រាជធានីភ្នំពេញ ៖ ទោះបីស្ថានភាពការរីករាលដាលនៃជំងឺកូវីដ-១៩ នៅកម្ពុជាមានភាពធូរស្បើយក៏ដោយ មុខរបរធ្វើទូកត្នោតលក់កំពុងប្រឈម និងធ្វើឲ្យប៉ះពាល់ដល់ជីវភាពយ៉ាងខ្លាំង ហើយស្របពេលនេះអ្នកធ្វើទូកត្នោតនៅសល់តិចតួចផងដែរ ។ លោក ឃឹម…
រាជធានីភ្នំពេញ ៖ ទោះបីស្ថានភាពការរីករាលដាលនៃជំងឺកូវីដ-១៩ នៅកម្ពុជាមានភាពធូរស្បើយក៏ដោយ មុខរបរធ្វើទូកត្នោតលក់កំពុងប្រឈម និងធ្វើឲ្យប៉ះពាល់ដល់ជីវភាពយ៉ាងខ្លាំង ហើយស្របពេលនេះអ្នកធ្វើទូកត្នោតនៅសល់តិចតួចផងដែរ ។
លោក ឃឹម សុវី រស់នៅសាលាលេខប្រាំ ស្រុកកំពង់ត្រាច ខេត្តកំពង់ឆ្នាំង ដែលចាប់យកមុខរបរធ្វើទូកត្នោត និងដឹកលក់តាមរ៉ឺម៉កម៉ូតូបាននិយាយឲ្យដឹងថា គាត់ចាប់យកមុខរបរធ្វើទូកត្នោតនេះអស់រយៈពេលជាង១០ឆ្នាំមកហើយ ។ កាលដែលមិនទាន់កើតជំងឺកូវីដ១៩ លក់ទូកត្នោតដាច់គួរសមនិយាយរួមក្នុងមួយខែយ៉ាងហោចណាស់លក់បាន២ទៅ៣ទូកដែរ ទូកមួយតម្លៃជិត១០០ដុល្លារ ។ ក៏ប៉ុន្តែរយៈពេល៦ខែចុងក្រោយនេះ បន្ទាប់ពីប្រទេសយើងមានកើតជំងឺកូវីដ១៩ មកការលក់ដូរទូកត្នោតបានធ្លាក់ចុះសឹងដល់លេខសូន្យ ។ ដូច្នេះគាត់ត្រូវបង្ខំចិត្តដឹកទូកត្នោតតាមរ៉ឺម៉កម៉ូតូលក់ចល័តរហូតដល់ភ្នំពេញ ថ្លៃខ្លះលក់បាន ថ្ងៃខ្លះដាច់បាយតែម្តងដោយសារគ្មានអ្នកទិញ ។
លោក ឃឹម សុវី បានរំលឹកថា ការធ្វើទូកត្នោតនេះគេមិនមែនចេះតែយកដើមត្នោតតាមចិត្តចង់នោះមកធ្វើទេ គឺគេយកដើមត្នោតចាស់ៗដែលលែងមានផ្លែ និងមិនអាចយកទឹកបានតទៅទៀត ។ គាត់ថា ដើមត្នោតណាដែលចាស់ ទើបគាត់ទិញពីអ្នកភូមិជិតឆ្ងាយក្នុងតម្លៃពី៣ទៅ៥ម៉ឺនរៀល ក្នុងមួយដើមដឹកយកមកផ្ទះកែច្នៃជាទូកត្នោតដែលមានប្រវែងយកត្រឹមតែ២ម៉ែត្រ៨តឹក សល់ពីនឹងធ្វើជាសម្ភារផ្សេងៗ ។ ដោយសារប្រឈមការខ្វះខាតក្នុងជីវភាព ព្រោះគ្មានអ្នកមកទិញទូកត្នោតដូចពេលមុន ទើបគាត់បែកគំនិត ដឹកទូកត្នោតម្តងៗបានបួនគ្រឿងតាមរ៉ឺម៉ក់ម៉ូតូលក់ចល័តតាមបណ្តោយផ្លូវជាតិលេខ៥ រហូតដល់ភ្នំពេញ ។
ទូកត្នោតដែលគាត់ដឹកលក់នេះ គឺជាទូកតាំងលម្អនៅតាមសណ្ឋាគារ រីសត ភោជនីយដ្ឋាន វិឡានិងភូមិគ្រឹះផ្សេងៗ ក្នុងតម្លៃមួយ១២០ដុល្លារ ។ ពិតជាមិនគួរឲ្យជឿសោះសម្រាប់រូបគាត់ខំបើករ៉ឺម៉កម៉ូតូតាំងពីព្រឹកព្រលឹមរហូតដល់រសៀល សូម្បីតែទូកមួយក៏លក់មិនដាច់គ្មានអ្នកសួរមួយម៉ាត់។
លុះគាត់បើកម៉ូតូតាមផ្លូវលេខ២៧១ ខាងកើតមន្ទីរពេទ្យរុស្សី មានហាងលក់គ្រឿងសង្ហារិមមួយកន្លែង ដែលមានផលិតផលតាំងលក់ខ្លះធ្វើមកពីដើមត្នោត ។ ឃើញដូច្នេះគាត់ដាច់ចិត្តចូលសួរម្ចាស់ឲ្យជួយទិញទូករបស់គាត់បួន ព្រោះពេលវេលាល្ងាច ហើយណាមួយគាត់ប្រញាប់ទៅផ្ទះផង ។ ម្ចាស់ហាងខាងលើទំនងជាមានក្តីអាណិត និងម្យ៉ាងវិញមិនមានហាងណាលក់គ្រឿងសង្ហារិមមានតាំងលក់ទូកត្នោត បែបនេះទេនៅភ្នំពេញ ទើបគាត់សម្រេចចិត្តទិញទូកទាំងអស់ក្នុងតម្លៃ៧០ដុល្លារទូកមួយ ។
