រាជធានីភ្នំពេញ ៖ អត់រួចខ្លួននោះទេ ស្ត្រីដែលជាជនដៃដល់ក្នុងការឆូតមុខក្មេងស្រីម្នាក់បណ្ដាលឲ្យរងរបួសធ្ងន់ធ្ងរ ព្រោះតែដើរតួជាអ្នកសងសឹកជំនួសកូនប្រុសរបស់ខ្លួន ដែលត្រូវបានក្មេងស្រីម្នាក់គប់បែកក្បាលនោះ និងត្រូវប្រឈមមុខចំពោះផ្លូវច្បាប់ ព្រមទាំងទាមទារសំណងខូចខាតពីសំណាក់អាណាព្យាបាលក្មេងស្រីរងគ្រោះជាទឹកប្រាក់ចំនួនរាប់ម៉ឺនដុល្លារថែមទៀតផង ។
បាតុភាពដែលបានបង្កឡើងដោយស្ត្រីដៃឆៅនេះពិតជារឿងគួរឱ្យហួសចិត្តបំផុត និងបានធ្វើឱ្យមជ្ឈដ្ឋាននានាស្រែកថ្កោលទោសយ៉ាងចាស់ដៃ ។ ពេលនេះក្មេងស្រីរងគ្រោះកំពុងសម្រាកព្យាបាលរបួសនៅក្នុងមន្ទីរពេទ្យកុមារជាតិ ហើយក៏មានអាជ្ញាធរនិងសប្បុរសជននានា បានទៅសាកសួរសុខទុក្ខដល់មន្ទីរពេទ្យ ព្រមទាំងជួយឧបត្ថម្ភជាបន្តបន្ទាប់ ព្រោះតែអាណិតនាងតូចដែលរងគ្រោះឆូតដោយកាំបិតលើផ្ទៃមុខ មិនដឹងថា ត្រូវព្យាបាលបែបណា ដើម្បីកុំឱ្យមានស្លាកស្នាម ។
មហាជនជាច្រើនបានទន្ទឹងរង់ចាំមើលនូវចំណាត់ការតាមផ្លូវច្បាប់ពីតុលាការទៅលើស្ត្រីដៃដល់ និងចង់ដឹងថាតើស្ត្រីនោះអាចនិងជាប់ពន្ធនាគាររយៈពេលប៉ុន្មានឆ្នាំ ។
បើយោងតាមបណ្ដាញសង្គមហ្វេសប៊ុកបានបង្ហោះពីសកម្មភាពនានាក្រោយពេលកើតហេតុ ដោយក្នុងនោះអាជ្ញាធរខណ្ឌ និងនគរបាលខណ្ឌពោធិ៍សែនជ័យ ដឹកនាំដោយលោក ហែម ដារិទ្ធិ បានចុះទៅសួរសុខទុក្ខដល់មន្ទីរពេទ្យទាំងយប់ និងឧបត្ថម្ភប្រាក់រួមគ្នាសរុប៧៥០ដុល្លារ។
រីឯប្រធានមន្ទីរពេទ្យកុមារជាតិក៏បានជួយព្យាបាលដោយមិនគិតប្រាក់ដែរ ។ បន្តបន្ទាប់ទៀត គឺលោកឧកញ៉ា ឌួង ឆាយ ក៏បានទៅសួរសុខទុក្ខដល់មន្ទីរពេទ្យដែរ ហើយក៏បានជួយឧបត្ថម្ភប្រាក់ផ្ទាល់ចំនួន១ពាន់ដុល្លារទៀតផង ។ តែអ្វីដែលកក់ក្តៅជាងគេនេះលោកឧកញ៉ាបានធានាថា នៅពេលដែលក្មេងស្រីរូបនេះជាមុខរបួស លោកនឹងនាំទៅអ៊ុតបំបាត់ស្នាមរបួសនៅឯប្រទេសកូរ៉េឬប្រទេសថៃ ។
