សៀមរាប ៖ ដើមឈើចំនួន៤០០ដើម បានដាំនៅក្នុងបរិវេណប្រាសាទអង្គរវត្តកាលពីថ្ងៃទី១៥ ខែកក្កដា ម្សិលមិញ ប៉ុន្តែជាគោលដៅ ក្នុងឆ្នាំ២០២០នេះ អាជ្ញាធរជាតិអប្សរានឹងចែកកូនឈើជាង១សែនដើមឱ្យទៅសាធារណជនយកទៅដាំនៅតាមសហគមន៍ ក្នុងតំបន់ឧទ្យានអង្គរ…
សៀមរាប ៖ ដើមឈើចំនួន៤០០ដើម បានដាំនៅក្នុងបរិវេណប្រាសាទអង្គរវត្តកាលពីថ្ងៃទី១៥ ខែកក្កដា ម្សិលមិញ ប៉ុន្តែជាគោលដៅ ក្នុងឆ្នាំ២០២០នេះ អាជ្ញាធរជាតិអប្សរានឹងចែកកូនឈើជាង១សែនដើមឱ្យទៅសាធារណជនយកទៅដាំនៅតាមសហគមន៍ ក្នុងតំបន់ឧទ្យានអង្គរ បង្កើតគម្របបៃតងដល់បរិស្ថាន ក្នុងការថែរក្សាប្រាសាទបុរាណក៏ដូចជា បង្កើនសោភ័ណភាពក្នុងរមណីដ្ឋានអង្គរឲ្យកាន់តែមានភាពទាក់ទាញថែមទៀត ។
ចាប់តាំងពីឆ្នាំ២០០៤មក អាជ្ញាធរជាតិអប្សរាបានជំរុញឲ្យមានការដាំឈើនៅក្នុងតំបន់ឧទ្យានអង្គរ ។
លោក ហង់ ពៅ អគ្គនាយកអាជ្ញាធរជាតិអប្សរា បាននិយាយថា ដើមឈើមានសារៈសំខាន់ណាស់នៅក្នុងការថែរក្សាប្រាសាទបុរាណឲ្យអង់វង្ស ។ លោកថា តាមការវាស់វិទ្យាសាស្ត្រ ថ្មប្រាសាទ មានសីតុណ្ហភាពនៅពេលថ្ងៃរសៀលរហូតដល់កម្រិតជិត៨០អង្សា និងធ្លាក់មកត្រឹមប្រមាណ២០អង្សានៅពេលយប់ ។ ដូច្នេះគម្លាតពេលថ្ងៃ និងយប់រហូតដល់៦០ដឺក្រេ ។ «នៅពេលថ្មក្តៅខ្លាំងវាអាចផ្ទាត់ខូច ជាក់ស្តែងឃើញមានបញ្ហាកើតមានទៅលើរូបចម្លាក់មួយចំនួន ។ ប៉ុន្តែនៅពេលយើងមានដើមឈើច្រើននៅតំបន់អង្គរ ដើមឈើបានជួយធ្វើឱ្យមានសំណើម ដែលអាចជួយកាត់បន្ថយកំដៅទៅលើថ្ម ដែលជាផ្នែកមួយដ៍សំខាន់ក្នុងការអភិរក្សប្រាសាទរបស់យើង» លោក ហង់ ពៅបញ្ជាក់ ។
លើសពីនេះ ឈើបានជួយរក្សាទឹកនៅក្រោមដី និងការពារខ្យល់បោកបក់មលលើប្រាសាទផងដែរ ។ អគ្គលេខាធិការអាជ្ញាធរជាតិអប្សរាបាន អំពាវនាវដល់ពលរដ្ឋរស់នៅក្នុងតំបន់ឧទ្យានអង្គរចូលរួមដាំដើមឈើឲ្យគ្រប់គ្នា ជាផ្នែកចូលរួមថែរក្សាអភិរក្សប្រាសាទបុរាណរបស់ជាតិ ៕
ចែករំលែកព័តមាននេះ