លោក សាន ពៅ ម្ចាស់សិប្បកម្មធ្វើទូកត្នោតនៅស្រុកបាកាន ខេត្តពោធិ៍សាត់ បានឲ្យដឹងតាមទូរស័ព្ទថា សិប្បកម្មរបស់គាត់ធ្វើទូកត្នោតសម្រាប់ដាក់តាំងនៅលើវិឡា ភោជនីយដ្ឋាន ផ្សារទំនើប រីសត និងភូមិគ្រឹះ ក្នុងមួយខែលក់បាន២ទៅ៣ទូកដែរ ក្នុងតម្លៃចាប់ពី៣០០ទៅ៤០០ដុល្លារហើយ ច្រើនអ្នកទិញជាអ្នកមកពីភ្នំពេញ ។ ដើមត្នោតដែលគាត់ទិញមកកែច្នៃធ្វើទូកត្នោតនេះគាត់យកតែដើមត្នោតចាស់ៗ ដែលលែងមានផ្លែ ។ គាត់ថា បើយកដើមត្នោតដែលមានផ្លែ គឺមិនអាចយកច្នៃធ្វើអ្វីបាននោះទេ ។ ដើមត្នោតចាស់ៗអស់ថ្លៃគាត់ទិញនៅភូមិក្នុងស្រុកបាកានតែប៉ុណ្ណោះក្នុងតម្លៃមួយដើម៥ម៉ឺនរៀលមានប្រវែងពី១៥ទៅ២០ម៉ែត្រ ហើយយកមកធ្វើទូកក្នុងទូកមួយប្រើពេលយ៉ាងតិច១០ថ្ងៃ ទើបរួចរាល់ទាំងស្រុង ។
លោក សាន ពៅ បានបញ្ជាក់ផងដែរថា បច្ចុប្បន្ននេះមិនមានការធ្វើទូកត្នោតសម្រាប់យកទៅអុំតាមបឹងបួរទៀតឡើយ ព្រោះទូកជ័រដែលគេហៅថាទូកបីស្លឹកមកពីវៀតណាម មានលក់ទូទាំងប្រទេស ។ សូម្បីតែនៅខេត្តពោធិ៍សាត់យើងនឹងប្រជាពលរដ្ឋនិយមប្រើទូកវៀណាមតាមដងទន្លេបឹងបួរអស់ទៅហើយ ។ ទើបសិប្បកម្មរបស់លោកធ្វើត្នោតសម្រាប់តាំងលម្អតែប៉ុណ្ណោះ ។ តែបច្ចុប្បន្នមានកើតជំងឺកូវីដ១៩បានធ្វើប៉ះពាល់យ៉ាងធ្ងន់ធ្ងរដល់ការធ្វើអាជីវកម្មរបស់គាត់ ។ តែទោះយ៉ាងណា គាត់មិនអាចបោះបង់សិប្បកម្មដែលផលិតពីដើមត្នោតបានឡើយ ។
គួរំលឹកផងដែរថា ដើមត្នោតជារុក្ខជាតិមួយប្រភេទដែលផ្តល់អត្ថប្រយោជន៍ច្រើនយ៉ាង ។ មិនតែប៉ុណ្ណោះវាជារុក្ខជាតិតំណាងអត្តសញ្ញាណរបស់កម្ពុជាផងដែរ ។ ដើមត្នោត មានភាគច្រើននៅក្នុងខេត្តកំពង់ស្ពឺ កំពង់ឆ្នាំង ពោធិ៍សាត់ កំពង់ចាម កំពង់ធំ ព្រៃវែង និងខេត្តកណ្ដាល ។ល។ ដើមត្នោតជារុក្ខជាតិប្រជាប្រិយតំណាងឱ្យសង្គមខ្មែរ ដែលមានវត្តមាន និងផ្តល់នូវគុណសម្បត្តិច្រើនយ៉ាងដល់ប្រជាជាតិខ្មែរ តាំងពីសម័យកំណកំណើតនគរខ្មែរ និងជាអត្តសញ្ញាណជាតិ ដែលប្រជាជនខ្មែរសម្គាល់នូវទេសភាពទឹកដីរបស់ខ្លួនពីបុរាណកាល រហូតមកដល់បច្ចុប្បន្នស្រប និងពាក្យស្លោកថា «ដើមត្នោតជាជម្រកផ្ទះខ្មែរ» ។ ខ្មែរយើងបានចាត់ទុកដើមត្នោតជារុក្ខជាតិតំណាងឱ្យនិមិត្តរូបជាតិ និងតំណាងឱ្យវប្បធម៌ដូចមានការបញ្ជាក់តាមរយៈចម្លាក់នៅលើជញ្ជាំងប្រាសាទអង្គរវត្តជាសក្ខីភាពស្រាប់ ។
នៅក្នុងសង្គមខ្មែរដើមត្នោតបានផ្តល់នូវអត្ថប្រយោជច្រើនណាស់ ក្នុងនោះមានដូចជាឫសត្នោត និងផ្កាត្នោតឈ្មោល គឺជាឱសថបុរាណសម្រាប់ធ្វើការព្យាបាលជំងឺគ្រុនចាញ់កាមរោគ ឬជំងឺស្ពឹកចុងដៃចុងជើង ។ និយាយរួម គ្រប់ផ្នែករបស់រុក្ខជាតិប្រភេទនេះគឺសុទ្ធតែអាចយកមកកែច្នៃឱ្យចេញជាប្រយោជន៍បានទាំងអស់ឱ្យរាប់មិនអស់ដែរ សម័យកែច្នៃនេះ ៕
ចែករំលែកព័តមាននេះ