ចំណែកសប្បុរសជនម្នាក់ទៀតដែលជាថៅកែហាងពេជ្រដ៏ល្បីគឺលោកស្រី ទ្រី ដាណា និងស្វាមី ក៏បានទៅសួរសុខទុក្ខដល់មន្ទីរពេទ្យ ហើយដោយសារតែរន្ធត់និងអាណិតក្មេងស្រីខ្លាំងពេកទប់ទឹកភ្នែកមិនបានលោកស្រី ទ្រី ដាណា បានយំតែម្ដង ហើយលោកស្រីឧបត្ថម្ភប្រាក់ចំនួន២ពាន់ដុល្លារផងដែរ ។ នគរបាលផ្នែកព្រហ្មទណ្ឌនៃអធិការដ្ឋានខណ្ឌពោធិ៍សែនជ័យនាវេលារសៀលថ្ងៃទី១៧ ខែកក្កដា ឆ្នាំ២០២០ បានធ្វើការសាកសួរជនដៃដល់រូបនេះចប់សព្វគ្រប់ហើយ មិនតែប៉ុណ្ណោះក៏បានកសាងសំណុំរឿង រួចរាល់អស់ហើយដែរ ។
ប៉ុន្តែកំពុងរត់ការចុះហត្ថលេខាលើសំណុំរឿងពីថ្នាក់លើ ដើម្បីបញ្ជូនជនដៃដល់នេះទៅកាន់សាលាដំបូងរាជធានីភ្នំពេញដើម្បីចាត់ការតាមផ្លូវច្បាប់ ។ ហើយបើបញ្ជូននៅវេលារសៀលថ្ងៃដដែលមិនទាន់ទេ និងបញ្ជូនទៅនៅព្រឹកថ្ងៃទី១៨ ខែកក្កដា ដោយមិនមានការពន្យារពេលណាមួយនោះឡើយ ។ ប្រភពដដែលបានបន្តទៀតថា ឪពុកម្ដាយក្មេងស្រីរងគ្រោះក៏បានដាក់ពាក្យបណ្ដឹងដាក់បន្ទុកលើស្ត្រីដៃដល់រួចរាល់អស់ហើយដែរ ។ នៅក្នុងពាក្យបណ្ដឹងនោះ បានសំណូមពរ២ចំណុចគឺទី១-បានទាមទារសំណងការខូចខាតកូនស្រីជាទឹកចំនួន១០ម៉ឺនដុល្លារអាមេរិក ។ទី២-សំណូមពរសុំឲ្យជួយចាត់ការជននេះ ទៅតាមច្បាប់ ។
ដោយឡែក ស្ត្រីដែលប្រព្រឹត្តអំពើឃោរឃៅលើក្មេងស្រីរងគ្រោះនោះមានប្ដីជាមន្ត្រីកងទ័ពជើងគោក ហើយបុរសជាប្ដីក៏បានទៅមើលនិងយកបាយទឹកឲ្យប្រពន្ធហូបផងដែរ ។សូមរំលឹកថា កាលពីវេលាម៉ោង៣រសៀលថ្ងៃទី១៦ ខែកក្កដា ឆ្នាំ២០២០ នៅចំណុចមុខផ្ទះលេខ៦ ផ្លូវលេខ២៦ បុរីពិភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ស្ត្រីម្នាក់ឈ្មោះ លីវ ប៊ុនធឿន អាយុ៤៣ឆ្នាំ បច្ចុប្បន្នរស់នៅផ្ទះលេខ៦ ផ្លូវលេខ២៦ ក្នុងបុរីពិភពថ្មីឈូកវ៉ា២ ភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ បានធ្វើសកម្មភាពចាប់ក្រៀកក្មេងស្រីឈ្មោះ ឡាស់ ម៉ាវី លីយ៉ា អាយុ៥ឆ្នាំ រស់នៅផ្ទះលេខ១៨ ផ្លូវលេខ២០ ក្នុងបុរីពិភពថ្មីឈូកវ៉ា២នេះដែរប៉ុនប៉ងអារ.កសម្លាប់ តែមិនបានសម្រេចបណ្ដាលឲ្យក្មេងស្រីរងគ្រោះរងរបួសដោយកាំបិតមុតឆូតកាត់ទទឹងផ្ទៃមុខ ច្រមុះ ក និងដៃយ៉ាងធ្ងន់ធ្ងរខណៈក្មេងស្រីរងគ្រោះដើរលេងនៅមុខផ្ទះរបស់ខ្លួន ។
