំង​បទល្មើស ដើម្បី​ងាយ​គ្រប់​គ្រង់ តែ​ខ្ញុំ​មិន​បាន​ឲ្យ​ដើរទា​រប្រាក់​ប្រចាំខែ​អី​ទេ ប៉ុន្តែ​ខ្ញុំ​នឹង​សួរនាំ​អំពី​រឿង​នេះ​»​។

កោះសន្តិភាព បាន​ទ​ទូល​ព័​ត៏​មាន​ជា​ច្រើន​ពាក់ព័ន្ធ​នឹង​រឿង​ជំនួយការ​លោកស្នងការ​រង ដើរ​គាបសង្កត់​ទា​ប្រាក់​ពី​តាម​ទីតាំង​បទល្មើស​ខាងលើ​នេះ រួម​ទាំង​ទីតាំង​កត់​កន្ទុយ​លេខ​​ផង កាលពី​ថ្ងៃ​ទី​២២ កក្កដា ហើយ​ថែម​ទាំង​ទ​ទូល​បាន​នូវ​រូបភាព ដែល​ឈ្មោះ វី​រៈ បាន​ដើរ​ធ្វើ​សកម្មភាព​តាម​ទីតាំង​ល្បែង​ហ្គេ​ម​នានា នៅ​ក្នុង​ក្រុង​បាត់ដំបង​ផង​ ។ពិត​មែន តែ​លោក លឹ​ម ពុ​ទ្ធី​ឡា ស្នងការ​រង បាន​ព្យាយាម​ឆ្លើយ ដើម្បី​ជួយ​ដោះ​បន្ទុក​ចំពោះ​ទ​ង្វើ​មិន​គប្បី​របស់​លោក វី​រៈ ជំនួយការ​ផ្ទាល់​របស់​លោក​។ ប៉ុន្តែ​ព័​ត៌​មាន​នានា ដែល​កោះ​សន្តិភាព​ទ​ទួល​​បាន​ពី​ម្ចាស់​ទីតាំង បាន​បញ្ជាក់​ថា ឈ្មោះ វី​រៈ នោះ បាន​បង្គាប់​ឲ្យ​ម្ចាស់​ទីតាំង​នានា ទៅ​ជួប​លោក លឹ​ម ពុ​ទ្ធី​ឡា ផ្ទាល់​ដើម្បី​ច​ចារ​រឿង​នេះ​។

ដំបូង​ឈ្មោះ វី​រៈ នេះ​ បាន​ទាមទា​ឲ្យ​ម្ចាស់​ទីតាំង​បង់​សំណូក​ចំនួន​៣០០​ដុល្លារ ក្នុង​មួយ​ខែ តែ​ដោយសារ​តឹងតែង​ពេក ទើប​បន្ធូរបន្ថយ​នៅ​ត្រឹម​​១០០​ដុល្លារវិញ​ក្នុង​មួយ​ខែ សម្រាប់​ទីតាំង​មួយ​កន្លែង​ ។ ប្រភព​បាន​បញ្ជាក់​ថា ម្ចាស់​ទីតាំង​ខ្លះ​ ក៏​បាន​បង់​រួចរាល់​ហើយ ខណៈ​ម្ចាស់​ទីតាំង​ខ្លះ កំពុង​ពិចារណា ដោយសារ​ពួក​គេ​មិន​ធ្លាប់​ស្គាល់​មុខ​ឈ្មោះ​វី​រៈ នេះ និង​មិន​ស្គាល់​ប្រវត្តិ​។ ប៉ុន្តែ​បុរស​នេះ​ បាន​បង្គាប់​ឲ្យ​ម្ចាស់​ទីតាំង​ទាំងនោះ​ទៅ​ជួប​លោកស្នងការ​រង​ផ្ទាល់ នៅ​កន្លែង​ណាមួយ​ដែល​បាំង​ពី​ភ្នែក​អ្នក​ដទៃ​។

យ៉ាងណា​ក៏​ដោយ គេ​មិន​ទាន់​ដឹង​ថា តើ​ករណី​នេះ លោក​អ៊ុ​ច សុ​ខុន ស្នងការ​ខេត្ត បាន​ជ្រាប​ដែរ​ឬ​យ៉ាងណា​នោះ​ទេ ខណៈ​មន្ត្រី​នានា ក្នុង​ស្នងការ​ខេត្ត បាន​ខ្សឹប​ខ្សៀវ​កេះ​ប្រាប់​គ្នីគ្នា​យ៉ាង​កក្រើក ?

បើ​តាម​ការ​កត់សម្គាល់​បទល្មើស បាន​កើត​លើ​បទល្មើស ដែល​បង្ក​ដោយ​តៃកុង​រថយន្ត និង ជា​ជំនួយការ​ផ្ទាល់​របស់​លោក លឹ​ម ពុ​ទ្ធី​ឡា ស្នងការ​រង​ខេត្ត ដែល​ទើប​ចូល​កាន់​តំណែង​ថ្មី​ខាងលើ​នេះ គឺ បាន​កើតឡើង​ស្រប​ពេល ដែល​«​អំពើ​ចោរកម្ម​»​នានា បាន​ផ្ទុះ​ឡើង​ស្ទើរ​គ្រប់​ទីកន្លែង​ដែរ​។ បទល្មើស​ដែល​កំពុង​ផ្ទុះ​ឡើយ​យ៉ាង​គ​គ្លើ​ន​ពេល​នេះ ដូច​ជា «​ចោរឆក់ ចោរ​លូច ចោរ​កាច់​សោ​ម៉ូតូ និង​ចោរ​គាស់​លំនៅ​ឋាន​លួច​ទ្រព្យសម្បត្តិ​» ឥឡូវ​ត្រូវ​លោក​ជំនួយការ​ខាងលើ​បន្ថែម​បទល្មើស​ឲ្យ​កាន់តែ​ធ្ងន់​ទៀត​។

រីឯ​វិធានការ​ទប់ស្កាត់ ឬ បង្ក្រាប របស់​សមត្ថកិច្ច ហាក់​គ្មាន​ប្រសិទ្ធភាព​ឡើយ បើ​ទោះ​ជា​ស្នងការ​ខេត្ត​នេះ មាន​លោកស្នងការ​រង​ទ​ទួល​ផែន​ព្រហ្មទណ្ឌ​រហូត​ដល់​ទៅ​២​រូប​ក្ដី​។ ផ្ទុយ​ទៅ​វិញ មន្ត្រី​ខិលខូច​មួយ​ចំនួន បែរជា​នាំ​គ្នា​ប្រឹង​ឃុប​ឃិ​ត​បង្កើត​ឲ្យ​មាន​បទល្មើស​ទ្វេ​ដង ព្រោះតែ​ផល​ប្រ​យោ​ជ​ន៍។ លោកស្នងការ​ខេត្ត គួរតែ​ចាត់វិធានការ​ឲ្យ​មាន​ប្រសិទ្ធភាព ចំពោះ​ករណី​ខាងលើ​នេះ ដើម្បី​ចៀសវាង​ធ្វើ​ឲ្យ​ប៉ះពាល់​ដល់​មន្ត្រី​នានា​ដែល​មិន​បាន​ធ្វើ​ខុស និង​ប៉ះពាល់​ដល់​កិត្តិយស​របស់​អង្គភាព​ស្នងការ​ទាំងមូល ​៕

អត្ថបទសរសេរ ដោយ