រាជធានីភ្នំពេញ ៖ ការសិក្សាស្រាវជ្រាវមួយស្តីពី «ស្ថានភាពជីវភាពរស់នៅ និងផលប៉ះពាល់នៃជំងឺកូវីដ១៩ ដល់កម្មករ និយោជិត ក្នុងវិស័យវាយនភណ្ឌ កាត់ដេរ និងផលិតផលស្បែកជើង…
រាជធានីភ្នំពេញ ៖ ការសិក្សាស្រាវជ្រាវមួយស្តីពី «ស្ថានភាពជីវភាពរស់នៅ និងផលប៉ះពាល់នៃជំងឺកូវីដ១៩ ដល់កម្មករ និយោជិត ក្នុងវិស័យវាយនភណ្ឌ កាត់ដេរ និងផលិតផលស្បែកជើង ឆ្នាំ២០២០» បានកំពុងធ្វើចាប់ពីថ្ងៃទី១៧ ដល់ថ្ងៃទី៣១ ខែកក្កដា ឆ្នាំ២០២០នេះ ដោយក្រសួងការងារ និងបណ្តុះបណ្តាលវិជ្ជាជីវៈ។
ក្រសួងការងារបានជូនដំណឹងថា ក្នុងការចុះស្រាវជ្រាវនេះខ្លួននឹងអនុវត្តទៅលើគំរូសំណាកកម្មករដែលត្រូវបានជ្រើសរើសដោយចៃដន្យ នៅតាមបណ្តារាជធានីខេត្ត ហើយបានស្នើឲ្យអាជ្ញាធរពាក់ព័ន្ធ ជួយសហការ ដើម្បីឲ្យការងារនេះសម្រេចដោយជោគជ័យ ។
សូមជម្រាបថា កម្មករនិយោជិតក្នុងវិស័យកាត់ដេរបានរងប៉ះពាល់ខ្លំាងពីជំងឺកូវីដ១៩នេះ ដោយសារតម្រូវការសម្លៀកបំពាក់លើសកលលោកបានធ្លាក់ចុះបណ្តាលឲ្យមានរោងចក្រមួយចំនួននៅកម្ពុជា បានបិទទ្វារ ។
កាលពីដើមខែកក្កដានេះ សមាគមរោងចក្រកាត់ដេរនៅកម្ពុជា បានឲ្យដឹងថា មានរោងចក្រកាត់ដេរចំនួន៤០០បានបិទទ្វារ ដែលធ្វើឲ្យ កម្មករជាង ១៥០ ០០០ បានព្យូរការងារ ។ សមាគមរោងចក្រកាត់ដេរបញ្ជាក់ថា នៅមានរោងចក្រ និងកម្មករជាច្រើនទៀតកំពុងប្រឈមនឹងខាងសេដ្ឋកិច្ច ដោយសារជំងឺកូវីដ១៩នេះ ។
ខាងអង្គការសង្គមស៊ីវិលមួយចំនួននៅមុននេះបានអះអាងថា ខ្លួនបានរកឃើញថា ភាគច្រើននៅក្នុងចំណោមកម្មករដែលខ្លួនបានសម្ភាស ហើយបានខ្ចីប្រាក់ពីគ្រឹះស្ថានមីក្រូហិរញ្ញវត្ថុ ពួកគេបានកាត់បន្ថយការបរិភោគ ឬបានទៅខ្ចីប្រាក់ពីប្រភពផ្សេងទៀត ដើម្បីសងបំណុលចាស់ ។
ក្នុងចំណោមកម្មករ១០៦នាក់ ដែលជាប់កម្ចីខ្នាតតូចរបស់គ្រឹះស្ថានមីក្រូហិរញ្ញវត្ថុ មាន ១៦នាក់ បានលក់ដី ដើម្បីសងបំណុលមីក្រូហិរញ្ញវត្ថុរបស់ខ្លួន ខណៈកម្មករ ៣២នាក់ផ្សេងទៀតបាននិយាយថា ពួកគេមានគម្រោងលក់ដីនាពេលអនាគត ។ ប៉ុន្តែរបាយការណ៍របស់សង្គមស៊ីវិលនោះបានបដិសេធដោយសមាគមធនាគារ និងគ្រឹះស្ថានមីក្រូហិរញ្ញាឲវត្ថុថា មិនពិត និងមិនបានឆ្លុះបញ្ចាំងការពិតឡើយ ។
ក្រសួងការងារ និងបណ្តុះបណ្តាលវិជ្ជាជីវៈពុំបានបញ្ជាក់ថា លទ្ធផលដែលខ្លួនបានពីការស្រាវជ្រាវដែលនឹងបញ្ចប់ក្នុងពេលឆាប់ៗនេះសម្រាប់យកទៅណា ឬដើម្បីដោះស្រាយបែបណានោះឡើយ ។ អ្វីដែលគេដឹងថា នៅពេលនេះតាមរយៈក្រសួងការងាររដ្ឋបានកំពុងជួយផ្តល់ឧបត្ថម្ភប្រាក់មួយខែ៤០ដុល្លារដល់កម្មករនិយោជិត ក្នុងឧស្សាហកម្មកាត់ដេរ និងទេសចរណ៍ដែលបានព្យួរការងារ ដោយសារជំងឺកូវីដ១៩ នេះ៕
ចែករំលែកព័តមាននេះ