រាជធានីភ្នំពេញ ៖ «ខ្ញុំគិតថាផ្នត់គំនិត ដែលថាបុរសគួរតែចូលរួមក្នុងការមើលថែរក្សាក្នុងគ្រួសារនេះ បុរសខ្លះក៏អាចទទួលយកបាន ហើយខ្លះក៏មិនអាចទទួលយកដែរ ។ ប៉ុន្តែបន្តិចម្តងៗ ខ្ញុំគិតថា នឹងអាចទទួលយកបានច្រើនជាងនេះ…
រាជធានីភ្នំពេញ ៖ «ខ្ញុំគិតថាផ្នត់គំនិត ដែលថាបុរសគួរតែចូលរួមក្នុងការមើលថែរក្សាក្នុងគ្រួសារនេះ បុរសខ្លះក៏អាចទទួលយកបាន ហើយខ្លះក៏មិនអាចទទួលយកដែរ ។ ប៉ុន្តែបន្តិចម្តងៗ ខ្ញុំគិតថា នឹងអាចទទួលយកបានច្រើនជាងនេះ ព្រោះខ្ញុំយល់ឃើញថាជំនាន់ក្រោយៗនេះ បុរសក៏ដូចជាឪពុកមួយចំនួន ខ្ញុំឃើញគាត់ធ្វើការងារផ្ទះ ជំនួសភរិយាប្រហែលជាពាក់កណ្តាលហើយ» ។
នេះជាការលើកឡើងរបស់លោកស្រី អេង លីគង់ សហស្ថាបនិក និងប្រធានសមាគមសហគ្រិនស្ត្រីកម្ពុជា ។ លោកស្រីបានបញ្ជាក់ថាស្ត្រីប្រឡូកក្នុងអាជីវកម្មប្រឈមមុខនឹងការលំបាកច្រើនជាងបុរស មិនថាទំនាក់ទំនងខាងក្រៅ ក៏ដូចជាកិច្ចការក្នុងផ្ទះឡើយ ។ ព្រោះជាទូទៅ មិនថាស្ត្រីមានឋានៈ តួនាទីធំប៉ុណ្ណានៅក្នុងស្ថាប័នណា ឬមុខជំនួញណានោះទេ ស្ត្រីគឺនៅតែផ្សារភ្ជាប់យ៉ាងខ្លាំងជាមួយនឹងការផ្ទះសម្បែងនិងការមើលថែកូនចៅ ។
ដូច្នេះជារួម បុរសគួរតែលើកទឹកចិត្តភរិយាក្នុងការប្រឡូកនិងដឹកនាំអាជីវកម្ម តាមរយៈការចូលរួមចំណែកក្នុងជួយការងារផ្ទះនិងការមើលថែកូនចៅផងដែរ ។ លោកស្រី អេង លីគង់ ដែលជានាយិការរបស់មន្ទីព្យាបាលធ្មេញ Master Care បានបន្តថា លោកស្រីកត់សម្គាល់ថានៅសម័យបច្ចុប្បន្ននេះ មានការប្រែប្រួលខ្លាំងចំពោះឥរិយាបទរបស់បុរស ។ ត្រង់នេះមានន័យថា បុរសជាច្រើនមានការបើកទូលាយ ចេះជួយចូលរួមក្នុងការនៅផ្ទះសម្បែង ខណៈភរិយាជាប់រវល់នឹងការងារមុខជំនួញខាងក្រៅ ។
លោកស្រីបានមានប្រសាសន៍បញ្ជាក់យ៉ាងដូច្នេះថា «តែបើជំនាន់ខ្ញុំអត់ទេ ជំនាន់ឪពុកម្តាយខ្ញុំអីហ្នឹងក៏កាន់តែអត់ទៀតតែម្តង ។ ខ្ញុំលើកទឹកចិត្តឱ្យបុរស ឬស្វាមីជួយ ការងារក្នុងគ្រួសារ និងស្ត្រីខ្លួនឯងនឹងគិតគូរថាកុំឱ្យពឹងផ្អែកលើបុរសទាំងស្រុង នៅក្នុងការធ្វើការងារ ឬប្រកបអាជីវកម្ម មានន័យថាជួយរកប្រាក់ចំណូលបន្ថែមក្នុងគ្រួសារ ។ ព្រោះថាការរកចំណូលបន្ថែមក្នុងគ្រួសារនេះអាចជួយជាផ្នែកមួយឱ្យសេដ្ឋកិច្ចគ្រួសាររឹងមុំាផងដែរ។ ហើយសម័យកាលឥឡូវនេះ គេហៅថាសម័យកាលបដិវត្តន៍បច្ចេកវិទ្យាផង អ្វីៗមានការប្រកួតប្រជែង មនុស្សទាំងអស់ត្រូវធ្វើការទាំងអស់ បើយើងធ្វើការតែម្នាក់អាចប្រឈមហានិភ័យខ្លាំង នៃជីវភាពរស់នៅ ៕
ចែករំលែកព័តមាននេះ