ចប់បាត់! ទាល់ធ្លាក់ដែក​ត្រូវ​ចំ​ក្បាល​​​មនុស្ស ទើប​បែក​រឿង


រាជធានី​ភ្នំពេញ ៖ ទាល់តែ​ធ្លាក់​ដែក​ត្រូវ​បុរស​វ័យ​ចំណាស់​ម្នាក់​បែកក្បាល ទើប​បែក ធ្លាយ​រឿង​ការដ្ឋានសំណង់​អគារ​ខុន​ដូ UK ក្បែរ​មន្ទីរពេទ្យ​មិត្តភាព​ខ្មែរ​-​សូ​វៀត កំពុង​តែ​លួច​សាងសង់​ឡើង​ដោយ​ខុសច្បាប់ ។

ហេតុការណ៍​ធ្លាក់​ដែក​ចំ​ក្បាល​បុរស​វ័យ​៦១​ឆ្នាំ​ម្នាក់ បណ្ដាល​ឱ្យ​បែកក្បាល​ហូរ​ឈាម​ស្រោច​ពេញ​ខ្លួន​រង​របួសធ្ងន់ ខណៈ​ដែល​រូប​គាត់​កំពុង​ជិះ​ម៉ូតូ​មួយ​គ្រឿង​ដឹក​ពូក​តាម​ផ្លូវ ក៏​ស្រាប់តែ​មាន​ដែក​ជ្រុង​មួយ​ដើម ប្រវែង​ជិត​៣​ម៉ែត្រ​ធ្លាក់​ពី​ជាន់​ទី​១៩ នៃ​ការដ្ឋាន​សំណង់​អគារ​ខុន​ដូ UK (​អតីត​៩៩៩) ក្បែរ​មន្ទីរពេទ្យ​មិត្តភាព​ខ្មែរ​-​សូ​វៀត ដោយ​បែក​ទាំង​មួក​សុ​វត្តិភាព​ដែល​គាត់​ពាក់​ផង​ដែរ ។ ប្រសិនបើ​គ្មាន​វិញ អាច​នឹង​មាន​គ្រោះថ្នាក់​ដល់​អាយុជីវិត​មិន​ខាន​ឡើយ ។

ការដ្ឋាន​សំណង់​អគារ​ខុន​ដូ UK នេះ ត្រូវ​ខាង​សាលា​រាជធានី​ភ្នំពេញ បាន​បិទ​ការ​សាងសង់​អស់​រយៈពេល​ជា​យូរ​មក​ហើយ តែ​ម្ចាស់​មិន​បញ្ឈប់​តាម​ការ​បិទ​នោះ​ឡើយ នៅ​តែ​ល្មើស​បន្តសកម្មភាព រហូត​ដល់​កើត​មាន​ករណី​ធ្លាក់​ដែក​លើ​អ្នកដំណើរ​តាម​ផ្លូវ​ទើប​ដឹង​ថា ម្ចាស់​វា​នៅ​លួច​សាងសង់​នៅឡើយ ហើយ​អាជ្ញាធរ​ចុះ​មក​បិទ​សា​ជា​ថ្មី​ម្តងទៀត ។

ហេតុការណ៍​នេះ បាន​កើតឡើង​នៅ​វេលា​ម៉ោង​៤​និង​២០​នាទី​រសៀល ថ្ងៃ​ទី​២០ ខែកក្កដា ឆ្នាំ​២០២០ នៅ​ចំណុច​ការដ្ឋាន​សំណង់​អគារ​ខុន​ដូ UK (​អតីត​៩៩៩) ផ្លូវ​លេខ​២៧១ កែង​ផ្លូវ​១៨៧ (​ខាងកើត​មន្ទីរពេទ្យ​មិត្តភាព​ខ្មែរ​-​សូ​វៀត​) ក្នុង​សង្កាត់​ទំនប់​ទឹក ខណ្ឌ​បឹង​កេងកង ។

