ADផ្ទាំងផ្សព្វផ្សាយពាណិជ្ជកម្ម

Picture

គុក​ខ្ពើម​អ្នកមាន! ដេញ​អ្នកមាន​ប្រាក់​មិន​ឲ្យ​ដេក​ទេ ទៅសម្រាក​នៅ​មន្ទីរពេទ្យ​ទៅ!

3 ឆ្នាំ មុន

រាជធានី​ភ្នំពេញ ៖ នៅ​ព្រឹក​ថ្ងៃ​ទី​១៥ កក្កដា ២០២០​នេះ សភា​ស៊ើបសួរ​សាលាឧទ្ធរណ៍​បាន​ស្នើរ​សុំ​ទៅ​អគ្គនាយកដ្ឋាន​ពន្ធនាគារ​ឲ្យ​អនុរក្ស​ពន្ធនាគារ​ប៉េ​ហ្ស៊ី នាំ​ជន​ត្រូវ​ចោទ​ឈ្មោះ ហូរ ចំរើន មក​ធ្វើការ​សាកសួរ​ដេញដោល…

រាជធានី​ភ្នំពេញ ៖ នៅ​ព្រឹក​ថ្ងៃ​ទី​១៥ កក្កដា ២០២០​នេះ សភា​ស៊ើបសួរ​សាលាឧទ្ធរណ៍​បាន​ស្នើរ​សុំ​ទៅ​អគ្គនាយកដ្ឋាន​ពន្ធនាគារ​ឲ្យ​អនុរក្ស​ពន្ធនាគារ​ប៉េ​ហ្ស៊ី នាំ​ជន​ត្រូវ​ចោទ​ឈ្មោះ ហូរ ចំរើន មក​ធ្វើការ​សាកសួរ​ដេញដោល លើ​សំណុំរឿង​ព្រហ្មទណ្ឌ​លេខ​៤៥៤២ ចុះ​ថ្ងៃ​ទី​១៨ ខែកក្កដា ឆ្នាំ​២០១៩ របស់​សាលាដំបូង​រាជធានី​ភ្នំពេញ ។

ជនជាប់ចោទ​ឈ្មោះ ហូរ ចំរើន ដែល​មាន​ងារ​ជា​ឧកញ៉ា បាន​ត្រូវ​ឃុំខ្លួន​ដាក់​ឲ្យ​ស្ថិត​ក្រោម​ការ​ត្រួតពិនិត្យ​ពី​បទ «​រំលោភ​លើ​ទំនុកចិត្ត​» ប្រព្រឹត្ត​នៅ​រាជធានី​ភ្នំពេញ កាលពី​អំឡុង​ឆ្នាំ​២០១៥ រហូត​ដល់​ឆ្នាំ​២០១៧ តាម​មាត្រា​៣៩១ និង​មាត្រា​៣៩២​នៃ​ក្រមព្រហ្មទណ្ឌ ។

សូម​រំឭក​ថា អតីត​ផ្កាយ​៣ ហូរ ចំរើន បាន​ត្រូវ​នគរបាល​ការិយាល័យ​ព្រហ្មទណ្ឌ​កម្រិត​ស្រាល ក្រសួងមហាផ្ទៃ ឃាត់ខ្លួន​កាលពី​រសៀល​ថ្ងៃ​ទី​១៥ ឧសភា ២០១៨​កន្លង​ទៅ នៅ​ចំណុច​ផ្ទះ​វីឡា​មួយ ស្ថិត​ក្នុងភូមិ​ព្រៃ​ស សង្កាត់​ព្រៃ​ស ខណ្ឌដង្កោ រាជធានី​ភ្នំពេញ ពាក់ព័ន្ធ​នឹង​ការ​ផ្ទុះអាវុធ​ជិត​១០​គ្រាប់​បាញ់​គំរាម​ឪពុកក្មេក ។ ក្រោយ​ពី​ត្រូវ​សមត្ត​កិច្ច​ឃាត់ខ្លួន​និង​ឃុំខ្លួន ឈ្មោះ​ហូរ ចំរើន ត្រូវ​រង​នូវ​ពាក្យបណ្តឹង​ជា​បន្តបន្ទាប់​ទៀត ពាក់ព័ន្ធ​នឹង​បទ​ឆបោក និង​កំពុង​បន្តដំណើរ​ការ​លើ​សំណុំរឿង​ថ្មី​ទៀត ។

ជនជាប់ចោទ ហូរ ចំរើន ដំបូង​ឡើយ​ត្រូវ​បាន​ឃុំខ្លួន នៅ​ពន្ធនាគារ​ព្រៃ​ស ក្នុង​មណ្ឌល​អប់រំ​កែប្រែ​«​ម​១» ប៉ុន្តែ​ក្រោយមក​អ្នកទោស ដែល​មាន​ងារ​ជា​ឧកញ៉ា និង​មាន​ប្រាក់​នេះ បាន​សុំ​ផ្ទេរ​ចេញពី​ពន្ធនាគារ​«​ម​១» ទៅ​ដេក​ទទួលទោស​នៅ​ពន្ធនាគារ ប៉េ​ហ្ស៊ី ដែល​គេ​យល់​ថា ជា​ពន្ធនាគារ​មាន​ផាសុកភាព​នោះ​វិញ ។

