រាជធានីភ្នំពេញ ៖ ថ្ងៃនេះក្រសួងបានប្រកាសថា បានរកឃេីញករណីវិជ្ជមានវីរុសកូវីដ-១៩ លេីអ្នកដំណេីរវិលត្រឡប់មកពីរុស្សី និងអេហ្ស៊ីប ចំនួន២៦នាក់ និងមានអ្នកព្យាបាលជាសះស្បេីយចំនួន ០៤នាក់ នាថ្ងៃទី២០ ខែកក្កដា ឆ្នាំ២០២០ ។
ករណីវិជ្ជមានវីរុសកូវីដ-១៩ថ្មី ចំនួន២៦នាក់នេះ ក្នុងនោះជាបុរសជនជាតិខ្មែរ ដែលត្រឡប់មកពីសិក្សានៅរុស្ស៊ី និងប្រទេសអេហ្ស៉ីបចំនួន២៥នាក់ និងម្នាក់ទៀតជាបុរសជនជាតិខ្មែរមកពីប្រទេសកូរ៉េខាងត្បូង ត្រូវបានបញ្ជូនទៅសម្រាកព្យាបាលរួចរាល់ហើយនៅ មណ្ឌលសុខភាពចាក់អង្រែ រាជធានីភ្នំពេញ ។
បើតាមក្រសួងសុខាភិបាលជំងឺកូវីដ១៩ថ្មីទាំង២៦នាក់នេះ មាន២៥នាក់ធ្វើដំណើរមកពីសិក្សានៅប្រទេសរុស្ស៊ី និងអេហ្ស៊ីប តាមជើងហោះហើរមកពីប្រទេសរុស្ស៊ី ដោយបន្តដំណើរតាមជើងហោះហើរតាមប្រទេសម៉ាឡេស៊ី មកដល់កម្ពុជានៅថ្ងៃទី១៩ ខែកក្កដា ឆ្នាំ២០២០ ។ ចំណែកម្នាក់ទៀតជាបុរសជនជាតិខ្មែរ អាយុ៦៥ឆ្នាំ ធ្វើដំណើរប្រទេសកូរ៉េខាងត្បូង ចូលមកកម្ពុជា នៅថ្ងៃទី១៩ ខែកក្កដា ឆ្នាំ២០២០ ។
សម្រាប់អ្នកដំណើរដែលរួមដំណើរលើយន្តហោះទាំង២ សរុបចំនួន២២៨នាក់ផ្សេងទៀត ត្រូវបានដាក់ធ្វើចត្តាឡីស័ក ដើម្បីតាមដានបន្តទៀត ។
ក្រសួងបានបញ្ជាក់ទៀតថា កម្ពុជាយើងបានឡើងដល់ ១៩៧នាក់ ខណៈអ្នកកំពុងតែព្យាបាលនៅមន្ទីរពេទ្យឡើងដល់៥៥នាក់ហើយ ៕
ចែករំលែកព័តមាននេះ