តាម​ប្រភព​ព័ត៌មាន​ពី​នគរបាល​បាន​ប្រាប់​ឱ្យ​ដឹង​ថា បុរស​រង​គ្រោះ​មានឈ្មោះ ឈិ​ត សុភាព អាយុ​៦១​ឆ្នាំ ជា​អនុប្រធាន​ភូមិ​ទួល​រកា​ទី​១​ដែល​មាន​ទីលំនៅ​ផ្ទះ​លេខ​២៣F ផ្លូវជាតិ​លេខ​២ ក្នុង​សង្កាត់​ទួល​រកា​ទី​១ សង្កាត់​ចាក់​អង្រែ​ក្រោម ខណ្ឌមានជ័យ ។ មុន​ពេល​កើតហេតុ បុរស​វ័យ​ចំណាស់​ជា​អនុប្រធាន​ភូមិ​រូប​នេះ បាន​ជិះ​ម៉ូតូ​ម៉ាក​អ៊ែ​រ​ប្លែក ពណ៌​លឿង​លាយ​ខ្មៅ ពាក់​ស្លាក​លេខ​ភ្នំពេញ​១AP-៣១៣៦ មួយ​គ្រឿង ដឹក​ពូក​មួយ​ពីក្រោយ​ដោយ​មាន​ពាក់មួក​សុវត្ថិភាព​ត្រឹមត្រូវ តាម​បណ្តោយ​ផ្លូវ​លេខ​២៧១ ។

តាម​ប្រភព​ដដែល​បាន​ប្រាប់​បន្ត​ទៀត​ថា លុះ​រូប​គាត់​ជិះ​មក​ដល់​ចំណុច​ខាងលើ បុរស​រង​គ្រោះ​ក៏​ជិះ​បត់​ចុះ​តាម​ផ្លូវ​លេខ​១៨៧ ស្រប​តាម​របង​មន្ទីរពេទ្យ កែង​ការដ្ឋាន​សំណង់​អគារ​ខុន​ដូ UK ដែល​ពី​មុន​ឈ្មោះ​៩៩៩​នោះ ក៏​ស្រាប់តែ​មាន​ដែក​ជ្រុង​ដែល​មាន​ប្រវែង​២,៨០​ម៉ែត្រ បាន​ធ្លាក់​ពីលើ​ជាន់ខ្ពស់​បំផុត​មក​ត្រូវ​ក្បាល បណ្តាល​អោយ​បែក​មួក​សុវត្ថិ ភាព និង​បែកក្បាល​ហូរ​ឈាម​ដួល​ដេក​ទៅ​លើ​ដី​រង​របួសធ្ងន់ ។

ពាក់ព័ន្ធ​ទៅ​នឹង​ករណី​ធ្លាក់​ដែក​ជ្រុង​ត្រូវ​លើ​បុរស​វ័យ​ចំណាស់ ជា​អនុប្រធាន​ភូមិ​នេះ​ដែរ សំណាង​ណាស់​រូប​គាត់​ពាក់មួក​សុវត្ថិភាព​ប្រសិនបើ​មិន​ពាក់​វិញ​ប្រហែលជា​អស់​ជីវិត​មិន​ខាន​ឡើយ ។តាម​ប្រភព​ដដែល​ក៏​បាន​បញ្ជាក់​ទៀត​ថា ការដ្ឋាន​សំណង់​អគារ​ខុន​ដូ UK អតីត​៩៩៩​នេះ​ដែរ មាន​ម្ចាស់​ឈ្មោះ ទាវ ធីតា ភេទ​ស្រី ដែល​អ្នកខ្លះ​ថា​ជា​កម្មសិទ្ធិ​របស់​ឧកញ៉ា ថោ​ង សា​រ៉ាត់ ហើយ​ការដ្ឋាន​សំណង់​នេះ ត្រូវ​ខាង​សាលា​រាជធានី​ភ្នំពេញ បាន​បិទ​ការ​សាងសង់​អស់​រយៈពេល​ជា​យូរ​មក​ហើយ តែ​ខាង​ការដ្ឋាន​មិន​គោរព​តាម និង​នៅ​តែ​បន្ត​លួច​ធ្វើ​សកម្មភាព​សាងសង់ រហូត​ដល់​មានរឿង​បែប​នេះ​កើតឡើង​ទើប​ដឹង​ថា​លួច​ធ្វើ​បន្ត ។

