ខេត្តសៀមរាប ៖ បើតាមសមត្ថកិច្ចនគរបាលបានឱ្យដឹងថា បុរសម្នាក់បានកាន់កាំបិតផ្គាក់គំរាមកាប់សម្លាប់ម្តាយមីង តែត្រូវបានសមត្ថកិច្ចរំដោះរួចផុតពីកណ្តាប់ដៃបុរសរូបនេះ ។ យ៉ាងណាក៏ដោយ ជននេះមិនបានបញ្ចប់បញ្ហានោះទេ គឺនៅបន្តទៅបំផ្លាញទ្រព្យសម្បត្តិអ្នកភូមិជាច្រើននាក់ រួចគំរាមម្ចាស់រថយន្តម៉ាស្តា១គ្រឿង…
ខេត្តសៀមរាប ៖ បើតាមសមត្ថកិច្ចនគរបាលបានឱ្យដឹងថា បុរសម្នាក់បានកាន់កាំបិតផ្គាក់គំរាមកាប់សម្លាប់ម្តាយមីង តែត្រូវបានសមត្ថកិច្ចរំដោះរួចផុតពីកណ្តាប់ដៃបុរសរូបនេះ ។ យ៉ាងណាក៏ដោយ ជននេះមិនបានបញ្ចប់បញ្ហានោះទេ គឺនៅបន្តទៅបំផ្លាញទ្រព្យសម្បត្តិអ្នកភូមិជាច្រើននាក់ រួចគំរាមម្ចាស់រថយន្តម៉ាស្តា១គ្រឿង បង្ខំឱ្យចេញពីក្នុងរថយន្ត ហើយឡើងបើកគេចខ្លួនទៅបាត់។
ហេតុការណ៍នេះ កើតឡើងតាំងពីព្រឹករហូតដល់ម៉ោង៨យប់ថ្ងៃទី១៨ ខែកក្កដា ឆ្នាំ២០២០ នៅភូមិវិហារចិន សង្កាត់ស្វាយដង្គំ ក្រុងសៀមរាប ។
ឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្ត ទទួលផែនកណ្តាលព្រហ្មទណ្ឌបានឱ្យដឹងថា ជនរូបនេះឈ្មោះ អែម បញ្ញា ភេទប្រុស អាយុ២៨ឆ្នាំ មានទីលំនៅក្នុងភូមិ សង្កាត់ខាងលើ បានយកកាំបិតផ្គាក់ភ្ជង់និងគំរាមអារកសម្លាប់ម្តាយមីងបង្កើតរបស់ខ្លួនឈ្មោះ អែម ច័ន្ទសូឡី អាយុ៤៧ឆ្នាំ នៅក្នុងភូមិ សង្កាត់ ជាមួយគ្នា ។ នៅពេលនគរបាលប៉ុស្តិ៍ទៅអន្តរាគមន៍ ត្រូវជននេះដេញកាប់ថែមទៀតនិងកាប់ម៉ូតូរបស់សមត្ថកិច្ចខូចអស់មួយគ្រឿងផង ។
លោកស្នងការរងបញ្ជាក់ថា សមត្ថកិច្ចបានរំដោះជនរងគ្រោះជាម្ដាយមីងបានដោយសុវត្ថិភាព ។ ចំណែកជនឈ្មោះ អែម បញ្ញា បានបន្តសកម្មភាពយកផ្គាក់ដេញកាប់រថយន្តបើកបរតាមដងផ្លូវ រហូតដល់ផ្លូវបំបែកចូលផ្សារក្រោម ។
