ប្រាប់​២​ដង​ហើយ​នៅ​តែ​បំពាន មាន​តែ​បង្ក្រាប​ទើប​រាង


រាជធានី​ភ្នំពេញ ៖ លោក កែង សំណាង អភិបាលរង​ខណ្ឌចំការមន បាន​ដឹកនាំ​កម្លាំង​នៃ​គណៈ​បញ្ជាការ​ឯកភាព​ខណ្ឌ​ចុះ​មក​ធ្វើការ​បង្ក្រាប​ផ្ទះ​បើក​អ៊ី​ន​ធើ​រ​ណេ​ត​មួយ​កន្លែង ដែល​គ្មាន​ច្បាប់​អនុញ្ញាតិ​បើក​លេង ២៤​ម៉ោង ទាំង​ថ្ងៃ ទាំង​យប់ ដោយ​មាន​សុទ្ធតែ​ក្រុម​ក្មេង​ស្ទាវ​ៗ​យ៉ាង​គគ្រឹក​គគ្រេង​នាំ​គ្នា​ចូល​មក​លេង​បង្ក​ការ​ភ័យ​ខ្លាច និង​រំខាន​ដល់​ការ​រស់នៅ​អ្នក​ជិតខាង​។

ដោយ​អាជ្ញាធរ​ចុះ​មក​ធ្វើការ​ជូនដំណឹង​ចំនួន​២​លើក​មក​ហើយ តែ​មិន​ស្តាប់​នៅ​តែ​លេង ទើប​លើក​​ទី​៣​នេះ ចុះ​មក​ធ្វើការ​បង្ក្រាប​ដោយ​បាន​តែ​ម្តង និង​ឃាត់ខ្លួន​អ្នក​មើល​ការ​ខុស​ត្រូវ ព្រមទាំង​អ្នកលេង​ប្រុស​-​ស្រី​បាន​ចំនួន​៤​នាក់ (​ក្នុង​ប្រុស​៣​នាក់ ស្រី​ម្នាក់​) និង​ដកហូត​ម៉ាស៊ីន​កុំព្យូទ័រ​ចំនួន​១៨​គ្រឿង ទូរ​ឈើ និង​សម្ភារៈ​ប្រើប្រាស់​មួយ​ចំនួន​ទៀត​។

ការ​បង្ក្រាប​នេះ​ដែរ បាន​ធ្វើ​ឡើង​កាលពី​ម៉ោង​៤​និង​១៥​នាទី​ល្ងាច ថ្ងៃ​ទី​២០ ខែកក្កដា ឆ្នាំ ២០២០ នៅ​ចំណុច​ហាង អ៊ី​ន​ធើ​រ​ណេ​ត​គ្មាន​យីហោ ទីតាំង​ផ្ទះ​លេខ ៤៨A ផ្លូវ​លេខ ៩៩ ក្នុង​សង្កាត់​បឹង​ត្របែក ខណ្ឌចំការមន​។

លោក កែវ សំណាង អភិបាលរង​ខណ្ឌចំការមន បាន​ប្រាប់​ឱ្យ​ដឹង​ថា ក្នុង​ពេល​នេះ​ដែរ កម្លាំង​គណៈ​បញ្ជាការ​ឯកភាព​ខណ្ឌ ដោយ​មានការ​ចូលរួម​អំពី​សំណាក់​កម្លាំង​នគរបាល​នៃ​អធិការ​នគរបាល​ខណ្ឌ កងរាជអាវុធហត្ថ​ខណ្ឌ សង្កាត់ និង​ប៉ុស្តិ៍​បឹង​ត្របែក បាន​ចុះ​មក​ធ្វើការ​បង្ក្រាប និង​បិទ​អាជីវកម្ម​ហាង អ៊ី​ន​ធើ​រ​ណេ​ត​គ្មាន​យីហោ មួយ​កន្លែង​ខាងលើ​។

ពាក់ព័ន្ធ​នឹង​ករណី​ខាងលើ​នេះ ដោយ​បាន​ធ្វើការ​ឃាត់ខ្លួន​បុគ្គលិក​ជា​អ្នក​មើល​ការ​ខុស​ត្រូវ​ចំនួន​៣​នាក់ ក្នុង​នោះ​មាន​បុរស​២​នាក់ និង​នារី​ម្នាក់ ព្រមទាំង​បុរស​ជា​អ្នកលេង​១​នាក់​ផង​ដែរ សរុប​ទាំងអស់​ចំនួន​៤​នាក់​។

ព័ត៌មាន​ពិស្តារ​នឹង​មាន​ផ្សាយ​ជូន​នៅ​លើ​កាសែត​កោះសន្តិភាព ។ (​កែសម្រួល​ដោយ ៖ បុប្ផា​)

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