នៅ​វេលា​ម៉ោង​៦​និង​៣០​នាទី​ល្ងាច​ថ្ងៃ​ដដែល ក្រោម​ការ​ដឹកនាំ​របស់​លោក មាន ចាន់​យ៉ា​ដា អភិបាលរង​រាជធានី​ភ្នំពេញ លោក ហេង ពិសិដ្ឋ អភិបាលរង​ខណ្ឌ​បឹង​កេងកង មាន​សង្កាត់​នគរបាល​ខណ្ឌ និង​ប៉ុស្តិ៍​ទំនប់​ទឹក ចុះ​មកធ្វើការ​បិទ​ការដ្ឋាន​សំណង់​អគារ​ខុន​ដូ UK(​អតីត​៩៩៩) សា​ជា​ថ្មី​ម្តងទៀត​ផង​ដែរ ចាំ​មើល​ទៀត តើ​បិទ​ជិត​ដែរ​ឬ​អត់ ?

ព័ត៌មាន​បន្ថែម​ចុង​ក្រោយក្រោយ​មាន​ឧបទ្ទវ​ហេតុនេះ អ្នក​ទទួលខុសត្រូវ​ការដ្ឋាន​សំណង់​អគារ​ខុន​ដូ UK ចំនួន​២​នាក់ ក្នុង​នោះ​មាន​វិស្វករ​ម្នាក់ និង​កម្មករ​សំណង់​ម្នាក់ ត្រូវ​បាន​ឃាត់ខ្លួន​កាលពី​យប់​ថ្ងៃ​ទី​២០ ខែកក្កដា ឆ្នាំ​២០២០ ក្រោយ​ពី​កើត​មាន​ករណី​ធ្លាក់​ដែក ត្រូវ​ក្បាល​លោក​អនុប្រធាន​ភូមិ​១​រូប បង្ក​ឱ្យ​មាន​រង​របួសធ្ងន់ ។ អ្នក​ដែល​បាន​ឃាត់ខ្លួន​ទី​១-​ឈ្មោះ ម៉ី ម៉ា​រ៉ា​ឌី ភេទ​ប្រុស អាយុ​៣០​ឆ្នាំ ជា​វិស្វករ​សំណង់​ប្រចាំ​ការដ្ឋាន​សំណង់ ស្នាក់​នៅផ្ទះ​ជួល​លេខ​៨C ផ្លូវលំ សង្កាត់​ភ្នំពេញ​ថ្មី ខណ្ឌ​សែន​សុខ និង​ទី​២-​ឈ្មោះ អ៊ុ​ង សា​រឿ​ន ភេទ​ប្រុស អាយុ​៤០​ឆ្នាំ មុខរបរ​កម្មករ​សំណង់ ស្នាក់​នៅផ្ទះ​ជួល ក្នុង​សង្កាត់​ចោម​ចៅ ខណ្ឌ​ពោធិ​សែន​ជ័យ ។

ក្រោយ​ពេល​កម្លាំង​មាន​សមត្ថកិច្ច​ឃាត់ខ្លួន​ក៏​បាន​នាំ​ទាំង​២​នាក់​មក​សាកសួរ នៅ​អធិការដ្ឋាន​នគរបាល​ខណ្ឌ​បឹង​កេងកង មិន​ទាន់​បាន​ប៉ុន្មាន​ម៉ោង​ផង ក៏​លេចឮ​ដំណឹង​ថា កំពុង​តែ​មាន​គេ​រត់ការ​ដោះ​លែង​បុរស​ទាំង​២​នាក់ ជា​អ្នក​មើល​ការ​ខុស​ត្រូវ​ការដ្ឋាន​សំណង់​ខាងលើ​ហើយ ខណៈ​ជន​រង​គ្រោះ​កំពុង​តែ​សម្រាក​នៅ​មន្ទីរពេទ្យ ដែល​នៅ​មិន​ទាន់​មានការ​ដោះស្រាយ​នៅ​ឡើ​យេ ៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