ជនឈ្មោះ អែម បញ្ញា បានកាប់រថយន្តមួយគ្រឿងម៉ាក Morning ពណ៌ក្រហម ចំនួន២កាំបិតបណ្ដាលឱ្យបែកកញ្ចក់រថយន្តខាងមុខ ហើយម្ចាស់រថយន្តក៏បានរត់ចោលរថយន្តដែរ ។ រហូតដល់ម៉ោងប្រមាណ៨និង៣០នាទីយប់ ថ្ងៃដដែលនោះ នៅកន្លែងកាត់សក់ ពេលឃើញរថយន្តមួយគ្រឿងម៉ាកម៉ាស្តា ពណ៌ស ពាក់ផ្លាកលេខ ភ្នំពេញ ២BG-៤៤៣១ ជននេះបានយកផ្គាក់ទៅកាប់កញ្ចក់រថយន្តមួយកាំបិត បណ្ដាលឱ្យបែកកញ្ចក់ខាងមុខ ហើយគំរាមម្ចាស់រថយន្តឱ្យចុះពីលើរថយន្ត រួចហើយបើករថយន្តយកទៅបាត់ ។ ម្ចាស់រថយន្តម៉ាស្តានេះឈ្មោះ ស៊ុន ចិនស្រឿន ភេទប្រុស អាយុ៣៨ឆ្នាំ មុខរបរលក់ដូរ មានទីលំនៅក្នុងភូមិថ្មី សង្កាត់ស្វាយដង្គំ ក្រុងសៀមរាប។ ជនសង្ស័យបានបើករថយន្តនោះចេញទៅទិសខាងកើតបាត់ទៅ ហើយពេលនេះសមត្ថកិច្ចកំពុងតាមប្រមាញ់ ។
លោកស្នងការរងថ្លែងថា បន្ទាប់ពីទទួលបានបណ្តឹងពីករណីខាងលើ ពេលនេះនគរបាលប៉ុស្តិ៍ស្វាយដង្គំ និងនគរបាលក្រុងសៀមរាប សហការជាមួយនគរបាលការិយាល័យព្រហ្មទណ្ឌកម្រិតធ្ងន់និងនគរបាលស្រុកប្រាសាទបាគង កំពុងតាមប្រមាញ់រក ។ លុះដល់វេលាម៉ោង១២និង៣០នាទីថ្ងៃត្រង់ថ្ងៃទី១៨ ខែកក្កដា ឆ្នាំ២០២០ ក៏តាមរកឃើញរថយន្តដែលជនសង្ស័យឈ្មោះ អែម បញ្ញា បានបើកទៅប្លុងទុកចោលនៅភូមិថ្នល់បាក់ ឃុំអំពិល ស្រុកប្រាសាទបាគង ។ ចំណែកជនសង្ស័យ បានរត់គេចខ្លួនបាត់ដោយបន្សល់ទុកកាំបិតផ្គាក់នៅក្នុងរថយន្ត ។
លោកស្នងការរងបន្តថា ម្ចាស់រថយន្តបានប្រាប់សមត្ថកិច្ចថា គាត់បានបាត់បង់ទ្រព្យសម្បត្តិនៅក្នុងរថយន្តមានលុយជិត៧.០០០ដុលា្លរ បាត់បង់ផ្លាកលេខរថយន្តមុខ-ក្រោយ ទូរស័ព្ទមួយគ្រឿងម៉ាកអុបប៉ូ ដែលមានលេខ ០៩២ ៥៩៤ ៥៨០ និងកាតគ្រីម៉ូតូមួយសន្លឹក ម៉ាកហុងដាឌ្រីម
ស១២៥ ពណ៌ខ្មៅ ស៊េរីឆ្នាំ២០១៤ មិនចាំផ្លាកលេខ ។
លោកស្នងការរងបន្ថែមទៀតថា សមត្ថកិច្ចបានយករថយន្តមកប្រគល់ឱ្យម្ចាស់វិញ ។ លោកបញ្ជាក់ទៀតថា ភិនភាគជនសង្ស័យគឺមាឌធំ កម្ពស់ប្រហែល១,៦៥ម៉ែត្រ ពាក់អាវយឺតដៃខ្លីពណ៌ខៀវ ស្លៀកខោខូវប៊យជើងវែង ពណ៌ខៀវ ។ ជនសង្ស័យប្រើប្រាស់ថ្នាំសរសៃប្រសាទជាប្រចាំ ។ ករណីនេះ នគរបាលខេត្តកំពុងធ្វើការស្រាវជ្រាវនិងស៊ើបអង្កេតបន្តទៀត រហូតទាល់តែចាប់បានជនរូបនេះ ៕
ចែករំលែកព័តមាននេះ