អា​មេ​រិ​ក​បង្ហាញ​គម្រោង​លុប​ចោល​ប្រព័ន្ធ GPS ពី​កម្ពុជា​ និង​បណ្តា​ប្រទេស​នាំ​ចូល​អង្ករ


​រាជធានី​ភ្នំពេញ​៖ សហព័ន្ធ​ស្រូវ​អង្ក​រអា​មេ​រិ​ក បាន​ស្នើ​ដល់​គណៈកម្មាធិការ​ពាណិជ្ជកម្ម​អន្តរជាតិ​អា​មេ​រិ​កលើ​គម្រោង​ញាត្តិ​លុប​ចោល​កម្មវិធី​ប្រព័ន្ធ​អនុគ្រោះ​ពន្ធ​ពាណិជ្ជកម្ម ហៅ​ថា GSP ពី​ប្រទេស​ចំនួន​៦ ក្នុង​នោះ​ក៏​មាន​កម្ពុ​ជាមួយ​ផង​ដែរ​ ។ តែ​អ្នក​ពាក់ព័ន្ធ​លើក​ឡើង​ថា បើ​ដក ក៏​មិន​ប៉ះពាល់​ធ្ងន់ធ្ងរ​ដែរ ព្រោះ​កម្ពុជា​នាំ​ចេញ​អង្ករ​ទៅ​អា​មេ​រិ​ក​ក្នុង​បរិមាណ​តិចតួច​ទេ ។

​យោង​តាម​សហព័ន្ធ​ស្រូវ​អង្ករ​កម្ពុជា ក្រសួងពាណិជ្ជកម្ម​កម្ពុជា​បាន​បើ​កកិច្ចប្រជុំ​ពិភាក្សា​និង​ប្រមូល​ធាតុ​ចូល​ជា​បន្ទាន់​មួយ​ជាមួយនឹង​សហព័ន្ធ​ស្រូវ​អង្ករ​កម្ពុជា​ទាក់ទង​នឹង​ការ​សហរដ្ឋអាមេរិក​ពិភាក្សា​ចុង​ក្រោយ​លើ​ការ​លុប​ចោល​កម្មវិធី​ប្រព័ន្ធ​អនុគ្រោះ​ពន្ធ​ពាណិជ្ជកម្ម (GSP) លើ​អង្ករ​កម្ពុជា​។

ការ​រៀបចំ​កិច្ចប្រជុំ​បន្ទាន់​នេះ គឺ​ដើម្បី​ឆ្លើយ​តប​ទៅ​នឹង​ការ​ដែល​សហព័ន្ធ​ស្រូវ​អង្ក​រអា​មេ​រិ​ក បាន​ស្នើ​ដល់​គណៈកម្មការ​ពាណិជ្ជកម្ម​អន្តរជាតិ​អា​មេ​រិ​ក (USITC) ឱ្យ​លុប​ចោល​បញ្ជី​ទំនិញ​ដែល​មាន​លក្ខណៈសម្បត្តិ​គ្រប់គ្រាន់​ស្ថិត​ក្រោម​ប្រព័ន្ធ​អនុគ្រោះ​ពន្ធ​ពាណិជ្ជកម្ម​(GSP)​លើ​ប្រភេទ​អង្ករ​នាំ​ចូល ខណៈ​ដែល​កន្លង​មក​សហរដ្ឋអាមេរិក​រួម​មាន ប្រទេស​ថៃ​, វៀតណាម​, ប្រេ​ស៊ី​ល​, ឥណ្ឌា​, ភូមា និង​កម្ពុជា ។

​លោក ឧកញ៉ា សុង សា​រ៉​ន ប្រធាន​សហព័ន្ធ​ស្រូវ​អង្ករ​កម្ពុជា​មាន​ប្រសាសន៍​ថា ការ​នាំ​ចូល​អង្ករ​កម្ពុជា​ទៅ​កាន់​សហរដ្ឋអាមេរិក​មិន​បាន​ប៉ះពាល់​ដល់​កសិករ​សហរដ្ឋអាមេរិក​នោះ​ទេ ដោយហេតុ​ថា ៖ ទី​១)-​បរិមាណ​នាំ​ចេញ​អង្ករ​កម្ពុជា​ទៅ​កាន់​សហរដ្ឋអាមេរិក គឺ​មាន​ត្រឹមតែ​ប្រមាណ​២.០០០​តោន​ប៉ុណ្ណោះ​ក្នុង​មួយ​ឆ្នាំ​។ ទី​២)- គឺ​ប្រភេទ​អង្ករ​ដែល​កម្ពុជា​នាំ​ចូល​ទៅ​អា​មេ​រិ​ក​ជា​ប្រភេទ Indica Rice ប្រភេទ​សរីរាង្គ និង​អង្ករ​ក្រអូប​រំដួល ដែល​ខុស​ពី​ប្រភេទ​អង្ករ​ដែល​កសិករ​សហរដ្ឋអាមេរិក​ដាំ​ដុះ ពោល​គឺ Japonica Rice និង Carlrose Rice»​។ ​

