រាជធានីភ្នំពេញ ៖ រដ្ឋបាលរាជធានីភ្នំពេញ និងធ្វើការកែសម្រួលប្រព័ន្ធសារាចរនៅស្តុបចំនួនពីរ គឺស្តុបច្រមុះជ្រូកក្បាលថ្នល់ និងស្តុបវត្តនាគវ័ន ដើម្បីឲ្យចរាចរណ៍មានភាពល្អប្រសើរជាងមុន ខណៈដែលស្តុបទាំង២នេះ តែងតែកកស្ទះចរាចរណ៍រាល់ថ្ងៃនោះ ។
គម្រោងការនេះត្រូវបានលេីកឡេីងនៅក្នុងកិច្ចប្រជុំនៅសាលារាជធានីភ្នំពេញ កាលពីល្ងាចថ្ងៃទី១០ ខែកក្កដា ឆ្នាំ២០២០ ស្ថិតក្នុងអធិបតីភាព លោកឃួង ស្រេងអភិបាលនៃគណៈអភិបាលរាជធានីភ្នំពេញ ។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានបញ្ជាក់ថា ប្រព័ន្ធចរាចរណ៍នៅច្រមុះជ្រូកក្បាលថ្នល់មានការកកស្ទះចរាចរណ៍រាល់ថ្ងៃ ។ ដោយមើលឃើញពីបញ្ហាខាងលើនេះ រដ្ឋបាលរាជធានីភ្នំពេញក្រោមការដឹកនាំរបស់លោកឃួង ស្រេង បានសុំគោលការណ៍ទៅរាជរដ្ឋាភិបាល ដើម្បីសូមយកការ៉ាំស់សាំងសូគីមិចចេញពីច្រមុះជ្រូកក្បាលថ្នល់ ដោយប្តូទៅកាន់ទីតាំងផ្សេង ដើម្បីសម្រួលប្រព័ន្ធចរាចរណ៍នៅតំបន់នេះឱ្យកាន់តែប្រសើរឡើងជាងមុន ។
លោកសាំ ពិសិដ្ឋ បានបញ្ជាក់ទៀតថា ពាក់ព័ន្ធនឹងការកែប្រពន្ធលំហូរសារាចរនៅស្តុបច្រមុះជ្រូកក្បាលថ្នល់នេះរដ្ឋបាលរាជធានីភ្នំពេញគ្រោងនឹងពង្រីកផ្លូវព្រះមន្នីវង្សអោយបានបីគន្លង និងផ្លូវលេខ២៧១ បីគន្លងជាមួយនឹងការយកការ៉ាស់សាំងសូគីមិចនៅច្រមុះជ្រូកនេះចេញផងដែរ ។
ដោយឡែកនៅស្តុបវត្តនាគវ័នវិញ ក៏មានការកែសំរួលប្រព័ន្ធចរាចរណ៍ផងដែរ ដោយនឹងធ្វើការបើកផ្លូវ២២១ ក្នុងសង្កាត់ផ្សារដេប៉ូទី៣ ខណ្ឌទួលគោក ដែលបច្ចុប្បន្ននេះបិទមិនអោយធ្វើចរាចរណ៍ឡើងមកលើផ្លូវសហព័ន្ធរុស្ស៊ី និងកាត់ផ្លូវសហព័ន្ធរុស្ស៊ីចូលទៅវត្តនាគវ័នអោយដំណើរការចរាចរណ៍ តែមិនអនុញ្ញាតិអោយបត់ឆ្វេង បត់ស្ដាំចុះពីផ្លូវសហព័ន្ធរុស្ស៊ី ទៅលើកំណាត់ផ្លូវលេខ២២១នេះឡើយ ។
លោកឃួង ស្រេង អភិបាលរាជធានីភ្នំពេញបានឯកភាពទៅនឹងការកែសម្រួលប្រព័ន្ធចរាចរណ៍នៅស្តុបទាំងពីរខាងលើ ។ ប៉ុន្តែទោះបីជាយ៉ាងណាក្តីលោកបានធ្វើការណែនាំអោយមន្ទីរសាធារណការ និងដឹកជញ្ជូនរាជធានីភ្នំពេញ ពិសេសលោកសាំ ពិសិដ្ឋ មុននៃការបើកឲ្យធ្វើចរាចរណ៍នៅស្ទុបទាំង២នេះត្រូវតែធ្វើបទបង្ហាញតាមប្រព័ន្ធផ្សព្វផ្សាយដូចជា តាមបណ្ដាញទូរទស្សន៍ជាដើម ដើម្បីឲ្យប្រជាពលរដ្ឋប្រជាពលរដ្ឋបានយល់ដឹងអំពីការកែសម្រួលប្រព័ន្ធសារាចរនៃស្តុបទាំងពីរខាងលើនេះ ៕
ចែករំលែកព័តមាននេះ