តាមប្រភពព័ត៌មានបានឲ្យដឹងថា កាលពីថ្ងៃទី១៤ ខែកក្កដា ឆ្នាំ២០២០ នៅមុនពេលកើតហេតុ២ថ្ងៃ កូនប្រុសរបស់ស្ត្រីដែលជាជនដៃដល់ខាងលើបានឈ្លោះគ្នាជាមួយនឹងក្មេងស្រីរងគ្រោះខាងលើ ដោយបានរើសដុំថ្មគប់ដាក់គ្នាទៅវិញទៅមក ហើយត្រូវក្មេងស្រីរងគ្រោះគប់ត្រូវក្បាលបែករយះចេញឈាម ។ ខណៈនោះម្ដាយក្មេងស្រីខាងលើក៏ជួយបញ្ជូនទៅកាន់មន្ទីរពេទ្យផងដែរហើយពេទ្យបានដេររបួស១ថ្នេរ ។
តាមការសារភាពរបស់ស្ត្រីដៃដល់នេះថា ខ្លួនខឹងខ្លាំងណាស់និងគំគួនក្មេងស្រីយ៉ាងខ្លាំង លុះដល់ថ្ងៃកើតហេតុខណៈដែលក្មេងស្រីរងគ្រោះដើរលេងកាត់មុខផ្ទះរបស់ខ្លួន ស្ត្រីខាងលើក៏បានកាន់កាំបិតស្ទុះចូលទៅចាប់ក្រៀកបម្រុងអារ.កសម្លាប់ចោលបញ្ចេញកំហឹងជំនួសកូន ។ ប៉ុន្តែក្មេងស្រីស្រែកយំខ្លាំងៗឮដល់អ្នកជិតខាងនាំគ្នាចេញមើលនិងស្រែកឃាត់ ទើបស្ត្រីដៃដល់ឆូតមុខ ច្រមុះព្រមទាំងដៃនិងក ក្មេងស្រីរងគ្រោះបណ្ដាលឲ្យដាច់រយះហូរឈាមកក្លាក់ រួចរត់ចូលទៅសម្ងំនៅក្នុងផ្ទះ ។ ប្រភពដដែលបានបន្តទៀតថា បន្ទាប់មកក្មេងស្រីរងគ្រោះបានរត់ទៅផ្ទះទាំងឈាមហូរជោគមុខនិងខ្លួនប្រាណ ។ ចំណែកនគរបាលប៉ុស្តិ៍សំរោងក្រោមនិងនគរបាលប៉ុស្តិ៍កាកាប២ បានចេញអន្តរាគមន៍ភ្លាមៗនិងបានឃាត់ខ្លួនស្ត្រីដៃដល់ខាងលើ នាំទៅប៉ុស្តិ៍សំរោងក្រោមដើម្បីសាកសួរ ។
ស្ត្រីនេះបាននិយាយយ៉ាងខែងរែងថា គាត់មានកូនតែ២នាក់ទេ គឺប្រុសម្នាក់និងស្រីម្នាក់ ហើយកូនប្រុសនោះធំឡើងឲ្យធ្វើជាតារាផង មិនគួរណាមកធ្វើឲ្យកូនគាត់ចេញឈាមបែបនេះទេ ហើយគាត់ខឹងខ្លាំងណាស់ដេកអត់លក់២យប់ហើយ ។ កូនគាត់របួសប៉ុណ្ណឹងហើយអត់មាននរណាសួរមួយម៉ាត់ ដូច្នេះគាត់សុំត្រឹមតែឲ្យចេញឈាមវិញដូចគ្នា ។ បានសារភាពទៀតថា នៅវេលារសៀលថ្ងៃកើតហេតុ គាត់បានទៅទិញកូនកាំបិតមួយរួចក៏ចាប់ក្មេងស្រីនោះអារនិងឆូតមុខ ច្រមុះ និងដៃព្រមទាំងកតែម្ដង ។ គាត់ថា នេះជាការតបស្នងហើយអ្នកដាំផ្លែអ្វី គឺបានផលនោះអីុចឹងហើយ ៕
ចែករំលែកព័តមាននេះ