រាជធានីភ្នំពេញ ៖ សុខភាពផ្លូវចិត្ត ជាផ្នែកមួយដ៏សំខាន់ នៃសុខភាពមនុស្ស ដែលក្រួសួងសុខាភិបាល បានចាត់ទុកជាអាទិភាពមួយ ក្នុងចំណោមអាទិភាពនានា នៃបញ្ហាសុខភាពសាធារណៈ។ ដើម្បីការពារបង្ការបញ្ហាសុខភាពផ្លូវចិត្ត ដែលអាចឈានដល់ស្ថានភាពធ្ងន់ធ្ងរ លើសុខភាពផ្លូវចិត្ត និងផ្លូវកាយ ក្នុងស្ថានភាពដែលការរាតត្បាតវីរុសកូវីដ១៩ នៅបន្តក្នុងរយៈពេលយូរទៀតនោះ នៅថ្ងៃទី ២១ ខែ កក្កដា ឆ្នាំ ២០២០នេះ ក្រសួងសុខាភិបាល បានណែរនាំវីធី ខ្លះៗ ចំពោះក្រុមគ្រូពេទ្យ និងអ្នកថែទាំសុខភាពអ្នកជំងឺ ដែលមានដូចរៀបរាប់ខាងក្រោមនេះ ៖
ក – ប្រការដែលត្រូវប្រកាន់យក
- ត្រូវទទួលយកនូវស្ថានភាពដែលខ្លួនកំពុងជួបប្រទះ ឬកំពុងតែប្រឈម
- ត្រូវត្រួតពិនិត្យខ្លួនឯង (ពាក់ម៉ាស់ឱ្យបានត្រឹមត្រូវ លាងសំអាតដៃឱ្យបានទៀងទាត់ រក្សាគម្លាតសុវត្ថិភាពបុគ្គលយ៉ាងតិចឱ្យបានមួយម៉ែត្រកន្លះឡើង)
- បំពេញការងារក្នុងភាពដៃគូ ឬជាក្រុម ប្រកបដោយការប្រុងប្រយ័ត្នការចម្លង
- មានពេលវេលាសម្រាកស្មឹងស្មាធរយៈពេលខ្លី (Brief relaxation) ដើម្បីគ្រប់គ្រងភាពតានតឹងផ្លូវចិត្ត
- មានការពិគ្រោះយោបល់ជាប្រចាំ ជាមួយអ្នករួមការងារ ឬមិត្តភក្តិ
- មានពេលសម្រាកការងារសម្រាប់ការលំហែ និងថែទាំរាងកាយ
- ស្វែងរក និងតាមដានព័ត៌មានពិត ជឿទុកចិត្តបាន ដើម្បីជួយដល់ការសម្រេចចិត្ត
- រក្សាភាពព្រួយបារម្ភឱ្យសម្របនឹងតថភាពជាក់ស្តែង
- ធ្វើការពិចារណាខ្លួនឯងឱ្យបានហ្មត់ចត់ ដើម្បីជៀសវាងការភ័យបារម្ភហួសហេតុ
- ផ្តោតលើកិច្ចខិតខំរបស់ខ្លួនឯង និងលទ្ធភាព ថាមពលដែលខ្លួនមាន
- ពង្រឹងស្មារតីរឹងប៉ឹង អត់ធ្មត់ ការអធ្យាស្រ័យ និងត្រូវមានសេចក្តីសង្ឃឹម
- ត្រូវមានភាពជឿជាក់លើខ្លួនឯង ពិសេសការអនុវត្តន៍វិធានការការពារកុំឱ្យមានការចម្លងវីរុសកូវីដ១៩ មកបុគ្គលផ្ទាល់ខ្លួន និងទៅអ្នកដទៃ។
ខ)- ប្រការដែលត្រូវជៀសវាង - ធ្វើការងារយូរពេក ភ្លេចផ្ទៀងផ្ទាត់ការងារជាមួយអ្នករួមការងារ
- ធ្វើការងារមិនមានពេលសម្រាកសោះ
- ការញុំាអាហារផ្អែម និងកាហ្វេច្រើន
- ការប្រើប្រាស់គ្រឿងស្រវឹង គ្រឿងញៀន ការប្រើប្រាស់ថ្នាំងងុយគេងច្រើនហួសហេតុ
- ព្យាយាមវាយតម្លៃច្រើនហួសហេតុអំពីផលអវិជ្ជមាន នៃការងារដែលខ្លួនបានធ្វើ
ក្រសួងបានបន្ថែមថា ប្រសិនបើបងប្អូនប្រជាពរដ្ឋ បុគ្គល ឬក្រុមគ្រូពេទ្យ និងអ្នកថែទាំសុខភាព មានភាពតឹងផ្លូវចិត្ត រយៈពេលលើសពី ២ សប្តាហ៍ ដែលធ្វើឱ្យមានការប៉ះពាល់ដល់ការងារប្រចាំថ្ងៃ គួរតែទៅពិគ្រោះជាមួយគ្រូពេទ្យព្យបាលជំងឺផ្លូវចិត្ត ឬអ្នកជំនាញផ្លូវចិត្ត ឬស្វែងរកការជួយគាំទ្រ ឬទៅពិនិត្យព្យាបាលនៅមន្ទីរពេទ្យរដ្ឋ ដែលមានអ្នកជំនាញខាងសុខភាពផ្លូវចិត្ត ៕
ចែករំលែកព័តមាននេះ