បន្ទាប់​ពី​បាន​ទៅ​ដេក នៅ​ពន្ធនាគារ​ប៉េ​ហ្ស៊ី​ហើយ ថ្មី​ៗ​នេះ​ឧកញ៉ា​ជាប់ចោទ​រូប​នេះ បាន​ស្នើ​សុំ​ទៅ​ថ្នាក់លើ ដែល​គ្រប់គ្រង​ពន្ធនាគារ ទៅ​សម្រាក​នៅ​មន្ទីរពេទ្យ​មិត្តភាព​ខ្មែរ​-​សូ​វៀត​វិញ ដោយ​ជនជាប់ចោទ​អះអាង​ថា មាន​បញ្ហា​សុខភាព ។

ចំណែកឯ អ្នក​តាមដាន​រឿង​អ្នកទោស​មាន​លុយ សុំ​ទៅ​ដេកពេទ្យ និយាយ​ថា អ្នកមាន​ប្រាក់​គ្មាន​ឈឺ​អី​ទេ តែងតែ​ជួល​មន្ទីរពេទ្យ​ដេក​ជំនួស​គុក​រហូត ដែល​គេ​តែង​និយាយ​ថា «​គុក​ខ្ពើម​អ្នកមាន និង​គុក​ដេញ​អ្នកមាន​ប្រាក់​មិន​ឲ្យ​ដេក​» កន្លង​មក​ឃើញ​មាន​ច្រើន​នាក់​ហើយ ។

ជាក់ស្តែង​ដូច ឧកញ៉ា ថោ​ង សា​រ៉ាត់ កាល​មានឈ្មោះ​ជាប់​ទោស​ជា​ឃាតករ​សម្លាប់​ឧកញ៉ា អ៊ឹ​ង ម៉េ​ង​ជឺ មិន​បាន​ដេក​ក្នុង​ពន្ធនាគារ​ដូច​គេ​ទេ ក្នុង​រយៈពេល​៤-៥​ឆ្នាំ​ពេល​មានទោស រហូត​ដល់​មានការ​ដោះ​លែង​វិញ ដែល​គេ​ថា គុក​ខ្ពើម​ណាស់​ដេញ​មិន​ឲ្យ​ដេក ។ ដូច្នេះ នេះ​ជា​គំរូ​សម្រាប់​អ្នកមាន​ប្រាក់ ដូច​ឧកញ៉ា ហូរ ចំរើន និង​មាន​អ្នកមាន​លុយ​ខ្លះ​ទៀត ក៏​យក​មន្ទីរពេទ្យ​ធ្វើ​គុក​ដែរ ដូច​ជា​ជន​ត្រូវ​ចោទ​ឈ្មោះ នួន ប៉ុក ភេទ​ប្រុស អាយុ​៤៥​ឆ្នាំ អតីត​ប្រធាន​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី​ខេត្ត​ព្រះ​សីហ​នុ ដែល​ជាប់ចោទ​ចំនួន​៣​បទល្មើស​គឺ ១-​បទ​រំលោភ​អំណាច ២-​បទ​បំពាន​ធនធានធម្មជាតិ និង​៣-​បទ​ផ្តល់​និង​ប្រើប្រាស់​ឯកសារ​ក្លែង​ដោយ​អាជ្ញាធរ ។

ជនសង្ស័យ​ឈ្មោះ នួន ប៉ុក ត្រូវ​បាន​អង្គភាព​ប្រឆាំង​អំពើ​ពុក​រលួយ (ACU) បញ្ជូន​ទៅ​សាលាដំបូង​រាជធានី​ភ្នំពេញ កាលពី​ថ្ងៃ​ទី​៤ ខែមីនា ឆ្នាំ​២០២០ ពាក់ព័ន្ធ​នឹង​ការ​ប្រព្រឹត្ត​បទល្មើស​ពុក​រលួយ ហើយ​កំពុង​យក​មន្ទីរពេទ្យ​មិត្តភាព​ខ្មែរ​-​សូ​វៀត​ធ្វើ​ពន្ធនាគារ​ដែរ ។ នេះ​គេ​ហៅ​ថា​អ្នកទោស​មាន​ប្រាក់ ចង់​ជួល​សណ្ឋាគារ​ដេក​ក៏​បាន ព្រោះ​ព្រាយ​គុក​ខ្ពើម​ពេក​ក្រៃ ៕

អត្ថបទសរសេរ ដោយ

កែសម្រួលដោយ