លោក លន់ យ៉េ​ង អគ្គលេខាធិការ​សហព័ន្ធ​ស្រូវ​អង្ករ​កម្ពុជា​មាន​ប្រសាសន៍ ថា «​បើសិនជា​អា​មេ​រិ​ក​ដក GSP ពី​ការ​នាំ​ចូល​អង្ករ​ពី​ប្រទេស​នាំ​ចូល​នោះ​គឺ​ត្រូវ​បង់ពន្ធ​ដូច​គ្នា​។ ខ្ញុំ​គិត​ថា​វា​ដូច​គ្មាន​ផល​ប៉ះពាល់ បើ​គេ​ដក​ទាំងអស់​គ្នា​ហើយ​បង់ពន្ធ​ទាំងអស់​គ្នា នោះ​ទីផ្សារ​វា​រក្សា​នៅ​ធម្មតា​។ តែ​សម្រាប់​ប្រទេស​នាំ​ចូល​ធំ​ៗ​អាច​នឹង​ថយ​ចុះ​បរិមាណ​នៃ​ការ​នាំ​ចូល ។ ដោយឡែក​សម្រាប់​កម្ពុជា​នាំ​ចូល​មាន​ចំនួន​តិចតួច​»​។ ​

បើ​តាម​លោក​លន់ យ៉េ​ង សព្វ​ថ្ងៃនេះ​ការ​បង់ពន្ធ​តាម​រយៈ GSP​នេះ​ធូរ​ថ្លៃ ហើយ​បើ​គិត​ជា​ប្រាក់​សម្រាប់​ពន្ធ​អង្ករ​មាន​ប្រមា​ន​ជាង​២​ម៉ឺន​ដុល្លារ​អា​មេ​រិ​ក​ក្នុង​មួយ​ឆ្នាំ​។ ​យោង​តាម លោក វេ​ង សា​ខុន រដ្ឋមន្ត្រី​ក្រសួងកសិកម្ម រុក្ខា​ប្រមាញ់​និង​នេសាទ​ធ្លាប់​បង្ហាញ​ថា ការ​នាំ​ចេញ​អង្ករ​ដែល​បាន​ឆ្លងកាត់​ការ​ត្រួតពិនិត្យ​ភូតគាម​អនាម័យ ក្នុង​រយៈពេល ៦​ខែ​ដើមឆ្នាំ​២០២០ សម្រេច​បាន ៣៩៧. ៦៦០ តោន កើនឡើង​ប្រមាណ ១១៦.១២២ តោន ស្មើនឹង ៤១,២៥% ដែល​ធៀប​ទៅ​នឹង​រយៈ​៦​ខែ​ដើមឆ្នាំ​២០១៩ មាន​ចំនួន ២៨១ ៥៣៨ តោន ។​

ដោយឡែក សម្រាប់​ខែមិថុនា ឆ្នាំ​២០២០ នេះ សម្រេចការ​នាំ​ចេញ​អង្ករ​បាន ចំនួន ៤១. ៥៦៣ តោន កើនឡើង​ចំនួន ១០. ១៩៧ តោន ស្មើនឹង ៣២,៥១% ធៀប​ទៅ​នឹង​ខែឧសភា ឆ្នាំ​២០១៩ មាន​អង្ករ​ក្រអូប​គ្រប់​ប្រភេទ​មាន​ចំនួន ៤១. ៨៦៤ តោន​, អង្ករ​ចម្រុះ​គ្រប់​ប្រភេទ​មាន​ចំនួន ៨. ៧៥២ តោន​, អង្ករ​ចំ​ហ៊ុយ​មាន​ចំនួន ៩២៤ តោន និង​អង្ករ​ក្រហម​មាន​ចំនួន ២៣ តោន ។ ​

លោក​រដ្ឋមន្ត្រី​គូសបញ្ជាក់​ថា «​ប្រទេស​ដែល​បាន​បញ្ជា​ទិញ​អង្ករ​ពី​កម្ពុជា​ក្នុង​រយៈពេល ៦​ខែ​នេះ មាន​ចំនួន ៥៦​ប្រទេស​ក្នុង​សហភាព​អ៊ឺ​រ៉ុ​ប​មាន​ប្រទេស​ចំនួន ២៤ ក្នុង​ចំណោម​២៨ ប្រទេស​, ប្រទេស​ចិន​, ប្រទេស​សមាជិក​អាស៊ាន​ចំនួន ៦ ហើយ​និង​នៅ​ទ្វិ​ប​ដ៏​ទៃ​ទៀត​ចំនួន ២៥ ប្រទេស ។ ទន្ទឹម​នឹង​នេះ​ក៏​មាន​ក្រុមហ៊ុន​ចំនួន ៥ ក្នុង​ចំណោម ៦៦ ក្រុមហ៊ុន ដែល​បាន​នាំ​ចេញ​អង្ករ​ច្រើន​ជាងគេ »៕

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