រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្តយីឌុបដឹកទំនិញអេតចាយមួយគ្រឿង ខណៈម្ចាស់ចតទុកនៅក្នុងឃ្លាំង ក៏ស្រាប់តែឆ្លងចរន្តផ្ទុះឆេះចេញជាអណ្តាតភ្លើង ហើយថែមរថយន្តនោះរអិលទម្លុះទ្វារមកក្រៅលើផ្លូវថ្នល់តែម្តង បង្កឱ្យការភ្ញាក់ផ្អើលដល់សមត្ថកិច្ច និងប្រជាពលរដ្ឋនាំគ្នាបាញ់ទឹកពន្លត់ កាលពីម៉ោង២និង៣០នាទីរំលងអធ្រាត្រឈានចូលថ្ងៃទី១៣…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្តយីឌុបដឹកទំនិញអេតចាយមួយគ្រឿង ខណៈម្ចាស់ចតទុកនៅក្នុងឃ្លាំង ក៏ស្រាប់តែឆ្លងចរន្តផ្ទុះឆេះចេញជាអណ្តាតភ្លើង ហើយថែមរថយន្តនោះរអិលទម្លុះទ្វារមកក្រៅលើផ្លូវថ្នល់តែម្តង បង្កឱ្យការភ្ញាក់ផ្អើលដល់សមត្ថកិច្ច និងប្រជាពលរដ្ឋនាំគ្នាបាញ់ទឹកពន្លត់ កាលពីម៉ោង២និង៣០នាទីរំលងអធ្រាត្រឈានចូលថ្ងៃទី១៣ ខែកក្កដា ឆ្នាំ២០២០ នៅចំណុចទល់មុខឃ្លាំងអេតចាយមួយកន្លែងជិតនឹងច្រកចូលសាលាសង្កាត់ស្ទឹងមានជ័យ២ ផ្លូវ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ ។
សេចក្តីរាយការណ៍បន្តថា រថយន្តដែលត្រូវភ្លើងឆាបឆេះខាងលើ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3D5486 មានផ្ទុកទំនិញអេតចាយពេញមួយរថយន្ត ដែលចតទុកក្នុងឃ្លាំង ។
បើតាមពីបុគ្គលិកដែលស្នាក់នៅក្នុងឃ្លាំង បានឱ្យដឹងថា មុនពេលកើតហេតុ ពួកគាត់បានសម្រាកលង់លក់ដូចសព្វដង លុះមកដល់ម៉ោងកើតហេតុ ក៏ស្រាប់តែលឺសូរសំឡេងផ្ទុះភ្លាមៗនោះ ពួកគាត់ក៏ចេញមកមើលស្រាប់តែឃើញរថយន្តខាងលើមានអណ្ដាតភ្លើងឆេះសន្ធោសន្ធៅទៅហើយ។ ហើយខណៈពេលដែលកំពុងតែឆាបឆេះនោះ ស្រាប់តែរថយន្តរអិលចុះពីចំណោទដែលគ្មានមនុស្សបើកសោះ រួចក៏ជ្រុលទៅបុកទ្វាររបងចេញមកក្រៅមកនៅលើផ្លូវថ្នល់តែម្តង ។
ប្រភពដដែលបានបន្តទៀតថា បន្ទាប់ពីឃើញរថយន្តត្រូវភ្លើងឆាបឆេះហើយ ពួកគាត់ក៏ដូចជាកម្លាំងសមត្ថកិច្ចមូលដ្ឋានដែលល្បាតឆ្លងកាត់ទីនោះ បាននាំគ្នាយកបំពង់ពន្លត់អគ្គិភ័យ ជិត១០បំពង់មកបាញ់ និងខ្លះទៀតបានយកទឹកមកជះជួយពន្លត់ ទើបធ្វើឱ្យភ្លើងរលត់ទៅវិញអស់នៅម៉ោង៣យប់ថ្ងៃដដែល ។
ក្នុងហេតុការណ៍នេះដែរ សមត្ថកិច្ចបានឱ្យដឹងទៀតថា ករណីនេះមិនបណ្ដាលឲ្យមានអ្នកណារងរបួសនោះទេ គឺគ្រាន់តែខូចក្បាលរថយន្ដមួយកំណាត់មុខអស់ទាំងស្រុងតែប៉ុណ្ណោះ ហើយករណីខាងលើនេះ តាមការសន្និដ្ឋានជាជំហានដំបូង គឺបណ្ដាលមកពីឆ្លងចរន្តក្បាលអាគុយ ទើបបណ្ដាលឲ្យមានការឆាបឆេះបែបនេះ ចំណែកចំពោះករណីផ្សេងៗទៀតសមត្ថកិច្ចកំពុងធ្វើការស្រាវជ្រាវតាមក្រោយជាបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