រាជធានីភ្នំពេញ ៖ ដើម្បីឲ្យការផ្តល់បណ្ណសមធម៌ដល់ពលរដ្ឋក្រីក្រសម្រាប់ បើកសាច់ប្រាក់ឧបត្ថម្ភពីរដ្ឋាភិបាលអំឡុង ពេលមានជំងឺកូវីដ១៩នេះ មានតម្លាភាព ក្រសួងផែនការបានចេញសេចក្តីណែនាំថ្មីមួយដល់មន្ត្រីរបស់ខ្លួនឲ្យបំពេញភារកិច្ចស្រង់ស្ថិតិពលរដ្ឋក្រីក្រនេះឲ្យបានត្រឹមត្រូវ ដើម្បីឲ្យទិន្នន័យនោះមានគុណភាព តម្លាភាពចំពោះពលរដ្ឋទូទៅ ។…
រាជធានីភ្នំពេញ ៖ ដើម្បីឲ្យការផ្តល់បណ្ណសមធម៌ដល់ពលរដ្ឋក្រីក្រសម្រាប់ បើកសាច់ប្រាក់ឧបត្ថម្ភពីរដ្ឋាភិបាលអំឡុង ពេលមានជំងឺកូវីដ១៩នេះ មានតម្លាភាព ក្រសួងផែនការបានចេញសេចក្តីណែនាំថ្មីមួយដល់មន្ត្រីរបស់ខ្លួនឲ្យបំពេញភារកិច្ចស្រង់ស្ថិតិពលរដ្ឋក្រីក្រនេះឲ្យបានត្រឹមត្រូវ ដើម្បីឲ្យទិន្នន័យនោះមានគុណភាព តម្លាភាពចំពោះពលរដ្ឋទូទៅ ។
លោក ឆាយ ថន រដ្ឋមន្ត្រីក្រសួងផែនការបានជូនដំណឹងទៅប្រធានមន្ទីរផែនការគ្រប់ខេត្ត-រាជធានី ឲ្យសហការជាមួយអាជ្ញាធរឃុំ-សង្កាត់ឲ្យបានជិតស្និទ្ធបំផុត ដើម្បីធ្វើការកំណត់អត្តសញ្ញាណពលរដ្ឋក្រីក្របន្ត ។
ក្នុងនោះលោករដ្ឋមន្ត្រីណែនាំមន្ត្រីឲ្យចុះផ្សព្វផ្សាយ ពន្យល់ ប្រជាពលរដ្ឋ ពីនីតិវិធីកំណត់អត្តសញ្ញាណកម្មគ្រួសារក្រីក្រ។ ធ្វើការណែនាំដល់គ្រួសារដែលកំពុងប្រើបណ្ណសមធម៌ដែលហួសសុពលភាពឬធ្វើការ ដកបណ្ណសមធម៌ ពីពលរដ្ឋមានជីវភាពប្រសើរ និងកំណត់អត្តសញ្ញាណកម្មគ្រួសារក្រីក្រដែលនៅពុំទាន់មានបណ្ណសមធម៌ ដើម្បីទទួលបានបណ្ណសមធម៌។
សេចក្តីណែនាំថ្មីរបស់លោកឆាយ ថន ធ្វើឡើងបន្ទាប់ពីមានភាពមិនប្រក្រតីមួយចំនួន កើតមាននៅក្នុងការផ្តល់បណ្ណសមធម៌នាពេលកន្លងមក។
កន្លងមក មានគ្រួសារមួយចំនួនកាន់បណ្ណសមធម៌ហួសកំណត់ គ្រួសារមួយចំនួនមានជីវភាពសមរម្យ តែមានបណ្ណសមធម៌ ចំណែកគ្រួសារពលរដ្ឋក្រីក្រមួយចំនួនពុំទាន់មានបណ្ណសមធម៌ ទៅវិញ។ នេះបើតាមការបញ្ជាក់របស់រដ្ឋមន្រ្តីក្រសួងផែនការ នៅក្នុងសេចក្តីជូនដំណឹង ចុះថ្ងៃទី១៣កក្កដា ។ រដ្ឋមន្រ្តីក្រសួងផែនការ បានដាស់តឿន ប្រធានមន្ទីរផែនការតាមខេត្តទំាងអស់ ខិតខំ ដោះដោះស្រាយភាពមិនប្រក្រតី និង ការតវ៉ា នានា ឲ្យមានប្រសិទ្ធភាព។
សូមជម្រាបថានៅក្នុងជុំទី១រដ្ឋបានបញ្ចេញសាច់ប្រាក់ប្រមាណ២៥លានដុល្លារកាលពីថ្ងៃទី២៤មិថុនា សម្រាប់ឧបត្ថម្ភ ដល់ពលរដ្ឋក្រីក្រនៅទូទំាងប្រទេសប្រមាណ៥៦ម៉ឺនគ្រួសារ។
ការផ្តល់ប្រាក់ឧបត្ថម្ភជុំទី១នេះ នឹងបញ្ចប់ក្នុងការពេលឆាប់ៗនេះ ហើយជុំទី២នឹងបន្តចាប់ពីថ្ងៃទី២៥កក្កាដា ខាងមុខនេះ។ មន្ត្រីបានជំរុញឲ្យពលរដ្ឋដែលគិតថាខ្លួនក្រីក្រពិតប្រាកដទៅដាក់ពាក្យស្នើសុំសម្ភាសដើម្បីទទួលបានបណ្ណសមធម៌ នៅតាមឃុំ សង្កាត់ដែលខ្លួនរស់នៅជាអចិន្ត្រៃយ៍។
ចំនួនពលរដ្ឋក្រីក្រនៅក្នុងជុំទី២នោះ មន្ត្រីសង្ឃឹមថានឹងមានចំនួនច្រើនជាងជុំទី១ ប៉ុន្តែគេមិនទាន់ដឹងចំនួនពិតប្រាកដនៅឡើយទេក្នុងពេលនេះ។ គិតត្រឹមថ្ងៃទី១ ខែកក្កដា ក្រសួងផែនការបានបង្ហាញថា មានគ្រួសារក្រីក្រថ្មីចំនួន ២៤ ៩១៥ គ្រួសារ បានរកឃើញបន្ថែម៕
ចែករំលែកព័តមាននេះ